Populaarsed piiblisalmid Mateo 18

Kixin ti tjejó yaá o̱ iyꞌá chojni nkoko̱a tso̱nkotséxin sin ni̱ná la janhan tsjakꞌé nko̱siñe ti tjejó sin.

’Kja̱xin ndáxrja̱n kixin ti yaára ntihi chjasintajni nkoko̱a tsjenka̱yáxinra kixin tjanchehéra Díos ijnko nkehe tjinkáonra la jehe chꞌan tsjajon chꞌan.

Ndá chꞌin Jesús kꞌuéye̱he̱ ijnko chájan la kjuákꞌe nko̱siñe ti tjejó sin, *la ndáchro: ―Chaxín ndáxrja̱n kixin ti tsꞌónahñara éxi ijnko chájan la xitjahya tsꞌixe̱hénra ti tꞌe̱to̱axín Díos itjen nkaya nka̱jní.

Méxra̱ ti nkojinra tso̱hnkehyara éxi ti chájan i, la a̱ntsí tsotjetoanra nkaya nka̱jní.

La ti nkexro tꞌáyéhe̱ ijnko chájan kixin tinkáchónki ti janhan la éxi chrókꞌuáyéhe̱ sin ti janhan.

*’Chaxín ndáxrja̱n kixin ti tsjájonhñara kjuachaxin tso̱hen nkojín nkehe ntihi chjasintajni la kja̱xin nkaya nka̱jní tsjajonhña Díos kjuachaxin, la ti nkehe tsjájonra kjuachaxin tso̱hen ntihi chjasintajni la kja̱xin nkaya nka̱jní tsjajon Díos kjuachaxin tso̱hen.

A̱ndá chꞌin Jesús na̱xa̱ ndáchro: ―Mé xi̱kaha sitꞌahara Tꞌaná itjen nkaya nka̱jní ti kaínhña a̱sánra tsꞌitjáñahanra ti ijie̱ tjasinhara nkojín kichuara ―ichro chꞌin Jesús.

’Kjánchó ti nkexro tsjachròe ijnko ti chájan intsí tinkáchónki ti janhan kixin tsjasin ijie̱ la ícha jína chrókjuincheteyá sin ijnko xro̱chre̱ iye ndá chrókjuakánkí sin nda̱ñao ni̱nka.

’¿Jahara, nkechrora? Ti ijnko chojni chónta ciento kolélo ndá chrókjuinchekꞌitjáña chꞌan ijnko va, la, ¿á chrókuíto̱ehya chꞌan ti noventa y nueve va ti ijna̱ ndá sáchrókjuikjeyá chꞌan ti ijnko va kꞌuitjáña, ní?