© Wycliffe Bible Translators, Inc.
℗ 2023 Hosanna

Hyolmo - WBT (NT) Non Drama

Hyolmo - WBT (NT) Drama

ओहले ठ़ूस्‍यी सिहङदा छ्येबे तेह फान्‍ज्‍यो पावलगी चो़वो येशूला यिह-छ्य़े पेहकेन्‍गी स्‍याहप्‍च्‍यीया़ला रुहप पेहती आ़र क्‍ये च्‍य़ूएँगी लोप्‍च्‍युङया़ तेर्ती खुङ ङ्याम्‍बु खा फ़ेदी माकेडोनिया लुहङबाला काहल्‍सीन। ओहलेगी थेन्‍दी डोएँमु ग्‍या़ ग्‍या़गी दे-खामया़ला चो़वो येशूला यिह-छ्य़े पेहकेन्‍गी आदा-नो़हया़ला आ़र क्‍ये च्‍य़ूगेन्‍गी लोप्‍च्‍युङया़ तेर्केॱराङ ग्रीस क्‍याहल-खापला लेप्‍सीन। ओहले पावल दावा सुम थु ओ़हलाराङ तेहसीन। ओहले छ्यु-टुहला जा़दी सिरिया क्‍याहल-खापला लो़ह डोज्‍ये माएँमुनी यहूदीया़गी खोला लाहम क़ूह तेहती येहबा माएँ ताम थ़ेसीन। ओहले खो माकेडोनिया लुहङबाले पेहती लो़ह डोज्‍येला थाक ताङसीन। ओहले लो़हदी डोएँमु बेरियागी पुरसकी पुह सोपात्रोस, थेसलोनिकेगी अरिस्‍तार्खस दाङ सिकन्‍दस, डर्बीगी गायस दाङ तिमोथी, ओहले एशिया क्‍याहल-खाप छ्यिम्‍बुकी तुखिकस दाङ त्रोफिमस पावल ङ्याम्‍बुराङ काहल्‍सीन। खुङया़दी ङ्यिह म़ेदी तोहङलाॱराङ काहल्‍दी ङ्यिहला त्रोआस क्‍याहसाला कू़हदी तेहसीन। ओहले ङ्यिहदी थार्पा छ्येपा सिहन फान्‍ज्‍यो फिलिप्‍पी क्‍याहसाले छ्यु-टुहला जा़सीन। ओहले ङ्यिहमा ङा तिङले त्रोआस क्‍याहसाला लेप्‍ती रो़हया़ला थ़ूसीन। ओहले ङ्यिह ओ़हला स्‍याहक्‍पु तिहन थु तेहसीन।

सातागी तोहङस्‍यो कार्मा ज़ा-ङ्यिहमा कुहङॱसेला चो़वो येशूला यिह-छ्य़े पेहकेन्‍गी स्‍याहप्‍च्‍यीया़ ङ्याम्‍बु चो़वो येशूगी सोह सुङदी का नाङग्‍योकी डेन साहज्‍येला ङ्यिह छो़सीन। ओहले पावलगी खुङया़गी दिनला ताम माज्‍ये छ़ूसीन। ओहले नाहङबार च्‍युङ डो कोहच्‍ये येहकें सोङबे नुहप फे़ थु खुङया़ ताम म़ेदी तेहसीन। ङ्यिह छो़दी तेहक्‍योगी थो़स्‍यो तेङला लो माहङबुराङ पार्ती येहके। ओहले युटिकस माएँ स्‍यारा च्‍यी़ कार्कुङला तेहती येहकें। ओहले पावलगी ताम माएँ माॱराङ ओ़ह स्‍यारा ङ्यिचु क्‍याहप्‍ती ङ्यि स्‍यिहम्‍बुज्‍यी लो़ह तेहक्‍यो दुबा। ओहले खो तेङ सुम थो़ले माहर ताहप्‍सीन। ओहले मिहया़गी लाङ डोएँमुनी खो स्‍यि सिहन्‍सीन दुबा।
ओहजेला पावल माहर फाप्‍ते खेप्‍चु क्‍याहप्‍ती खोला प्राहङज्‍या ताप्‍सीन ओहले पावलगी मासीन, “ख्‍या फ़ेबेॱया ज्‍यी़ मेहकोएँ च्‍यिबेमाना दि स्‍यारा पेहजा मा़हस्‍यी येह” म़ेदी मासीन। ओहले येहपाराङ थो़ तेङला काहल्‍दी ङ्यिह थाम्‍ज्‍यीगी चो़वो येशूगी सोह म़ेदी सुङ ज़्‍या़ नाङग्‍योकी डेन साहसीन। ओहले डेन से़हदी पावलगी नाहम लाहङगे थु खुङया़ ङ्याम्‍बु ताम मासीन। ओ़ह तिङले पावल खुङया़ ङ्याम्‍बु खा फ़ेदी काहल्‍सीन। ओहले मिहया़गी ओ़ह स्‍याराला खाङबाला क्‍याल काहल्‍सीन, ओहले खो थारक्‍यो सोङगोराङ खुङ थाम्‍ज्‍यी ज्‍यिबुराङ क़ेहनाङ पेहसीन।

