Populaarsed piiblisalmid Japarea̧ 1

Jaga

Jabo danȩrȩ, Tjo tjamo̧ pio judi dibëa̧ icjararä bëpea̧rä, ju chiarea̧ oa yürüpadidibe pio coa chjiari a̧ra̧ano̧pea̧ oa. Aja̧, Jerucharȩräpȩ cjo̧ro̧ji̧ri̧ pio ji̧ri̧iäpȩmo̧, ado Judea quȩmȩ chiriräpȩ cjo̧ro̧ji̧ri̧ pio ji̧ri̧iäpȩmo̧, ado Chamaria quȩmȩ chiriräpȩ cjo̧ro̧ji̧ri̧ pio ji̧ri̧iäpȩmo̧ a̧ra̧ano̧pea̧ oa ju chiarea̧ yürüpadidibe, mȩnȩro̧ chiriräpȩti̧ oa cjo̧ro̧ji̧ri̧ pio ji̧ri̧iäpȩmo̧bo pio coa chjiari a̧ra̧ano̧pea̧ oa —yo̧mȩrȩ yo̧a̧dejȩrȩ Jechu judi.

Ado Jechu judi dëbë yo̧a̧dejȩrȩ: —Pio ju̧i̧ chjiari dabarea̧ yürüdëa̧didibe Ama̧i̧ tjamo̧ judi —yo̧a̧dejȩrȩ—. Pio judimo̧rȩ dabade. Jibëa̧ ma̧na̧ri̧ ütarë jo̧rȩtami̧ japamȩde mȩnȩro̧ dabarea̧mi̧dëri̧. Ado pio ju̧i̧iä, 'Aja̧, pio jiro doro japaemȩ jirodida' quëna̧ dabarea̧mi̧dëde.

Ado bedüa̧ duri oa Jechu judi jibëa̧ jadü pio ji̧ri̧di ëba jura̧ nö̧ta, jabechj ja̧di ta̧rëri̧ yo̧mȩrȩ yo̧rëremȩdejȩrȩ: —Danȩrȩ, Jerucharȩräpȩ ju̧ri̧ cjiadiächji̧vä a̧dë baärea̧ decjiari̧. Jabechji̧ pio ju̧ri̧pȩ jidatachji̧vä Ama̧i̧ tjamo̧ judi dibë yürüpea̧ pio ju̧i̧, cüdë dibë no̧mȩ yo̧a̧ pio ju̧i̧. Jabechji̧ Juan judi uira̧ pio ju̧ri̧ra̧ go̧e cjaeä chudarëremȩdidibe jabo do ji̧ra̧dë chjätä ëte, Tjo tjamo̧ra̧ pio ju̧ri̧ra̧ ano̧ mire go̧e cjaeä chuda̧ oa cjiapanȩrȩ mȩnȩro̧. Ja̧di tara jabechji̧ cjiadiächji̧vä Jerucharȩräpȩ ju̧ri̧ —yo̧mȩrȩ yo̧rëremȩdejȩrȩ jibëa̧ jadü ji̧ri̧ Jechu judi Tjo tjamo̧ pio ju̧i̧ chjiari.

Aja̧ Jechu judi toro gitoi̧ dari̧ ja̧boa̧remȩrȩ ado chjereno̧ bëdüa̧de. Ado bëdüa̧mȩ oa jënȩ chjadüa̧ pio judiro̧ co ji̧ra̧ri̧ dae chjaorëreji̧ri̧diro̧jo̧ȩ. Jabechji̧ pio jȩaiäpȩmo̧ irä darea̧mi̧ dari̧ na̧rȩ chjaorëremȩdejȩrȩ do ji̧ra̧ nö̧ta, 40 do nö̧ta. 'Aja̧, tjamo̧ri̧ bëdüa̧dida, toro ja̧boa̧remȩ pio judi tjamo̧ri̧ bëdüa̧dida' quëna̧rea̧mi̧ dari̧ na̧rȩ chjaorëremȩdejȩrȩ babui̧ra̧. Ado pio ju̧i̧iä irä daea̧diro̧jo̧ȩ. Irä ta̧rëa̧diro̧jo̧ȩ. Aja̧, Ütërë yo̧a̧ chja̧oerä cjo̧ro̧pea̧ pio ju̧i̧ chjiari ni̧bä chjaoa̧mȩ oa irä ta̧rëa̧diro̧jo̧ȩ.

Ado Jechu judi ja̧di ta̧rëri̧ yo̧ ëte, cjitë tänȩa̧ oa cjiarëremȩde ji̧ri̧ ja̧ dachoro. Ütërë tänȩa̧ oa uë tjamo̧ oa buarëremȩde, go̧a̧ra̧ ë oaiä cho̧rë darea̧mi̧dëpe bagari̧.

Ado judiro̧ jabë a̧dëräpȩmo̧ dae cjiataji̧ri̧ oa, chjaodëri̧ cjiadäräa̧diro̧jȩrȩ jibëa̧ yuroro oari judiro̧ yo̧a̧ri̧rȩ, chjibo bërebërea oa ina̧ji̧ri̧rȩ. Ado yo̧ji̧ri̧rȩ yo̧a̧diro̧jȩrȩ: —Danȩrȩ, Garirea chiririji̧ri̧ pio dibë iëno̧ë ta̧rërea̧ro̧dibe. ¿Jabo tjana̧pea̧ oa uëräpȩmo̧ gatë dae cjianȩrȩ mȩnȩro̧? Pio jiro Jechu üdë, dibë a̧dë baäa̧mȩ pio judi ado chjereno̧ ma̧na̧pade. Tjamo̧ davä. Jënȩ a̧dëräpȩmo̧ bua̧mi̧ dari̧ birë ma̧na̧pade ado chjereno̧ —yo̧ji̧ri̧rȩ yo̧a̧diro̧jȩrȩ pio jiro oari yo̧a̧ri̧rȩ Jechu ja̧ jadü pio ji̧ri̧iäpȩmo̧.