Popular Bible Verses from Marcos 10

Share

Danȩrȩ, Pumȩrȩ Ara̧ Tjamo̧ pio judirequede. Jabo danȩrȩ, pumȩ judiro̧ pio coa a̧dopea̧ oa biradëa̧requede jabo jabechji̧, pio cüdë o ji̧ri̧iäpȩmo̧ chjadëri̧ a̧dopea̧ oa bira̧requede. Pio ju̧i̧iä ca̧ icjara pio yoa yürüparequede pumȩ pio ji̧ri̧ chjiari ano̧ mire ja̧bopea̧ oa, judiro̧ chjai̧dëri̧ japea̧ pio ju̧i̧ chjiari tuti ba ano̧pea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jabo Jechu judi jibëa̧ jadü pio ji̧ri̧iäpȩmo̧ dëbë damȩrȩ yo̧a̧dejȩrȩ: —Danȩrȩ, tjamo̧ri̧ yo̧requededibe. Chjätärea̧ üdë pumȩ pio ji̧ri̧iä, dëdë, chjao tjamo̧de. Jabechji̧ japarea̧mi̧dëde. Jabo chjao tjamo̧dëde Ütë tjamo̧ pio ju̧i̧iä. 'Jabechji japarea̧mi̧dëdida' quëna̧dëmȩde. Dëdë, pumȩ judiro̧ jibëa̧ ma̧na̧ri̧ japea̧ oaiä chjätärea̧mi̧dëdirȩ, jabo Ütë tjamo̧ pio judi tuti japea̧ oaiä, dëdë, chjätärea̧ dapai̧ dadirȩ —yo̧a̧dejȩrȩ.

Ado Jechu judi yo̧a̧dejȩ: —Jabechji̧ baävä. Mȩnȩ quëna̧ tara, jabechji̧ chjaparea̧ oa cjiarenȩ —yo̧a̧dejȩ. Ado chjaodëri̧ damȩpea̧de Batimeo judi. Aja̧, judi dadërërea̧ ji̧, chjaodëri̧ damȩpea̧de. Ado cho̧rë järëremȩdejȩ Jechu ju̧i̧ no̧ro jämȩ oa.

Ja̧di tara yo̧requededibe. Dibëa̧ jadü pio ji̧ ano̧rea̧mi̧dëde. Ado chjereno̧ yo̧a̧ri̧ pumȩmi̧ dari̧ cjo̧ro̧rea̧mi̧dënȩrȩ. Jabechji̧ cja̧rȩmȩpea̧ji̧ri̧ oa dadidibe Ütë tjamo̧ judi, yo̧a̧ri̧ pumȩmi̧ dadëji̧ri̧ oa —yo̧mȩrȩ dëbë yo̧rëremȩdejȩrȩ pjaricheo ji̧ri̧ Jechu judi.

Ado pio ju̧i̧ ta̧rëa̧ oaiä, Jechu judi ea tjamo̧mȩrȩ darëremȩdejȩ üi̧ oa. Ado jibëa̧ dachoräpȩmo̧ dëbë damȩrȩ yo̧a̧dejȩ: —Jabo danȩ, jabë pjärämȩde cja̧rȩmȩrȩ —yo̧a̧dejȩ—. Jabechji̧ mȩnȩ jabëdiärea̧ decjiari̧ cjo̧ro̧tämi̧ cjiarä judi, jabechji̧ na̧ea̧ pio ju̧i̧ chjö̧na̧i̧ oa gatë tänȩchäeno̧täremȩrenȩ. Ado pio jiro chëre chjö̧na̧i̧ oa yürütäremȩrenȩjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Ado mȩnȩ ja̧di dari̧ japarä judi, jabechji̧ a̧dëräpȩ ju̧ri̧ a̧dë chjäte ba chia pio ju̧i̧ goaparenȩ. Ado danȩ, ja̧di dari̧ japa ëte, jabechji̧ cho̧rë jana̧coe —yo̧a̧dejȩ Jechu judi.

