Popular Bible Verses from Lucas 10

Share

Tjamo̧ davä ca̧ pumȩ, cüdë pio dibëiäpȩmo̧ tjamo̧ yo̧rea̧ pio ju̧i̧ yürüa̧requededibe Ichiae pio ju̧i̧ chjadëri̧ boadäräpea̧ oa, pio ju̧i̧ ja̧ jauëchja oa chjadëri̧ dëbëpe chjaopea̧ oa. Ado cüdë ja̧di dari̧ yürüa̧ oaiä, jabechji̧ po oa boë cjaeäräbo, chjai̧dë oa chjätädëpanȩrȩ, chjia ara boë cjaeäräbo. Jabechji̧ cüdë dibë ca̧ tjamo̧ yo̧rea̧ oa yürüa̧ oaiä, jabechji̧ eami̧ üdë dibë gitori̧ japarea̧ dadëpadidibe. Aja̧, chjadëri̧ yürüa̧requededibe.

Jabo Jechu judi dëbë yo̧a̧dejȩ: —Damȩ Marta, ca̧ jadü. Chjadëri̧ ta̧rëcoa —yo̧a̧dejȩ—. Jabechji̧ dami̧ti̧ oa jo̧rȩte chjaoyi̧rȩ bücjüri̧ cjia tjamo̧mȩ. Jabo damȩ, cja̧rȩmȩ pio ju̧i̧mo̧i̧ bücjüri̧ cjiatäreyi̧mȩ jabo. Jabechji̧ cüdë a̧ra̧ano̧a̧ pio ju̧i̧ chjadëri̧ dabapapea̧ pio ju̧i̧mo̧i̧ jo̧rȩtatäreyi̧mȩ. Damȩ Marta, na̧ oyi̧ jini̧, jabechji̧ ji̧dë u̧i̧ ba chia oa mitëa̧ni̧. Ado pio ju̧i̧iä tja̧reparȩrea̧mi̧dëquiji̧ —yo̧mȩrȩ yo̧rëremȩdejȩ Marta ji̧iäpȩmo̧ Jechu judi.

Ado pumȩ üdë dëbë yo̧a̧dejȩ: —Tjana̧ yo̧dë, jabechji̧ ibëa̧ Ano̧mȩ Ütë pio ju̧i̧ ea tjamo̧pea̧de urëdi tjamo̧ oa jo̧rȩtaji̧ri̧rȩ. Aja̧, ibëa̧ jo̧rȩtarea̧ chji̧ codëmi̧ dara̧ pio ju̧ri̧ra̧ eapea̧de, chji̧ pënȩmi̧ dadë maeara̧. Aja̧, a̧ro̧rȩ nö̧tarä yuro eapea̧de, ibëa̧ yadë maeara̧. Jabechji̧ ibëa̧ tjo codëmi̧ dara̧ pio ju̧ri̧ra̧ eapea̧de. Tjamo̧ davä. Ibëa̧ icjara oa nȩmȩparea̧ decjiari̧, ibëa̧ icjara oa ja̧bopea̧ oa yürürea̧mi̧ dari̧ ea tjamo̧pea̧de ibëa̧ tjo codëmi̧ dara̧ pio ju̧ri̧ra̧. Ado ibëa̧ bë queri̧ cjo̧ro̧mȩ pio ju̧i̧, jabechji̧ ibëa̧ i pio ju̧i̧ eami̧ eapea̧de. Aja̧, pio jiro ma̧ȩ oa ta̧rëdiäpea̧de —yo̧mȩrȩ dëbë yo̧a̧dejȩ pumȩ üi̧ üdë Jechu pio ju̧i̧iäpȩmo̧.

Jabo ji̧ri̧ chjadübea yaboi̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ: —Danȩrȩ, Ütë tjamo̧ ja̧ ma̧ȩ oa quëna̧pai̧ daji̧ri̧ pio judiro̧ ji̧ra̧ tjamo̧dirȩ —yo̧a̧dejȩrȩ—. Jabechji̧ joechjapea̧mȩ jurarea̧mi̧ dadirȩ. Jabo cjäri̧ madiro̧jo̧ȩ, jabepaji̧ri̧ pio judiro̧ nö̧tadëdiro̧jo̧ȩ pio jiro jurarea̧mi̧ da oa mitëpea̧ ji̧. Ado pio ju̧i̧iä babui̧ra̧ jëreeaji̧ri̧rȩ goë cjo̧dëchji̧vä Ano̧mȩ pio ju̧i̧iä. Aja̧, Ano̧mȩ pio ju̧i̧iä, mitëpea̧ jurarea̧mi̧ da pio ju̧i̧ ja̧ Ano̧mȩ pio ju̧i̧iä babui̧ra̧ goë cjo̧dëtä yo̧requededibe, judi ja̧bepaji̧ri̧ ji̧ra̧ tjamo̧ oa chjadütä, joechjapea̧mȩ jurarea̧mi̧ da pio ju̧i̧ mitëpaji̧ri̧ pio ji̧ri̧ —yo̧a̧dejȩrȩ.

Ado ja̧dëa ji̧ Jechu judi iëno̧ë ta̧rëa̧dejȩ, jënȩ pea ni̧bä chjaoa̧ pio ju̧i̧ chjiari: —Danȩ, tjarari̧rëreji̧ri̧dirȩ chjätäa̧ji̧ri̧ judiro̧. Jabo yo̧coe, ¿Chjia tjamo̧rëremȩde judio pio ju̧i̧ tjamo̧ri̧ eamȩ judi? ¿Chjia tjamo̧rëremȩde garüji̧ri̧ pio ji̧ri̧iä gu̧na̧ oa cjiarëremȩ pio ju̧i̧ eamȩ judi? —iëno̧ë ta̧rëa̧dejȩ. Ado a̧ra̧ano̧mȩ judi: —Chjiadëde, jabechji̧ pio ju̧i̧iäpȩmo̧ cjäri̧ri̧ cjia daea̧mȩ pio judide —dëbë yo̧a̧dejȩ. Ja̧dëa ji̧ Jechu judi a̧de yo̧a̧dejȩ: —Jabechji̧ peaja̧dimi̧ dari̧ japamȩrȩ cjo̧ro̧vä —yo̧a̧dejȩ.

Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jënȩ chjadüpea̧ pio ji̧ri̧: —Danȩrȩ ca̧ pumȩ, uapai̧ da tjamo̧räpȩ chjadürequededibe ja̧bepapea̧ oa —yo̧a̧dejȩrȩ—. Tjamo̧ davä, oveja bori̧mi̧ da maea oa chjadürequededibe ja̧bepapea̧ oa, aure chjuaji̧ri̧mi̧ da pio ji̧ri̧ ja̧ chjarerä cjo̧ro̧ji̧ri̧ pio ji̧ri̧ a̧dopea̧ oa.