آیات محبوب کتاب مقدس از കൊലോസ്യക്കാറാര് 1

به اشتراک گذاشتن

ഇ്റ്‌ട്ട്‌ണ പാസെ ഇര്‌ക്ക പാവ സെയ്‌ര പെ്ളേപ്പിലിര്‌ന്ത് സാമി ണിമാണ ബ്‌ഡ്‌സി തനാക്ക് മെച്ച്‌പ്‌ഡിത്ത മഗാന്‌ദ് ണാഡ്‌ക്കെ ണിമാണ സേത്തി ബെത്തിര്‌ക്കാ്. അദ്‌താനെമല്ല ബെ്ള്‌സണ പാസെ ഇര്‌ക്ക സാമിക്ക് പട്ടവാര് പെ്ളേക്ക ണാഡിലി ണിമാക്ക് ബേ്ണ്ടി പേ്ണ്‌സി ബെത്തിര്‌ക്ക പങ്ക് കെ്ഡേക്ക്യ ബേ്ണ്ടി സാമി ണിമാണ തഗ്‌ദിര്‌ക്കവാര് ആക്കിനാ്. അദ്‌ണാലെ അപ്പനാന സാമിക്ക് ണിമ്മ ണണ്ണി സൊല്ലിരി.

എന്ത്‌ക്കെന്റ മേലോഗാത്തിലിമ്, ബൂലോഗാത്തിലിമ്, കാണ്യമുഡിരാദ്‌ണാമ്, കാണ്യമുഡ്യാത്താദ്‌ണാമ് അച്ചെ എല്ലാമെ അവാനാലെ സാമി ദ്‌ട്ടിസിനാ്. ഈ ഉലഗണ ആള്‌റ അദിഗാരഗണാമ് കാണ്യ മുഡ്യാത്ത ഉലഗണ ആള്‌റ അദിഗാരഗണാമ് അവാനാലെത്തെ ദ്‌ട്ടിസിനാദ്. അവാന്‌ക്ക് ബേ്ണ്ടിത്തെ ദ്‌ട്ടിസിനാദ്.

ഒന്റുണാമ് ദ്‌ട്ട്‌സാത്ത മുദാഗെ ഇര്‌ന്തവാ്ത്തെ ആണ്ടവാ്. ദ്‌ട്ടിസിര്‌ക്കാദ് എല്ലാമെ ആണ്ടവാനാലെത്തെ ഒന്റുക്ക് സേത്തി ബെത്തിര്‌ക്കാദ്.

ഇന്നാരമാട്ട്‌ക്ക്‌മ് ആര്‌ക്ക്‌മ് കാണ്യ മുഡ്യാത്ത സാമിദ് ഉരുവാത്തെ ക്‌റ്‌സ്‌ത്ത്. അദ്‌താനെമല്ല ദ്‌ട്ടിസി ബെത്തിര്‌ക്ക എല്ലാദ്‌ക്ക്‌മ് അവാ്ത്തെ തലെകോഡി മഗാ്.

അദ്‌ണാലെ ഈ കാര്യഗണ കേ്ട്ട ണാളിലിര്‌ന്ത് സാമി ആസെന പറ്റി തെര്യ റമ്പ അറുവുള്ളവാര് ആയ ബേ്ണ്ടിമ് ണിമ്മ് ണിഗാല്‌കുട്ടിക്ക് ബേ്ഡുമാന എല്ല അറുവുലിമ് ണിമ്മ മ്‌ഗ്‌ന്തവാര് ആയ ബേ്ണ്ടിമ് എമ്മ ഒപ്പ ണിമാക്ക് ബേ്ണ്ടി പരേസ്‌റേര്. അദല്ലാദെ താനെ സാമിന പറ്റി തെരിര അറുവിലി മ്‌ഗ്‌ന്തവാരായി സാമിക്ക് മെച്ച്‌പ്‌ഡിത്ത ദിന്‌സിലി ണല്ല കാര്യഗ സെയ്‌ദ് ക്‌റ്‌സ്‌ത്ത്‌ണ പാസെ ണല്ല ഗുണ ഉള്ളവാരായി പെ്ളേക്ക്യ ബേ്ണ്ടിമ് പരേസ്‌റേര്.