創世記 48
48
雅各祝福以法蓮㧯瑪拿西
1過一站時間，有人通知約瑟，講厥爸發病。佢就帶兩個孻仔瑪拿西㧯以法蓮去看老人家。 2雅各聽講厥孻仔約瑟來看佢，以色列就勉強䟘起來坐在眠床。 3雅各㧯約瑟講：「全能个上帝識在迦南地个路斯向𠊎顯現、賜福給𠊎。 4佢對𠊎講：『𠊎愛給你多子多孫，俾你个後代成做盡多國家；𠊎也愛將這兜土地賜給你个後代，永遠做佢等个產業。』」
5 雅各又講：「約瑟啊！𠊎還吂到埃及以前，你在這位𫱔个兩個孻仔以法蓮㧯瑪拿西，愛算係𠊎个孻仔，像呂便㧯西緬係𠊎个一樣。 6你在佢等以後所𫱔个孻仔正算係若孻仔；總係佢等愛對以法蓮㧯瑪拿西分產業。 7𠊎恁樣做係為到若姆蕾潔个緣故。𠊎對美索不達米亞轉來个時，若姆在迦南地區、離以法他無幾遠个地方過身，𠊎非常悲傷，將姖葬在愛去以法他个路堘。」 (以法他就係伯利恆。)
8 以色列看到約瑟个兩個孻仔，就問講：「這兜細人仔係麼人？」
9 約瑟應厥爸：「係𠊎个孻仔，係𠊎到埃及以後，上帝賜給𠊎个。」
以色列講：「帶佢等到𠊎面前來，𠊎愛祝福佢等。」 10以色列老了，目珠花花，看毋清楚。約瑟將細人仔帶到佢面前，佢就揇等佢等、唚佢等。 11以色列對約瑟講：「𠊎無想到會再看到你；這下上帝俾𠊎連你个孻仔也看到。」 12約瑟牽兩個細人仔離開以色列个膝頭中間，自家伏在阿爸面前。
13 約瑟安排以法蓮企在以色列左片，瑪拿西企在右片。 14總係以色列兩手交叉伸出來，用正手放在老弟以法蓮个頭那頂，左手放在阿哥瑪拿西个頭那頂。 15佢就祝福約瑟講：
「願吾祖先亞伯拉罕㧯以撒所敬拜个上帝，賜福給這兩個細人仔！
願直到今晡日一生牧養𠊎个上帝賜福給佢等！
16願拯救𠊎脫離一切災難个天使祝福這兩個細人仔！
願𠊎个名、吾祖先亞伯拉罕㧯以撒个名，通過佢等繼續傳下去！
願佢等多子多孫，在地上大大興旺！」
17 約瑟看到阿爸將右手放在以法蓮頭那頂，認為恁樣毋著，就拿起厥爸个右手，愛對以法蓮个頭那徙到瑪拿西个頭那頂。 18約瑟對厥爸講：「阿爸，恁樣毋著，這個正係長子，請將右手放在佢个頭那頂。」
19厥爸毋肯接受，講：「孻仔啊，𠊎知，𠊎知。瑪拿西个後代也愛成做大族；總係厥老弟會比佢較強大，老弟个後代會成做盡多民族。」
20該日，雅各祝福佢等講：「以色列人愛提起你等个名來祝福人；佢等愛講：
『願上帝使你等像以法蓮㧯瑪拿西一樣。』」
恁樣，雅各使以法蓮擺在瑪拿西个頭前。
21後來以色列對約瑟講：「你知𠊎會死了；總係上帝一定㧯你等共下，帶你等轉祖先个土地去。 22𠊎將示劍該垤盡肥个地賜給你，毋給你該兜兄弟；該係𠊎親手用刀劍㧯弓對亞摩利人手中搶過來个。」
اکنون انتخاب شده:
創世記 48: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012