Ütararea̧ Ma̧ȩ 13
13
Moiche judi chjadürëremȩdejȩrȩ goadi tai̧ji̧ri̧ pio ji̧ri̧, Canaa̧ quȩmȩ chiri oa goadi ütarë dae tai̧ji̧ri̧ pio ji̧ri̧
1Ado Jevoa judi yo̧rëremȩdejȩ Moiche ju̧i̧:
2"Danȩ, pumȩ ji̧ri̧ mitëtä earequedemȩ Canaa̧ quȩmȩ chiri oa goadi ütarë dae tai̧pea̧ oa. Pio jiro chiri oa yürüparequedejȩrȩ icharaita ji̧ri̧. Pio ju̧i̧iä 12 oari oa mitëtä earequedemȩ, tjamo̧ cjo̧ro̧ji̧ri̧ maea oa. Danȩ, Icharai pio judiri ja̧ buba judiro̧, jabechji̧ 12dirȩ. Ado pio ji̧ri̧ ja̧ tjamo̧ cjo̧ro̧ji̧ri̧ pio ji̧ri̧ mitëtä earequedemȩ chjadüpea̧ oa.” Ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧iäpȩmo̧ Ütë tjamo̧ judi.
3Ado Ütë tjamo̧ judi yo̧a̧mi̧ japarëremȩde Moiche judi. Tjamo̧ cjo̧ro̧ji̧ri̧ pio ji̧ri̧ mitërëremȩdejȩrȩ 12 oa. Ado chjadürëremȩdejȩrȩ goadi tai̧pea̧ oa. Aja̧, jënȩro̧ cjo̧ro̧mȩ chiriri pio judiri, Para̧ quȩmȩ chiri maeari pio judiri chjadürëremȩdejȩrȩ.
17Ado Moiche judi pio jiro oari ji̧ri̧ chjadürërea̧ ji̧ ja̧di ta̧rëri̧ yo̧mȩrȩ yo̧rëremȩdejȩrȩ:
—Danȩrȩ, Canaa̧räpȩ jächji̧vä —yo̧a̧dejȩrȩ—. Negebo quȩmȩ chiri tjamo̧i̧ jächji̧vä. Ado Negebo quȩmȩ chiri maearäpȩ chjätä ëte, jabechji̧ jächji̧vä ya̧mi̧ chiamȩ chiriräpȩmo̧. 18Ado chjadëri̧ ütarariä tai̧chji̧vä. ¿Yö̧ta da cjiade chiri üdë? Ado ju̧ri̧pȩ cjo̧ro̧ji̧ri̧ judiro̧, ¿napai̧ ji̧ra̧ri̧ cjo̧ro̧dirȩ? ¿Oëadëji̧ri̧mi̧ dari̧ cjo̧ro̧dirȩ, jabo oëadëji̧ri̧mi̧ dari̧ cjo̧ro̧dë? ¿Uapai̧ dari̧ cjo̧ro̧dirȩ jabo uapai̧ da tjamo̧dëdirȩ? Pio ju̧i̧ chjadëri̧ ütarariä tai̧tä earequededibe —yo̧a̧dejȩrȩ—. 19Ado chiri üdë ¿chjadëde, jabo chjadëdëde? ¿Jurarea̧ ji̧ra̧ri̧ yürümȩde, jabo ji̧ra̧ri̧ yürüdëmȩde? Pio ju̧i̧bo ütarapea̧de. Ado ju̧ri̧pȩ cjo̧ro̧ji̧ri̧ judiro̧, ¿yö̧ta dari̧ cjo̧ro̧dirȩ? ¿Ji̧mo̧ cjo̧ro̧dirȩ jabo chjuchjuti̧mi̧ cjo̧ro̧? ¿Chjadë maearä cjo̧ro̧dirȩ acji tai̧rea̧mi̧ dari̧, jabo tutia̧rä cjo̧ro̧dirȩ acji jädärärea̧mi̧dëri̧? Pio ju̧i̧bo ütarariä dae tai̧pea̧de. 20Ado chiri pio ju̧i̧ chjiaribo ütarariä tai̧tä earequededibe peaja̧di. Danȩrȩ, ¿chiri üdë dabu chjadë oa