Ja̧dëa ji̧ Jechu judi iëno̧ë ta̧rëa̧dejȩ: —Danȩ, ¿tjana̧ oa japatä earenȩque mȩnȩ? Ado da cotomȩ judi dëbë yo̧a̧dejȩ: —Danȩ a̧ra̧ano̧mȩ, ado chjereno̧ damirerea̧ yürücoe.

Jabo danȩrȩ, ja̧di dari̧ jo̧rȩtaji̧ri̧rȩ cjo̧ro̧dëtäreji̧ri̧nȩrȩ, jabo jabechji̧ tjaoëpai̧ dari̧ cjo̧ro̧täreji̧ri̧nȩrȩ. Pio ju̧i̧iä yo̧requededibe —yo̧a̧dejȩrȩ—. Eami̧ pumȩ judi tjamo̧ yo̧mȩmi̧ dari̧ cjo̧ro̧tämi̧ cjiarä judi, jabechji̧ jibëa̧ pumȩ pio ji̧ri̧ ja̧ mu̧i̧tjoi̧mi̧ dari̧ cjo̧ro̧täremȩde, pio ji̧ri̧ ja̧ oa ja̧bepë yürümȩrȩ.

Tjamo̧ yo̧dërequedemȩ jabo tjamo̧i̧ cjiari̧ yo̧requedibe. Danȩrȩ, eami̧ pumȩ judi bori̧ pio judiro̧ quëna̧mi̧ dari̧ quëna̧dërä judi, Ütë tjamo̧ ju̧i̧ quëna̧dërä judi, jabechji̧ Ütërë yo̧a̧ chja̧oeräpȩ yu̧a̧rea̧ dadëpade —yo̧a̧dejȩrȩ.

Ado Jechu judi ji̧dë u̧i̧ yo̧mȩrȩ a̧de yo̧a̧dejȩrȩ: —Danȩrȩ, pio yaba̧mȩ yoaiä cjo̧ro̧ji̧ri̧ judiro̧ orë yabo baäji̧ri̧mi̧ dari̧ cjo̧ro̧dirȩ, jabo o judiro̧ duriräpȩmo̧ cjiadiämi̧ dari̧ cjo̧ro̧dirȩ. Jabo ji̧dë duri oa japamitë chjätä ëte, yabo baäji̧ri̧mi̧ dari̧ cjo̧ro̧ji̧ri̧ pio judiro̧, jabechji̧ duriräpȩmo̧ cjiadiämi̧ dari̧ ano̧ mire cjo̧ro̧padirȩ. Ado duriräpȩmo̧ cjiadiämi̧ dari̧ cjo̧ro̧ji̧ri̧ pio judiro̧, jabechji̧ yabo baäji̧ri̧mi̧ dari̧ ano̧ mire cjo̧ro̧padirȩ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧.

Jabo danȩrȩ, pearä judirä Ütë tjamo̧ judi chjö̧na̧i̧ oa pareaparërea̧ ji̧, pumȩ pio ji̧ri̧ pareaparërea̧ ji̧, jabechji̧ 'üi̧ oa, ado iei̧ i̧a pareapea̧dejȩrȩ. Ja̧di tara üi̧ judi jibëa̧ iei̧ ji̧ ëbarä, jabechji̧ a̧dë baätäremȩdejȩrȩ jibë nö̧riji̧ri̧ pio ji̧ri̧. Ado üi̧ judi jibëa̧ iei̧ ji̧ ëbarä, jabechji̧ cja̧rȩmȩ pumȩmi̧ dari̧ cjiadirȩ.' Ja̧di tara judiro̧ yo̧a̧ri̧rȩ cjiarërea̧ ji̧, jabechji̧ cja̧rȩmȩpea̧dirȩ. Ado Ütë tjamo̧ judi yo̧a̧ri̧ pumȩmi̧ daji̧ri̧ oa darërea̧ ji̧, jabechji̧ cja̧rȩmȩpea̧ji̧ri̧ oa dadejȩrȩ.