त्रोआस क्‍याहसालेगी ङ्यिह छ्यु-टुहला जा़दी अस्‍सोस क्‍याहसाला काहल्‍सीन। ओहले पावलगी, “ङाह अस्‍सोस थु काङबागी डोएँ, ओहले ओ़हला लेप्‍ती ख्‍या फ़ेबेॱया डोएँगी छ्यु-टुहलाॱराङ ङाहॱआङ जा़गे” म़ेदी अस्‍सोस थु काङबागी काहल्‍सीन। ओहले ङ्यिह अस्‍सोसला लेप फान्‍ज्‍यो पावलॱआङ ओहङदी छ्यु-टुहला जा़सीन ओहले ङ्यिह थाम्‍ज्‍यीराङ डी़दी मितिलेने क्‍याहसाला काहल्‍सीन। ओहले नाहङबार च्‍युङ छो-क्‍याहम्‍जोकी लाहमले पेहतीराङ खियस छोलिङकी सा पोहला लेप्‍सीन। ओ़हगी तिङमा ङ्यिहमुदी सामोस छोलिङगी साला लेप्‍सीन। ओहले येहपाराङ तिङमा ङ्यिहमुदी मिलेटस क्‍याहसाला लेप्‍सीन। एशिया क्‍याहल-खाप छ्यिम्‍बुला ख्‍योल्‍गे म़ेदी पावल एफिसस क्‍याहसाला मेहन्‍डोएँ म़ेदी थाक ताङसीन। च्‍यिबेमाना खोला यरूशलेमला लेप्‍च्‍येला छारा काहल्‍दी येहकें। खो पेन्तिकोस माएँगी छ्येपाला ला़ खाजेबा ग्‍यो़बाराङ लेप्‍च्‍ये सेम पेहती येहकें।