chiadëde? ¿Tjado chjacjiamȩ tjamo̧ oa goadirȩ, jabo chjadëdë goadirȩ? Dabu üdë gägäari̧ cjitërea̧mi̧ dari̧ yürümȩde, jabo chjadëri̧ yürüdëmȩde? ¿Chiri üdë chiri maeade, jabo gä ji̧ra̧de? ¿Yö̧ta dari̧ cjiade chiri üdë? Pio ju̧i̧bo ütarariä tai̧tä earequededibe chjadëri̧. Ado ja̧dëa ji̧ mȩnȩro̧ ma̧na̧rä, jabechji̧ ara ma̧na̧chji̧ibe jurarea̧ oa, a̧ro̧rȩ ütarë dapea̧ oa, a̧ro̧rȩ jurë tarapea̧ oa. Aja̧, goë jaechji̧vä ado ja̧di. Pio ju̧i̧mo̧i̧ yo̧requededibe. Uapadëji̧ri̧rȩ jächji̧vä —yo̧mȩrȩ yo̧rëremȩdejȩrȩ Moiche judi Canaa̧ quȩmȩräpȩ jäpaji̧ri̧ pio ji̧ri̧iäpȩmo̧, tjamo̧ cjo̧ro̧ji̧ri̧ pio ji̧ri̧.
Ado Moiche judi pio jiro oari ji̧ri̧ chjadürërea̧ ji̧, jabechji̧ uva mitërea̧ gupënȩrëremȩde. Ado pio ju̧i̧iä “ara ma̧nȩ yürüchjiibe” yo̧rëremȩdejȩrȩ Moiche judi, uva joechjape järea̧ gupënȩ tara.
21Pio ju̧i̧iä järëreji̧ri̧dirȩ oari judiro̧. Ado chiri oa ütarariä tai̧rëreji̧ri̧diro̧jo̧ȩ. Chi̧ quȩmȩ chiri maearäpȩ tarupaji̧ri̧rȩ järëreji̧ri̧dirȩ jachi oa, Dejobo quȩmȩ bë ma̧ri̧räpȩ yuro, Amata quȩmȩ queri̧räpȩ ju̧ri̧. 22Jibëa̧ queri̧räpȩ a̧rȩmȩ chiriräpȩ taruparëreji̧ri̧dirȩ Negebo quȩmȩ chiri maearäpȩ. Pio ju̧i̧ ütarariä tai̧rëreji̧ri̧diro̧jo̧ȩ Ebero̧ quȩmȩ bë ma̧ri̧räpȩ yuro. Ado ju̧ri̧pȩ cjo̧ro̧rëreji̧ri̧dirȩ Anaca pio judiri ja̧ji̧ri̧ judiro̧. Amana quȩmȩ judi, Chechai quȩmȩ judi, ado Tamai quȩmȩ judi pio ju̧ri̧pȩ cjo̧ro̧rëreji̧ri̧dirȩ. Ado judiro̧ cjo̧ro̧mȩ bë ma̧ri̧ üdë, Ebero̧ quȩmȩ bë ma̧ri̧ üdë, 7 ui goarëremȩde Choano̧ quȩmȩ bë ma̧ri̧ oa pearä cji̧därërea̧ ji̧. Ado Choano̧ quȩmȩ bë ma̧ri̧ üdë, jabechji̧ Ejitoräpȩde. 23Ado ji̧dë u̧i̧ tai̧ji̧ri̧rȩ Eco quȩmȩ chiriräpȩ go̧düdärärëreji̧ri̧dirȩ ya̧mi̧ chjarerä a̧rȩmȩ chiriräpȩ. Ado ju̧ri̧pȩ cja̧rȩmȩ ichi oa budoa̧diro̧jo̧ȩ uva jurarea̧ oa ara baäpea̧ oa. Jabo uva ji̧ra̧ tjamo̧ oaiä, chacha tjamo̧ oaiä, jabechji̧ cja̧rȩmȩrȩ ara baärea̧mi̧dërëremȩde. Pio ju̧i̧iä yo̧a̧ri̧rȩ tjo cji̧de ara baärëreji̧ri̧diro̧jo̧ȩ. Ado igo quȩmȩ jurarea̧ oa, garanada quȩmȩ jurarea̧ oa peaja̧di ara baärëreji̧ri̧diro̧jo̧ȩ.
