Populaarsed piiblisalmid Proverbios 16

Chrokui̱to̱ehé Itꞌéni Díos ti ixra̱ tjénka̱yáxian sichꞌe, landá xi̱kaha chaxín tsoxiteyá tíha.

Ti chojni la tjenka̱yáxin nke nti̱a tsákja, kjánchó jehó Itꞌéni Díos tsondáchro nketí sátsji sin.

Ti itan jína la mé éxi itsje̱n kotsje̱nta náxrjón ixé, la tíha nchechèxín a̱sén chojni la ko éxi ijnko xro̱a̱n tsito̱exín chojni jína.

Ti chojni la tjenka̱yáxin ti nkehe sichꞌe, kjánchó jehó Díos tsondáchro ti nkehe chaxín tso̱hen.

Ícha jína ti chojni tjokahya tónínkaon ke ti chojni imá tse̱he̱. Ícha jína ijnko chojni jehó chrókꞌue̱tue̱hen a̱sén ke ti chrókꞌue̱tue̱hen sin ijnko chjasin.

Ti chojni nchejié a̱sén la tsꞌitjáña sin. Ti sin nchehnke la imá tso̱suéhe̱ sin.

Kaín chojni la ndáchro kixin ndoá ti nkehe ichꞌe sin, kjánchó jehó Itꞌéni Díos mé nchekito̱exín ti nkehe tjenka̱yáxin sin.

Ti nkexro tienxín ti itan jína la kjuaxróxin tsꞌejó; la imá náxrjón chéhe̱ tsꞌejó ti nkexro tinkáchónki Itꞌéni Díos.

Ícha jína nóa la ko jína itjen, ke ti chróchonta itsjé nkehe kixin kjui̱chꞌiyehé chojni.

*Siín nti̱a la tjenka̱yáxin chojni kixin chaxín ndoá, kjánchó ti ó tsjixixín la tsꞌenxín chojni tíha.

Ti nkexro jínahña la itje kjuanínkaon; la ti chojni xrichꞌia la nchekjajo̱n ti chojni jína chóxin.