Flm 1
1
Tz'el yich scarta Pablo
1An Pablo in tic preso waji, yujto tzwa'ch in nab'en 'a Cristo Jesús. An yet' cu'tac Timoteo, tzwa't jun in carta tic 'aych Filemón. Chamc'ojlb'ilch cuj on̈, yujto quitb'eymec qui b'a 'a smunljel Dios. 2Tzwaln pax 'at 'a eb' creyente tzyam sb'a 'a yol atut. An̈jtona', tzwaln pax 'at 'a canb' Apia, [yujto chamc'ojlb'il cuj on̈] yet' pax 'a cu'tac Arquipo, yujto tzyac' 'ip 'a yic Dios quet'ec. 3Ya' cab' qui Mam Dios, yet' Cajlil Jesucristo swach'c'ojlal yet' sjunc'ojlal 'ayx ta'.
A schamc'ojlal Filemón
4Caw tzwa'n̈j yuj diosal 'a Dios o'oj, yic tzin leslwi, 5yujto tzwab' 'a tic, to caw tza'ch a c'ojl 'a Cajlil Jesús. 'Ay ab' a chamc'ojlal 'a 'a, yet' 'a eb' yic xo Dios smasnil. 6'Ay eb' tzya'ch sc'ojl 'a Cristo o'oj, yujto tza'ch a c'ojl 'a 'a. Tzin c'an 'a Dios, sec 'oj wach' nachjoc 'el yuj eb', to a Cristo Jesús, a tz'a'n smasnil tas wach' 'ayn̈ec. 7Caw tzin tzalj o'oj, yujto 'ay ab' a chamc'ojlal ta'. O'oj caw tzjaw sniwnal in c'ojl 'a tic, yujto ach tic wu'tac, caw tzac' stzaljc'ojlal eb' creyente ta'.
Tewnac Pablo yuj Onésimo
8An tic schecb' in Cristo. Yuj cha, 'ay waln wic waln 'at 'ayach, tas yowlal tza b'o ta'. 9Palta man̈toc tzach wac' mandar. Ton̈j tzin tew 'ayach, sec 'oj checljoc a chamc'ojlal. Yujto an Pablo in tic, 'ichm in xo. A ticnec, preso waji, yujto tzwa'ch in nab'en 'a Cristo Jesús. 10Tic tzin tew 'aych yuj Onésimo.#Flm 10-11 Onésimo, tzyal 'el'chi: "Caw 'ay yopiso." 'Icha to wunnal x'aji, yujto schaj Cristo wuj 'a yol preso tic.
11A 'a yic yalan̈, may jac yopiso 'ayach, yic ya'n ach servil. Al ticnec, caw 'ay yopiso 'ayach, yet' 'ayin. 12Yuj cha, tic tzin checb't pax 'ayach. Caw tza chaj sc'ochi. 'Icha to an tzin c'ochi, 'ixta tzotj a chan sc'och ta'. 13Xcob' in nib'c can wet' 'a tic, yic tzin ya'n servil. Toto 'ixta', 'icha to ach tzin wul ac' servil 'a yol preso tic. An tic, preso waji, yujn̈ej to tzwal-l wach' 'ab'x yic colnb'il. 14Palta matz in nib'j tzin b'ab'l b'oj in trato yet'oc, masnto tzwab' 'ayach. Yujto tzin nib'ej tzach colwj 'ayn yet'oc, man̈toc tzach 'ajx pural. 15Yel toni, x'at 'elc 'aych jun tiempoal. Palta lemb'il 'ixta x'aji, sec 'oj 'ajxoc pax 'aych 'a jun 'ejmn̈ej. 16Man̈x mosoocn̈ej yaj win 'aych ticnec. Yel xo niwn yopiso ticnec, yujto cu'tac xo, caw chamc'ojlb'il wu'uj. Ach xo, yel xo wal caw tza chamc'ojlej, yic 'oj c'och win 'ayach. Man̈ yujocn̈ej to quit 'anma'il tza chamc'ojlani, palta yujto yic xo Cajlil quet'oc.
17Toto tza na wet'oc, to qui wach'c'ojl qui b'a, caw tza chaj sc'och ta'. 'Icha to an tzin c'ochi, 'ixta tzotj a chan sc'och ta'. 18Lemb'il 'ay sb'oc 'ayach, mto 'ay junc xo smul x'och 'ayach. Toto 'ay, tza'cn 'a in cuenta. 19An Pablo in tic, 'oj wac' sb'oc chi 'ayach. Yuj cha, yaj in b'i, tic tzin tz'ib'j 'at 'aych ta'. 'In ojc xoni, 'icha to 'ay a b'oc 'ayin, yujto xa chaj Cristo wu'uj. 20Yuj chi wu'tac, colwjan̈ 'ayin, yujto creyente on̈ 'a Cajlil, sec tzac' in tzaljc'ojlal yuj Cristo.
21Tic tzwalb't jun tzo'n̈ tic 'ayach, yujto caw yiclum tzotj a b'a. Wojtac, jantcn̈ej tas tzwalb't 'ayach, 'oj a b'o'. Palta 'oj a wach' b'oc jun tzo'n̈ xo. 22Yet' pax junx tic tzwalb't 'ayach, tzac' lista jac in posada ta'. Toq'ue 'oj 'el 'a sc'ojl Dios 'oj in ya't 'ayx ta', 'icha tzeyutj e leslwi.
Tz'ajx 'at stzatzl sc'ojl Filemón
23A cu'tac Epafras tic tzya't stzatzl a c'ojol. 'Ay 'oxt 'a preso tic wet'oc, yujto tzya'ch pax snab'en 'a Cristo Jesús. 24Ax eb' tzmunlj wet' 'a tic, atn Marcos, Aristarco, Demas, yet' Lucas, tic tzya't pax eb' stzatzl a c'ojl jun xo.
25Ya' cab' Cajlil Jesucristo swach'c'ojlal 'ayx ta'. [Ya' cab'i'.]
Currently Selected:
Flm 1: CSS
Tõsta esile
Jaga
Compare
Kopeeri
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.