Orɔm 12
12
Kristə-lò tùntwĩ̀ĩ̀ gə́ mə̂ sə rə yə̀ nɛ́
1Da-byâ, Yi zhe wu-bɔ̀nɔ̀ ǹdə́ nə́ba dɛ̃´dɛ̃´. Rə̀myɛ́ ce, à nʼâ lwə̀l ába: zəna á cìn á yə̀ vwĩ̀-kɔn dɛ̀bɛ́ Yi cǐ, rə jʼa yí rə̀ pùbùlə̀, á pə rɛ. Wɔ́ èta á mə̂ sʼá cèrhé re né zhə̀n zhə̀nà. 2Á tùntwə̃̀ə̃̀ né bə̀kʼa yə̀ ǹdə lũ w kɔ̀bɔ́ nə́ ŋwɛ́nɛ́ ò wẽ́ mó tùntwə̃̀ə̃̀ né ta yé. Yẽ̌nə Yi pyìrhí á surhə né námpúm, mùnì ga á ŋwɛ̀nɛ́ á lwar kɔn dɛ̀bɛ́ rə̀ nʼê yàlá: tɛ̀bɛ́ rə̀ càn, rə̀ só, e jà rə̀ yú rə̀ pùbùlə̀.
3Yi wu-bɔ̀nɔ̀ w ce rə̀ pɔ nɛ rə̀ pɛnɛ́ y nánfò. Rə̀myɛ́ yilə, à nʼâ byili ába: á mə̀dù ga bə̀ká n cĩ́ ń cìn jàà kɛ̀bɛ́ è du mu wẽ́ yé. Lò gakó sə́ cĩ́ ǹ cìn jàà y kɛ̀bɛ́ è mə̂ ǹdə́ mɔ́ wẽ́, ǹdə Yi gə́ ce ǹmyɛ zhí ri ní mú. 4Zhə̀nà, nə́ yala nɛ́ kə̀kàlsɛ̀ já, sə kə̀kàlà èdù gakó zhe è tum. 5Wɔ́ èta, ǹdə́ nə́myɛ já ga, nə́ mù dwã nɛ Kristə wẽ́ nə́ jǐrh kɔn rə̀dù. Lò gakó zhǐ ń jàà wà, ǹdə numbyíní yala nɛ́ kə̀kàlsɛ́ ta.
6Yi pɔ rə̀ pansɛ dúdúmə́ dúdúmə́ nə́ mə̀dù mə̀dù gakó ne, rə̀ gə́ só nə́ba yilə. Rə̀myɛ́ ce, lò mɔ̀bɔ́ ǹ nɔ Yi nyì-zwennə pɛnɛ́, sə́ twĩ̀ kɔn mɛrhɛ ǹdə́ ǹ Yi-ni-zhú mú. 7Lò mɔ̀bɔ́ ǹ nɔ sãɔ̃ pɛnɛ́, sə́ sɛ̃ ǹ dwã bɛ́ nɛ. Lò mɔ̀bɔ́ ǹ nɔ Yi zɔ̀mɛ̀ rɛ́ còrhò pɛnɛ́, sə́ cèrhè rè ǹ dwã bɛ́ nɛ. 8Lò mɔ̀bɔ́ ǹ nɔ cícú pɛnɛ́, sə́ cící ǹ dwã bɛ́. Lò mɔ̀bɔ́ ǹ nə́ ǹ pɛ ǹ kɔna, sə́ pwèlè ǹ wu ń pa. Lò mɔ̀bɔ́ ǹ wɔ́ Kristə-lyì gùlú w yé né cə́bal, sə́ twĩ̀ ǹ tum dí ǹdə́ yə̀wâl. Lò mɔ̀bɔ́ ǹ nə́ ǹ sɛ̃ nə̀mwà nɛ̀, sə́ sɛ̃ bɛ ǹdə́ wu-nyɔ̃̀.
