Populaarsed piiblisalmid 1 Juan 4

Jaga

Walay kahadlok diha sa gugma. Ang gugmang hingpit magwagtang sa tanang kahadlok. Busa kon mahadlok gihapon ang tawo, wala pa mahingpit ang gugma diha kaniya kay ang kahadlok may kalabotan man sa silot.

Apan mga anak, iya na kamo sa Dios ug gidaog ninyo ang mga dili matuod nga propeta kay ang Espiritu nga anaa kaninyo mas gamhanan kay sa espiritu nga anaa sa mga tawo nga iya sa kalibotan.

Nahigugma kita kay ang Dios man ang unang naghigugma kanato.

Mga igsoon, maghigugmaay kita kay ang gugma gikan sa Dios. Ang naghigugma sa iyang isigkatawo anak sa Dios ug nakaila sa Dios.

Ang wala maghigugma sa iyang isigkatawo wala makaila sa Dios kay ang Dios gugma man.

Ang matuod nga gugma mao kini: dili kita maoy unang naghigugma sa Dios kondili siya maoy unang naghigugma kanato. Gipadala niya ang iyang Anak aron pinaagi kaniya mapasaylo ang atong mga sala.

Mga igsoon, kon ingon niini ang paghigugma sa Dios kanato, kinahanglan nga maghigugmaay usab kita.

Gipadayag sa Dios ang iyang gugma kanato pinaagi sa pagpadala sa iyang bugtong Anak nganhi sa kalibotan aron makabaton kita sa kinabuhing walay kataposan pinaagi kaniya.

Kon may moingon, “Gihigugma ko ang Dios,” apan nagdumot diay sa iyang isigkatawo, bakakon siya. Kay unsaon man niya paghigugma sa Dios nga wala niya makita kon wala siya maghigugma sa iyang isigkatawo nga makita niya?

Ang magpahayag nga si Jesus mao ang Anak sa Dios, siya anaa sa Dios ug anaa kaniya ang Dios.

Ang gisugo ni Cristo kanato mao kini: ang nahigugma sa Dios kinahanglan maghigugma usab sa iyang isigkatawo.

Mga igsoon, ayaw ninyo tuohi ang tanang nagpatuo nga ang Espiritu anaa kanila kondili usisaha ninyo kon gikan ba gayod sa Dios ang espiritu nga anaa kanila kay daghan ang dili matuod nga mga propeta nga nanungha sa tanang dapit. Maila ninyo kon ang maong Espiritu iya ba sa Dios pinaagi niini: ang nagpahayag nga si Jesu-Cristo nagpakatawo iya sa Dios.

Apan ang dili magpahayag niini mahitungod kang Jesu-Cristo, dili iya sa Dios. Ang maong espiritu iya sa Kaaway ni Cristo. Nadunggan ninyo nga moanhi kini ug karon ania na gayod sa kalibotan.