25-26Ado 40 do nö̧ta chiri oa chjadëri̧ ütarë da ëte, ado chjereno̧ baärëreji̧ri̧dirȩ Caderäpȩ, Para̧ quȩmȩ chiri maearäpȩ. Ju̧ri̧pȩrëremȩde Moiche judi, Aro̧ judi, ado icharaita ütëborë. Ado judiro̧ go̧düdärä ëte, na̧rȩrëreji̧ri̧diro̧jȩrȩ jënȩro̧ ara ma̧na̧ jurarea̧ pio ju̧i̧. Ado ja̧dëa ji̧ chjö̧na̧i̧ oa ni̧bä chjaoa̧diro̧jȩrȩ. Aja̧, jënȩro̧ daea̧ pio ju̧i̧ ni̧bä chjaorëreji̧ri̧diro̧jȩrȩ. 27Ado ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jo̧ȩ Moiche ju̧i̧:
—Mȩnȩ chjadüa̧ oa chiri oa chjadëri̧ ütarë dariä taia̧rea̧ro̧jo̧ȩ —yo̧a̧diro̧jo̧ȩ—. Ado danȩ, chiri chjadë tjamo̧de. Jabëdiärea̧ decjiade. Jurarea̧ ji̧ra̧ri̧ yürümȩ chiride. Goae tarari̧ cjitëde jurarea̧ üdë, ponȩa̧ üdë. Ado danȩ, pio yoaje goa ma̧na̧rea̧ro̧mȩ uva jurarea̧ oa, boi̧dë oa. Tjamo̧ davä. Chiri chjadë tjamo̧de. 28Jabo ju̧ri̧pȩ cjo̧ro̧ji̧ri̧ judiro̧, ji̧ra̧ tjamo̧dirȩ —yo̧a̧diro̧jo̧ȩ—. Acji tai̧rea̧ chiadirȩ. Bë ma̧ri̧rä cjo̧ro̧dirȩ. Ma̧i̧ da tutia̧rä cjo̧ro̧dirȩ a̧ro̧rȩ ji̧ri̧iäpȩmo̧ acji järea̧mi̧dëri̧. Ado Anaca pio judiri ja̧ji̧ri̧ pio ji̧ri̧bo daea̧rea̧ro̧jȩrȩ ji̧dëri̧. Pumȩ bori̧dë tjamo̧dirȩ. Ütë tjamo̧dirȩ, a̧ro̧rȩmi̧dë. 29Ado Negebo quȩmȩ chiriräpȩ ju̧ri̧ cjo̧ro̧dirȩ amarechita judiro̧. Ado ya̧mi̧ chiamȩ chiriräpȩ ju̧ri̧ cjo̧ro̧dirȩ itita judiro̧, jebucheo judiro̧, ado amoreo judiro̧. Ado ui ana̧ yuroräpȩ ju̧ri̧ cjo̧ro̧dirȩ cananeo judiro̧. Bea Joroda̧ yuroro cjo̧ro̧dirȩ peaja̧di. Pio ju̧i̧iä chiri oa boadärärea̧mi̧dëde —yo̧ji̧ri̧rȩ yo̧rëreji̧ri̧diro̧jo̧ȩ Moiche ju̧i̧iäpȩmo̧.
