Populaarsed piiblisalmid Santiago 1

Jahara kíchóni, chrókócháhara kjónté chrókꞌuatsínkaxínra itsjé nkehe náxrjónhña, kixin ó nohara kixin ti ichrén nkehe náxrjónhña chrókóhanra kixin tinkachónkira Ìnchéni, la a̱ntsí tso̱fuerte a̱sánra la ko tsjachara tsꞌatsínkara kaín nkehe.

Ti nkojinra tꞌitjáña tso̱nohara, la chrókjuanchehéra Díos, la jehe chꞌan tsjajon chꞌan kixin tso̱nohara jína la ko tsiénxinra jína. Kixin Díos la tjajon chꞌan kaín ti nkehe tꞌáyéhe̱ ti nkexro tsjanchia, la tónínkákonhña chꞌan.

Méxra̱, jahara kíchóni, a̱ntsí jína chrókꞌuejora chrókuihínra, la tjokahya chrókónínkáonra la ko tjokahya chrónixjara.

A̱ndá ti xi̱kaha la a̱ntsí ndoá tsinkachónkira Ìnchéni, la a̱ntsí jína tsꞌejora, la í tsicháxia̱hñara ninkehó.

Kjánchó jehya jehó chrókuihínra ti itan. Náhí. Kja̱xin chrókjuáko̱xinra tíha. A̱ndá ti náhí, la jahóra chꞌiyehé a̱sánra.

Díos sincheñao ti nkexro tsjacha tsꞌatsínka ti nkehe náxrjónhña. Ti tsjacha sin tsꞌatsínka sin kaín tíha, ndá tsꞌáyéhe̱ sin ti kjuachón mé tíha la ti corona tsíndáchro Díos tsochjéhe kaín ti nkexro tjue̱he ti jehe chꞌan.

Kixin kaín ti nkehe jína tꞌáyéhe̱ni mé ti̱xi̱n ti itjen Díos, ti nkexro kjuíchꞌéna kaín ti xrohi siín nka̱jní. Jehe chꞌan mé ijnko Díos tꞌixikíhya chꞌan la ko sítiehya itjen chꞌan.

A̱ndá ti nkexro tsinhón ti itan, la nchexiteyáhya, mé yóhe̱ éxi ijnko chojni tsjexín ijnko xro̱se̱nta̱ nkexrín tsjehe, a̱ndá kjuixin tsjehe la sákjuí, la tuénxín kꞌuitjáñehen nkexrín itjen.

A̱ndá ti nkexro chaxín jína tinkáchónki Díos la tjasinhña ijie̱, la tjinki̱tsa ti sin nóa la ko ti sin ikꞌán chóntahya nkehe sinie, la tjasinhña sin ti ijie̱ siín chjasintajni.

A̱ndá ti nkojinra, tjénka̱yáxinra chrókjui̱chꞌera nkojín nkehe jínahña, la chrókjuénka̱yáxinhñara kixin Díos tjajon kjuachaxin xi̱kaha si̱chꞌera. Náhí. Díos la chꞌehya ti nkehe jínahña la ko tjajonhña chꞌan kjuachaxin chrókjuasin chojni ijie̱. A̱ndá ti nkojín chojni, ó jehí ndáchro a̱sén sichꞌe nkojín nkehe jínahña, la xi̱kaha tsjasin sin ijie̱.

A̱ndá ti kíchóni nóa, la chrókóchéhe̱ sin kixin Díos la a̱ntsí tsjinki̱tsa ti jehe sin.