創世記 45
45
約瑟表明自家个身份
1 約瑟在佢身邊企等个人面前強強會忍毋住，就吩咐該兜人離開，到外背去。恁樣，約瑟向佢該兜兄弟表明自家身份該時，無別人在場。 2總係佢開聲大噭个聲音被埃及人聽到，消息就傳到王宮。 3約瑟對佢該兜兄弟講：「𠊎就係約瑟！阿爸有影還在麼？」該兜兄弟一聽到這句話，嚇到呆掉，毋會應佢。 4約瑟喊佢等行兼兜仔，佢等就偎近佢。佢講：「𠊎就係你等个老弟，係你等賣到埃及个約瑟。 5這下，你等毋使因為將𠊎賣到這位來著急、責備自家。派𠊎先到這位來个係上帝，為到愛留𫣆大家个生命。 6這地方个飢荒到這下正兩年，還有五年無法度耕種，也毋會有收成。 7為到愛留你等㧯你等个後代，上帝派𠊎先到這位來；這就係上帝奇妙个拯救。 8恁樣看來，派𠊎來个係上帝，毋係你等！佢俾𠊎在王面前做最高个參謀，做埃及个宰相，治理全國。
9「你等愛遽遽轉去阿爸該位，㧯佢講，『若孻仔約瑟恁樣講：上帝俾𠊎做埃及全國个宰相；請你毋好延纏，愛遽遽到𠊎這位來！ 10你愛帶若子女、孫仔、牛羊㧯一切所有个，到歌珊附近來住，㧯𠊎較近。 11𠊎愛在該位奉養你；因為還有五年个飢荒，𠊎無愛看到你㧯全家並頭牲全部餓死。』」
12 約瑟又講：「這下，你等㧯吾老弟便雅憫全部親眼看到，係𠊎 — 約瑟親口對你等講這兜話个。 13你等愛㧯阿爸講，𠊎在埃及有當大个權力，又愛報給佢知你等親眼看到个一切。你等愛遽遽接吾爸到這位來！」
14 約瑟就揇等老弟便雅憫大聲噭；厥老弟也伏在佢肩頭盡噭。 15接等，佢揇等其他个阿哥緊噭、緊唚；然後佢該兜兄弟正㧯佢講話。
16 約瑟該兜兄弟來到埃及个消息傳到王宮，王㧯佢个官員全部非常歡喜。 17王對約瑟講：「㧯你該兜兄弟講，用佢等个頭牲載糧食，黏時轉去迦南。 18愛將你等个阿爸㧯家族全部接到𠊎這位來！𠊎愛將埃及最好个土地賜給佢等，佢等做得在這位享受豐盛个生活。 19你也愛吩咐佢等，愛對埃及帶車仔轉去，接佢等个𡜵娘、子女，㧯你等个阿爸共下來。 20佢等毋好毋拌得該片个產業，因為埃及全地最好个東西，全部係佢等个。」
21 以色列該兜孻仔照王个話去做。約瑟也照王个吩咐給佢等車仔㧯路項所需要个糧食。 22佢又送逐個阿哥一身衫褲，總係給便雅憫五身衫褲㧯三百隻銀幣。 23佢送給厥爸十隻公驢載埃及最好个出產，另外送十隻驢乸載厥爸路項愛食个糧食、麵包㧯其他个食物。 24約瑟送佢該兜兄弟離開，又吩咐佢等講：「你等在路上毋好冤家！」
25佢等離開埃及，轉到迦南地佢等个阿爸雅各該位。 26佢等㧯阿爸講：「約瑟還在，又做埃及全地个宰相。」雅各聽到發咄愕，毋敢相信佢等个話。 27總係，一聽到約瑟交帶傳給佢个話，又看到約瑟派來愛接佢到埃及个車仔，雅各个心就醒過來。 28以色列就講：「毋使講了！𠊎个孻仔約瑟還在；𠊎吂死以前，一定愛去看佢。」
اکنون انتخاب شده:
創世記 45: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012