30Pio ju̧i̧ ta̧rëa̧ oaiä icharaita judiro̧ goaedëti̧ri̧ yo̧ji̧ri̧pea̧diro̧jo̧ȩ Moiche pio ju̧i̧iäpȩmo̧, chiri uapai̧ daräpȩ baädëri̧ cjiaji̧ri̧rȩ. Jabo cja̧rȩmȩrȩ, Care pio judi cjapi tänȩa̧dejȩrȩ. Ado yo̧a̧dejȩrȩ:
—Jabechji̧, goae tarari̧ acji jätäreji̧ri̧rea̧ro̧jȩrȩ. Ju chiarea̧rȩ. Goae tarari̧ acji järea̧ chiarea̧rȩ. Pio jiro pumȩ ji̧ri̧ boadärärea̧ chiarea̧rȩ. Jaeibe —yo̧tea̧dejȩrȩ.
31Jabo Care pio ju̧i̧ nö̧ta jäa̧ji̧ri̧ judiro̧, 10rë cjae yo̧a̧dirȩ:
—Jabo cjäri̧ marea̧rȩ. Pio jiro pumȩ ji̧ri̧ acji järea̧mi̧dërea̧rȩ. Ibë u̧i̧ ju chiadirȩ. Nö̧tadërea̧ro̧jȩrȩ. Pio ji̧ri̧ boadärärea̧mi̧dërea̧rȩ —yo̧a̧dirȩ.
32Ado ja̧di ta̧rëri̧ yo̧ ëte ma̧ȩ chjádë oa yürüji̧ri̧pea̧diro̧jȩrȩ icharaita pio ji̧ri̧iäpȩmo̧, jënȩro̧ ütarë daea̧ chiri pio ju̧i̧ chjiari. Tjamo̧i̧ cjiari̧ yo̧tärea̧ ji̧, coëma cjiari̧ yo̧tärea̧ ji̧, cjäri̧ madiro̧jȩrȩ, oëra̧ yo̧a̧diro̧jȩrȩ. Ma̧ȩ chjádë yürüa̧diro̧jȩrȩ. Ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jȩrȩ:
—Danȩrȩ, pio jiro chiri üdë chjadëdëde. Pio ju̧ri̧pȩ cjo̧ro̧ji̧ri̧ judiro̧ ta̧mȩcho̧ ja̧boji̧ri̧rȩ cjo̧ro̧dirȩ jurarea̧ nö̧tadë oaiä —yo̧a̧diro̧jȩrȩ—. Jabechji̧ pio jiro chiri üdë chjadëri̧ yürüdëde jurarea̧ oa. Jurarea̧ üdë nö̧tadëde. Ado ju̧ri̧pȩ cjo̧ro̧ji̧ri̧ judiro̧ pumȩ bori̧dë tjamo̧ maeadirȩ ji̧dëri̧. Pumȩ ütëdirȩ. 33Ado Anaca pio judiri ja̧ji̧ri̧ pio ji̧ri̧bo daea̧rea̧ro̧jȩrȩ. Peaja̧di ma̧i̧ da ütëdirȩ. Jabechji̧ tagarami̧ dari̧ cjiadiäa̧rea̧rȩ a̧ro̧rȩ pumȩ ju choco ma tara. Ado judiro̧ ibë daea̧ ji̧, peaja̧di tagarami̧ daji̧ri̧ maea oa daea̧ jirodiro̧ibe —yo̧ji̧ri̧rȩ ma̧ȩ chjádë yürü marëreji̧ri̧diro̧jȩrȩ icharaita pio ji̧ri̧iäpȩmo̧ Canaa̧räpȩ jäa̧ji̧ri̧ judiro̧ orë.
Currently Selected:
Ütararea̧ Ma̧ȩ 13: Pume
Tõsta esile
Kopeeri
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved