Esita 2
2
Esita yoola ohuba omuhasi w'omutuki
1Luunyuma, etima ly'omutuki Ahasuera nilyali nilimalire ohuwa, yemeeda ohubasaanga hu siindu si Fasiti yali n'aholere hu esilagiro si yali n'atusire. 2Mani abaandi hu bakeraki bae, abali aambi nae nibaboola bati, “Ewe ow'oluyaali, leha bahukoonyere abahaana baraaga ababoneha bulai haandi abasisiiri ohumanya eby'abasaacha. 3Tuma abaami bomu bituundu eby'obwaami bwao byoosi, babuusire abahaana balai boosi haandi abasisiiri ohumanyaho eby'abasaacha, mu nyuumba yao ey'abahasi eyiri mu siko sihoongo sya Susa. Bate mu bunyala bwa Hegai, omulooye oliindaanga abahasi bao, mani bamutereese bulai muno mu siiso. 4Mani omale wedooleremo omuhaana yooba n'ohiramo ohudaha mu boosi omuhole ababe omuhasi w'omutuki akobole mu makulu ka Fasiti.”
Omutuki yasiima engeraka eyo mani n'ahola atyo.
5Mu siko sihoongo sya Susa, mwalimo Omuyudaaya olaangwa ati Modekai, omwaana wa Yairi, omwichuhulu wa Simei neende Kisi, ow'enono ya Bbenjamini. 6#2 Abat 24:10-16; 2 Biha 36:10.Modekai yali mulala hu baandu abanyakibwa ohutula Yerusalemu, koti lu Omutuki Nebukadineesa owa Bbabbilooni lu koti yayiingira mani yaamba Yekonia, omutuki wa Buyudaaya. 7Modekai yali neende Esita, omwaana wa mwaanang'ina. Eliita lyae mu Luibburania lyali Hadaasa. Esita yali omuhaana ow'esiiso silai muno, haandi niyeyoombaha omubiri. Abeebusi bae nibafwa, Modekai yamubukula mani n'amuyira koti omwaana wae mweene.
8Omutuki Ahasuera n'amalire ohutusa esilagiro sino, baleeta abahaana baangi muno mu siko sihuluundu Susa. Mu abo nimwo omwaali Esita. Esita yesi yayirwa mu dooho, yaadiiswa mu mahono ka Hegai owali mu bunyala bw'ohuliinda abahasi. Esita yasangaasa Hegai muno, mani Hegai n'amudiira bulai muno neende esisa. 9Hegai yachaakiranamo ohutekeha Esita abonehe bulai mu siiso, mani n'amubaha amafuta haandi n'amuberesa ebyohulya bilai muno. Yamuberesa abuundu ahiramo obulai mu nyuumba ya bahasi, haandi nibamuberesa abahaana bataanu-na-babiri abadoolerwe ohutula mu dooho ly'omutuki ohumuhalaabanira.
10Bulaanu, Modekai yali n'akerakiire Esita ahaye ohutuumbula enono yae haandi ati Muyudaaya niye. 11Buli ludaalo, Modekai yabitabitaanga mu moni w'olwaanyi lu bahasi baliindirwamo anyale ohumanya ebidiira hu mwaana wae Esita.
12Ohunyiriswa hwa buli muhaana hwayiraanga embaka y'omwaaka mulaamba; koti elako hu bahasi lyali liti emyoosi kisaasaba n'abahaangwa amafuta ka miira, haandi emyoosi kisaasaba kiindi n'abahaangwa amafuta ka Bbalisaamu. Luunyuma lw'ebyo, buli muhasi yayirwaanga mu nyuumba y'Omutuki Ahasuera. 13Buli muhasi watulaanga mu liindiro omwo n'achia eyiri edooho ly'omutuki, yabereswaanga buli siindu syoosi sy'aba n'adahire ohuchia nasyo. 14Yayirwaanga ew'omutuki engoloobe, haandi nibuhyeere echuli, yatuswaangayo mani ayirwa mu liindiro ly'abahasi b'erwaanyi liindi elyali niliriindwa neende Sasigaasi omulooye. Omuhaana haba siyafukiirirwaanga ohukobola eyiri omutuki ehabi liindi daawe, ohutusaho omutuki n'amweekoombere muno haandi n'amulaanga neende eliita lyae.
15Esiha syoola esya Esita ohuchia eyiri omutuki. Esita yali omuhaana wa Abbihaili, laatang'ene muyere yali Modekai, owali yamubukula mani yaamuhusa koti omwaana wae mweene. Esita yali niyekoombwa neende buli muundu yeesi owamubbyaangaho emoni. Mani esiha syae nisyoola ohuchia eyiri omutuki, sibulao esiindi si yasaba, ohutusaho yefwaala ebyo bi Hegai, omulade wali niyabaliindira mu liindiro elyo, yali n'amukerakiire ohwefwaala. 16Mu mwaaka kwa Ahasuera okwa hataanu-na-habiri n'ali omutuki, mu mwoosi kw'ehumi, omwoosi kulaangwa kuti, Tebbeeti, Esita yaleetwa eyiri Omutuki Ahasuera mu dooho ly'obwaami lyae elyo. 17Omutuki wuno mani naadaha Esita muno ohuhiraho abahasi baandi bala boosi, haandi n'amudaha ohuhiraho abahaana baandi boosi. Omutuki n'amufwaasa ekofia y'obutuki hu mutwe, Esita mani naaba omuhasi w'omutuki ohukobola mu makulu ka Fasiti. 18Omutuki yahola esidyaalo sihoongo muno, mani n'alweeya abaami bae boosi, alala neende abatuki bomu bwaami Yeesa oluyaali mu Esita ohuba omuhasi wae. Omutuki Ahasuera yalaangirira oludaalo lw'ohuwuluuhiraho mu bwaami bwae bwoosi, haandi yakaba ebiyaanwa biingi ebichaanakana neende oluyaali lw'omutuki.
Modekai awonia obulamu bw'Omutuki
19Abahaana nibali nibebuusire ehabi lyoohubiri, Modekai yali niyehaale hu mulyaango kw'omutiki. 20Nae Esita, yali n'asisiiri ohwetuumbula ati Muyudaaya niye. Modekai yali niyamuboolera ohutabooleraho omuundu yeesi ati Muyudaaya niye. Esita yamuwulira muno mu sino, koti lu yali niyamuwuliraanga mu buli siindu syoosi ohutula mubuyere bwae n'asisiiri mu mahono kae.
21Mu siha esyo, Modekai naasihaale hu mulyaango kw'omutuki, abalooye babiri Bbigitaana neende Tereesi, abomu dooho omwo, abali nibaliindaanga ebiruwa biingira mu biseenge by'omutuki, banyoolera, mani nibahola oluhobo ohutemula omutuki bamwiite. 22Modekai n'amanya oluhobo olwo, mani n'atuumbuliraoluhobo olwo eyiri omuhasi wae Esita. Esita yesi y'aboolera omutuki si Modekai yali n'afumbuule. 23Nibateeberesa, banyoola bati syali esyadyeeri. Abalooye abo boombi mani nibaanihwa hu simikiro. Omutuki n'alagira ati emboosi chino chaandiikwe mu Sitabo syomu Biha.
©Bible Society of Kenya, 2019
©Bible Society of Uganda, 2019