Aromayi 6
6
Fyífyíyi dna n leifyizhni jesnu wyewyeyi dna n Kirisiti
1To, nsaiye, yi ɓa da dəye nge nanu a? Yi ɓa gwodu n aleifyizhnii nu nabai Shekwoyi shebmyashi kwa gna mwamwa a? 2Kwo fyewyi! Əyi ń yi ɓə kwu fyí fyi n leifyizhni; kwo ɓa yezhni n wuna ya gwodu dna n anyìgyi leifyizhni nya a? 3Kwo fye ta kpəlo nge əyi vnyanya ń a ɓə zhni yi batizima fyi ń Kirisiti Yeisu nyi, nge a ɓə zhni yi batizima fyi n əwo əfyí nu m? 4Ntucenu, a ɓə kwu yi kwnubyi n woi dna ń batizima lo əfyí, nabai n ɓwasnu ngye she a ɓə lá Kirisiti kala ń əfyí dna ń latu Dada nya nyi, əyihni ce ń yi ɓa myi ya gyianyì wyewyeyi woiwoyi nya.
5Ntuge ngye a ɓə la yi kwnuyeɓədo n woi dna n əwo əfyí nlai, ɓəhnihnii a ɓə la yi kwnuyeɓədo n woi dna ń əwo kala la. 6Ntuge yi kpəlo nge a ɓə la əyi əza kwokwoi kwnu znudu n woi, nabai ń a ɓaa nayi leifyizhni nya əɓo duya, ntuge to ya kwu je leifyi afyenu zhni m; 7ntuge zahozahoyi ń wo la fyí, a la wo gnyi n leifyi.
8Nsaiye ngye yi ɓə kwu kwnu fyí n Kirisitii, yi n gaiciyagai lo nge yi ɓə kwnu anyìgyi n woi. 9Ntuge yi kpəlo nge shi a ɓə lá Kirisiti kala ń əfyí nyi, wo taa je fyí m; əfyí to yee n kalái lo tu ń əwo tukwo m. 10Əfyí ń wo ɓə fyí nyi, wo ɓə fyí leifyi əfyí nu znugbmanyi ntu aza vnyanya ɓo; ama anyìgyi ń wo gyi nsaiye nyi, wo gyianyì ga Shekwoyi nu.
11N ɓwajesnu n zokwo ye, fye gye əfyehni n zhni afyífyiyi ń aleifyizhni, ama awyewyeyida ń Shekwoyi, fyi ń Kirisiti Yeisu. 12Ntucenu fye to ye leifyi, nge kwo gyibe, fyi ń əfye anayi n ɓa fyí nyi m, nabai fya vyi əkwo aɓəpwawo nukwoi m. 13Fye to ga aleifyi əfye nayi əga dəhodəhoi kwaa zè əkpí tnutnuzhninya m, fye zezè fya kwu əfyehni ga fyi ń Shekwoyi akwnu nu, ngye aza yi ń a la ɓa kwnuɓe ncei ń əfyí, ɓe wyewyeyi aba; jesnu fya ga wo əfyehni anayi aga ngye ɓəfyece atnutnunya. 14Ntuge leifyi to ɓə yee gwodu kwo yee zhni əfye Dagayi m, ntuge fye to fyi ń owa snuta nu m, ama fyi ń Shekwoyi shebmyashi.
Afyenu lo aɓəfyecezhni
15To, yi zhni n wunanu a? Yi zhni aleifyi nu ntuge yi to fyi n owa snuta nu m, ama fyi ń shebmyashi? Kwo fyewyi! 16Fye ta kpəlo nge əsa ń fya ga əfyehni fyi ń əza akwnu, fyaa vyi əwo gbetu ngye afyenu, fye zhni əza yi afyenu nu, ń fye vyi wo gbetu nyi m; kwo fye kwu zhni leifyi afyenu nu, n kwo lo n azai ń əfyí nyi, kwo afyenu ɓəgbetuvyi nya n kwo lofyi n azai ń ɓəfyecezhni nyi m? 17Ama yi sa Shekwoyi ami lo nge, kwo shikwonyi fye ɓə zhni afyenu nu fyi ń aleifyizhni, fye ɓə kwu vyi gbetu əfye nyawu nya n əfye adui vnyanya, n fye zhi fyei shi kwo əɓwa nyi. 18A la fye gnyi ń leifyi jesnu fye kwu zè afyenu ɓəfyecezhni nya.
19Mi da dəye dna ń zanyikwoci awyega nu, ntu əfye akalágba ɓo fyi ń əfyehni nayi. N ɓwasnu ngye she fye ɓəə zhni fyei ga əfye anayi ngye afyenu aɓoajegbmi nya nyi, jesnu fyi ń əkpízhni gna-abye-lolo nya, ntulonu nsaiye fye kwu əfyehni ga fyi ń fyenu ɓəfyecezhni nya kwa ɓe n gyigyii. 20Əsa ń fye ɓə zhni afyenu leifyi nya nyi, fye ɓə kwnukwnuiya n ɓəfyecezhni akwnu. 21Knyi gyibai nu ń fye ɓə ɓwa nsayi, n aɓo, n ɓa wo fye vnyinkwo lo nsaiye nyi a? Aɓo yi pya zo n əfyíi nu! 22Ama nsaiye, ń a la fye loya n aleifyi jesnu fye nyi kwu zè Shekwoyi afyenu, gyiba n fye ɓwa, kwo lo n fyei n gyigyi nu, jesnu əɓo n kwo gbmiɓe əkwo nu zhni wyewyeyi nyalonyalo nya. 23Ntuge leifyitnutnu tagba nya zhni əfyí nu, ama Shekwoyi nyaga zhni wyewyeyi nyalonyalo nya nu, dna ń Kirisiti Yeisu əyi Dagayi.
Praegu valitud:
Aromayi 6: GNB
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.