1 P 3
3
Checnb'il 'a eb' 'istlab'il*r* yet' 'a eb' 'ichmilab'il
1Ax 'istlab'il ex, caw yiclum tzeyutj e b'a 'a eyichmil. Yujto 'ayx matz ya'ch eyichmil sc'ojl 'a spaxti Dios. Wach'xam may tas 'oj eyal 'a eb', palta tecn 'oj montchjoc 'och eb' eyu'uj. 2Yujto 'oj yil eb', caw tojl tzeyutj e b'eyb'al, caw 'ay yel'ch Dios 'a e sat. 3'Ay cab' e wach'il, palta man̈oc chajtl eyilx tzwala. Man̈ eya'ch e nab'en 'a chajtl tzeyutj e ch'umn e jolom. Man̈ eya'ch e nab'en 'a jun tzo'n̈ q'uen oro tzeya'chi, yet' 'a jun tzo'n̈ pichl chan̈ stojol, man̈oc yet' jun tzo'n̈ chi tze say wach'il. 4Palta a wal e nab'en, a tze chamc'ojlej e b'oni, sec wach' yilx 'a sat Dios. A swach'l cha, may b'a'n̈ tzjuwi. Toto wach' yaj e nab'en, toto 'emmquil yaji, atn chi caw wach' yilx 'a sat Dios, caw niwn yel'ch 'a 'a. 5A 'a pecti', 'ay jun tzo'n̈ eb' 'ix 'ix yic Dios yaji. Caw wach' yilx snab'en eb' 'a sat Dios, yujto an̈j wal ya'jnac 'och eb' yipc sc'ojol. Yiclum pax yutjnac sb'a eb' 'a yichmil. 6'Ixta yutjnac sb'a 'ix Sara. Caw yiclum yutjnac sb'a 'ix 'a Abraham. 'In yaljnac 'ix 'ixtic: Wajlil ach,#1 Pe 3.6 "Wajlil ach", xchi 'ix Sara 'a Abraham, xchi Pedro. A ticnec, man̈ 'ixta'oc spaxtin eb' 'anma 'a qui tiempoal tic, palta "ach witb'eyum", xchi eb'. xchi 'ix 'a winac. Yuj cha, toto wach' tzeyutj e b'a jun xo, may junc tas 'aj tzex xiw jab'oc. Toto 'ixta', lajn e nab'en yet' Sara cha.
7Ax xo ex 'ichmilab'il, caw wach' tzeyutj e nab'en 'a eyistzil. Nachj cab' 'el eyu'uj, to lajn eb' 'icha junc chen c'un spoji. 'Ay cab' yel'ch eb' 'a e sat, yujto junn̈j e q'uinl xe chaj yet' eb' yuj swach'c'ojlal Dios. 'Ixta tzeyutj e b'a 'a eb', sec ma'oj juwc e lesl yet' eb'.
'Ay 'aj tzcab'c syal*r* yuj qui wach' b'eyb'al
8An̈jtona', tzwaln pax 'at junx tic 'ayex. Caw junxn̈ej tzlaj eyutc e nab'en e masnil. Toto 'ay eb' tzcusi, tzex colwj 'a eb'. Tzlaj e chamc'ojloc e b'a, yujto creyente ex. Tzlaj 'o'ch e c'ojl 'ayx junjn ex. 'Emmquil tzeyutj e b'a junjn ex. 9Toto 'ay eb' tu tzyutj sb'a 'ayex, man̈ tuc tzeyutj e b'a 'a eb' jun xo. Toto 'ay eb' tzex b'uchni, man̈ ex b'uchwjoc pax 'a eb'. Ton̈j tze c'an swach'c'ojlal Dios 'a yib'n̈ eb'. Yujto a Dios on̈ 'awtnec 'och yico'oc, yic tzya'n swach'c'ojlal 'ayn̈ec. 10Yujto 'ixtc tzyal 'a Ch'an̈ U'un̈:
Toto tze nib'j tznajtxb'i e q'uinal, mto tze nib'j tzaljc'ojlal tz'aj yec' junjn c'u eyu'uj, 'actjec can eyaln jun tzo'n̈ tu paxti'al, may cab' b'a'n̈ tzeyac' 'es.
11'Ijec 'el e b'a 'a scal tu'al, ax tas wach' a tze b'o'o; a cab' junc'ojlal tze sayq'ui, tze b'eylb'ani.
12A Jehová a tztan̈wni eb' 'anma wach' sb'eyb'al, tzmaclni pax yab' tas tzyal eb', yic tzyaln sb'a eb' 'a 'a, palta 'ay cot yowl sc'ojl 'a yib'n̈ eb' tzb'on maysch'olnil, xchi 'a Ch'an̈.
13Toto cojn jun wach' b'eyb'al tzqui b'eylb'ejec, ¿mach junc 'oj stac' on̈ sjunec 'eli? 14Palta toto tzcab'c syal yuj qui wach' b'eyb'al, caw wach' quiquec. Yuj cha, man̈ ex xiw 'a junc mach. Man̈ eyac' somchjc 'el e nab'en. 15Ca'c 'och wal Cristo Cajliloc. Qui nac si'mb'il, chajtlto caw niwn yel'chi. Lista cab' tzcutjec qui b'a caln 'a machtc eb' tzc'anb'n 'ayn̈ec, tas yuj tzca'c 'och Cristo yipc qui c'ojol. Wach' cab' tzcutjec caln 'a eb'. 'Emmquilal tzcutjec caln 'a eb'. 16'Ay eb' tzon̈ b'uchn yuj qui wach' b'eyb'al, yujto 'aych qui nab'enec 'a Cristo. Palta caw ca'c cuenta qui b'a yet' qui nab'en, sec wach' a yic tzon̈ sb'uchnec eb', mun 'oj q'uixwc 'el eb'.
17Yel xo wach' tzcab'c syal yuj qui wach' b'eyb'al, toto 'ixta tz'el 'a sc'ojl Dios. Ax toto yuj qui tu b'eyb'al, tzcab'n syail, caw nab'an̈ej.
18Yujto a Cristo x'ab'n syail. Cojn jun 'ejm xcham yuj qui mulec. A Cristo caw tojl snab'en. An̈ec xo tic, caw man̈ tojloc qui nab'enec, palta a xyab' syal cujec, yic tzon̈ yi'nec 'at 'a Dios. A yet' sniwnal xchami, palta ax yic 'ix pitzw paxi, pitznn̈ej yespíritu yet'oc. 19A yespíritu cha, a xit' alnc spaxti Dios 'a spixn eb' preso xo yaji. 20A eb' cha, man̈ yiclumoc yutjnac sb'a eb' 'a Dios, yictax yec' eb' 'a pecti', 'a yic 'ayc' Noé. A 'a jun tiempoal cha, niwn yutjnac Dios sc'ojl 'a eb', yic stan̈wni sb'o jun niwquil barco. A 'a te barco cha, 'ay jaywn̈ eb' colchjnac can 'el 'a te'. Wajxcwan̈ wal eb' colchjnac. 21A jun a cha, ch'oxnb'il yaji. Yujto a jun a yic bautismo, tzon̈ colchjec yuj ticnec. A jun bautismo tic, man̈ yopisooc yi'n 'el slumal qui niwnal. Palta yu'uj, tzqui c'annec 'a Dios to tzwach' b'o qui nab'en. Tzon̈ colchjec, yujto pitzwnac pax Jesucristo, 22paxnc q'ue 'a satcha'an̈. Ata 'ayc' 'a swach' c'ab' Dios ticnec. A tz'a'n mandar eb' ángel, yet' jun tzo'n̈ xo 'ay yopiso to 'ay spoder.
Currently Selected:
1 P 3: CSS
Tõsta esile
Jaga
Compare
Kopeeri
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.