Populaarsed piiblisalmid YAKUB 1

Jaga

O kekat padéé' ké', hun keh teneng neu' pinaa' arong penyilam jian keh jian kenin. Uban neu' pengelan keh, inah éh maneu' keh omok ngeretep, ngan mihin keh kebit kenin kepéh.

Hun pu'un séé'-séé' jin belah ka'ah éh bé' pu'un pengejam, jian iah sebayang ngan Allah dokoo' Allah mena' pengejam seruh ngan néh; uban Allah mena' éh ngan lumang kenin ngan murung kenin ngan siget kelunan.

O kekat padéé' éh kemurung ké'! Jian siget usah pu'un rigah menéng, bang lieu' éh pané ngan lieu' éh merek.

Tong éh kebit kenin inah, jian éh pepit, pah avéé' ka'ah pu'un sukup mu'un ngan bé' pu'un pengekurang ineu'-ineu' péh.

Mai keh ngelavo' usah keh tengéé' ngan menéng ha' tebaraa' néh awah. Bang jian keh kivu pekua' ha' tebaraa' Néh.

Jian kenin kelunan éh omok ngeretep, na' péh penusah éh pinaa' arong teneng tong néh. Uban hun néh omok nyopéé' penusah inah, boh iah omok alaa' urip éh lepah pejajii' Allah ngan kekat kelunan éh pika Iah.

Kekat ineu'-ineu' éh jian ngan éh sukup mu'un inah éh tuai jin seruga jin Allah éh suai kekat éh rema tong Langit. Iah Allah éh bé' pu'un paléu, ngan bé' pu'un ngelihep ineu'-ineu' péh.

Uban kelunan éh menéng éh awah, ngan bé' kivu éh, inah éh barei' kelunan éh kepuh usah néh dalem pengada, tioo lakau éh hun inah néh éh ngelepan layan usah néh éh ta'an néh iri'.

Kelunan éh ngepayoo' kenin Allah Tamen lu', inah éh kelunan éh kivu Iah mu'un, bé' éh ngelayoo' awah sebayang. Jian réh nolong anak uyau ngan redo baleu' lem kekat penusah réh ngan mihau usah réh jin kekat arong kesa'at tong tana' iteu'.

Hun kelunan inah penat kenin maneu' sa'at tovoo' néh teneng tenupat inah, mai iah bara' Allah éh mihin akeu' maneu' kenat, uban bé' Allah omok penat kenin neu' kesa'at ngan Allah tengéé' péh bé' menat kenin kelunan maneu' sa'at. Éh mu'un néh pu'un kelunan sopéé' ngan petat maneu' kesa'at inah, neu' réh kelih tong kemagat dalem kenin réh éh sa'at, kesa'at inah ngejeret irah ke'.

La'ah jian kelunan Kristén éh kari. Murung kenin uban tong jah dau Allah omok metéé' réh tong retek éh jian kepéh.