9Á mə̂ sʼá swéné dwã ǹdə́ wu-põ. Bə̀kʼá shɛ̀nɛ́ lwɛlɛ wɔ̀rhɔ́ yò gaga yé. Wɛ̀rhɛ́na cɛ̀nɛ̀ twéé twéé. 10Swénénə dwã ǹdʼá wun gakó ǹdə da-byâ ta. Cenə yə̀wâl nɛ́, á nyɛ̀ dwã. 11Twĩ̌nə wárhɛ́ wárhɛ́; bə̀kʼá cĩ́ nə̀wàcɔ̀rɔ̀ yé. Twĩ̌nə Cinu tum dí náàcɛ̀nɛ́ ǹdə́ yə̀wâl. 12Cenə á wun yə̀ nyɛ̀n á gə́ nʼá dɛ̃̀ Cinu nyì-bwelé y pyǐrh mó yilə. Nɔ̀nɔ̀ gə tú myɛ, sʼá pyɛ́nɛ́ á zhì kẽkẽ. Lwə̂lnə Yi twéé twéé, á wun bə̀kʼa gə yé. 13Á gə pwírí á da-byâ Kristə-lyì jàlà zhe á sɛ̃ɛ̃´ tum, sʼá sɛ̃ bɛ. Lò gə tú á sõ, sʼá zwẽ ń zhəəlé cɛ̀nɛ̀.
14Lwə̂lnə Yi bə̀ rə̀ cĩ́ bwəl byɛ̀bɛ́ bə̀ nʼê nwɛ̀nɛ̀ ába mɔ́ yó, sə rə̀ bə̀kʼa zhìlì bə̀ yò yé. 15Lyì byɛ̀bɛ́ bə̀ zhe wu-nyɔ̃̀, sʼá tó be á ce á wun yə̀ nyɛ̀n. Lyì byɛ̀bɛ́ bə̀ nʼê kúrhə́, sʼá tó be á kúrh. 16Cenə á nyí yə̀ rə̀dù, sʼá bə̀kʼá zhẽ̌ á cìn dɛ̃̌ yé. Lwəlnə á cìn tɛ̃´; á bə̀kʼá nyǐ á cìn ǹdə surhə cìnə́ ta yé.
17Lò gə wɛ̀rhɛ́ ába lwɛlɛ, sʼá bə̀kʼá càrh mɔ̀ lwɛlɛ yé. Cenə jàn nɛ́ á wɛ̀rhɛ́ kɔn dɛ́ dɛ̀bɛ́ rə̀ càn lyì bí gakó yírh w mó. 18Wɛ̀rhɛ́na á gə́ wɔ̌ nɛ́ á jòm ǹdə́ lyì bí gakó ǹdə́ yə̀-zùlə́. 19À dɔwabá nántwə̂rh, á bə̀kʼá pyà á jim cṹ yé. Yẽ̌nə bùrsí sə̀myɛ́ nɛ á ce Yi jɔ̃̀ wà. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Cinu wòwə̀: “Wɔ́ àmyɛ́ à bʼa kə́ lò gakó bùrsì a pɔ̃ còrhò-tum.” 20Bə̀ kɛ̃ rə̀ jàà dõ wẽ́ bə wɔ̀: “Nɔrh gə zhe ǹ zù-bal, sə́ pɔ̃ kùjú n jí. Nə̀nyɛ̀lsɛ̀ gə zhe mo, sə́ pɔ̃ nɛ̃̌ n nyɔ̀. Èta, kɔn nyɛ̌ ǹdə wɔ́ myìn-cala bárhɛ́ ǹ ló ń yó w ta.” 21Bə̀ká yẽ̌ ǹ cìn nì lwɛlɛ wɔ̀rhɔ́ wẽ́ yé. Wɛ̀rhɛ́ cɛ̀nɛ̀ ń mə́ cə̀r lwɛlɛ yé ne.
اکنون انتخاب شده:
Orɔm 12: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.