मिलेटस क्‍याहसाले पावलगी एफिसस क्‍याहसाकी छेन्‍छोककी एल्‍डरया़ला क़े क्‍याहप्‍च्‍येला ताङ चाहङसीन। ओहले खुङ ओहङदीले पावलगी मासीन, “आदा-नो़हया़, एशिया क्‍याहल-खाप छ्यिम्‍बुला ओहङ यिहन्‍ज्‍यु ङाहगी काहन्‍डुमु डोलु-तेहलु पेहपा ओ़हदी ख्‍या फे़बेया़ला क्‍यी़हराङ येह। यहूदीया़गी ङाहला लेहमा माहङबुराङ सेच्‍ये म़ेदी लाहम छोल्‍सीन यिहॱनाङ ङाह स्‍यिहवा पेहती मिज्‍यु ताङदी चो़वो छ्येवादीॱराङ स्‍याहप्‍तो स्‍युहसीन। ङाहगी खाङबा-खाङबा दाङ मिहया़गी पाहरक्‍यीला काहल्‍दी लोप्‍च्‍युङ तेर्केमु राहङ फ़ेबेया़लाॱराङ फेन थो़ज्‍यु म़ेदी ङाहगी ताम च्‍यिॱआङ फे़क्‍यो मा़हज्‍याबा पेहती थाम्‍ज्‍यीराङ स्‍येसीन। ङाहगी यहूदी दाङ ग्रीक क्‍यिहपागी मिह ङ्यिकालाराङ, ‘सेमगी स्‍या़बा पेहती तिहक्‍पागी ल़ेहया़ पाङदी राहङगी सेम किन्‍ज्‍यो ङो़ले ग्‍युर्तोङ, ओहले ओहराङगी चो़वो छ्येवा येशू मास्‍यीकाला तेहपा पेहतोङ’ म़ेदी प्रा साल्‍सीन।
ओहले ताहन्‍दा किन्‍ज्‍योगी थुगी सुङ नाङग्‍योदी ङ्यिहन्‍दी ङाह यरूशलेमला डोउ येहबा। ओ़हला ङाहला च्‍यि च्‍यि ओहङगे ओ़हदीनी ङाहॱलाङ क्‍यी़ह म़ेह। यिहॱनाङ ङाहला देजे च्‍यी़राङ क्‍यी़ह येहबा, मिहया़गी तुहक्‍पु तेर्ती चोन-खाङगी तुहक्‍पु खुर कोहच्‍ये येह म़ेदी नाम्‍पार-ताहक्‍पा थुगी ङाहला तेन नाङदी येह। यिहॱनाङ, ङाहगी मिहली ङाहगी तेहन्‍दालानी च्‍यिॱआङ फेन थो़ज्‍ये म़ेह। ङाहला देजे च्‍यी़राङ सेम्‍बा येहबा, किन्‍ज्‍योगी मिहया़ला काटीन जे-नाङदी येहबा माएँ या़हबु लेहङगुगी तामया़ मिहया़ला स्‍य़े ख़ूज्‍यु म़ेदी ओ़ह छ्या़लेया़ तेहन्‍दा डुप च्‍य़ूज्‍येला चो़वो येशूगीराङ ङाहला कुल नाङग्‍यो यिहम्‍बा। ता़ह ज़ी़-नाङदोङ, राहङ फे़बेया़गी पाहरक्‍यीला ङाहगी किन्‍ज्‍योगी क्‍याहल्‍सीगी तेहन्‍दाला प्रा साल्‍दी ओहङदीराङ येहबा, ता़ह ओहराङ नाहमॱआङ थु मिहङ्युहङ म़ेदी ङाहला क्‍यी़ह येहबा। ओ़ह सोङगोराङ तिहरीङ ङाहगी ख्‍या फे़बेया़गी दिनला ताम च्‍यी़ प्रा साल्‍गेनॱराङ येह, का़हलेॱआङ ख्‍या फ़ेबेॱया नाहङला सुॱआङ तोङदी डोसीमाना ओ़हगी ङ्य़ेहबा ङाहला फो़ज्‍ये म़ेह। च्‍यिबे मासीमाना किन्‍ज्‍योगी ओहराङ मिहगी थार्पा थोप ख़ूज्‍यु म़ेदी जे नाङग्‍यो दाङ जे नाङगे छ्या़लेगी तेहन्‍दाला च्‍यिॱआङ ताम फे़क्‍यो मा़हज्‍याबा पेहती राहङ फे़बेया़ला स्‍ये सिहन्‍दी येह। ता़हनी ख्‍याराङॱआङ जेम्‍बु पेहतोङ, ओहले नाम्‍पार-ताहक्‍पा थुगी ख्‍याला च्‍योल नाङग्‍योकी छो़बाया़लाॱआङ या़हबु पेहती त़ेदोङ। किन्‍ज्‍योगी छेन्‍छोकला या़हबु पेहती कोहरोवा जे नाङदोङ च्‍यिबेमाना चो़वो छ्येवा येशूगी ओ़ह मिहया़ला राहङदीराङ ठा़ स्‍याहल च्‍य़ू नाङदी ङ्योह नाङग्‍यो यिहन। ओहले ङाहला क्‍यी़ह येहबा, ङाह काहल फान्‍ज्‍यो रिह नाहङगी फारा ल़ेहमु मिहया़ ख्‍यागी पाहरक्‍यीला थेन ओहङज्‍ये येह, ओहले छो़बाया़ला तुहक्‍पु तेर्तेॱराङ तेहच्‍ये येह। ओहले ख्‍याराङगी पाहरक्‍यीलेगीॱआङ चिहन क्‍याहप्‍ती लुहङ तेर्केन्‍गी मिहया़ थेन्‍ज्‍ये येह। खुङया़गी चो़वो छ्येवागी स्‍याहप्‍च्‍यीया़ला राहङगी चोक्‍पा लाहम ङो़ले ख्‍येर्च्‍ये छोल्‍ज्‍ये येह। ओ़ह सोङगोराङ जेम्‍बु पेहती तेहतोङ। ओहले ङाहगी लोह सुम थु ङ्यिहन-नुहप मिज्‍यु ताङदी चो़वो छ्येवागी स्‍याहप्‍च्‍यी रे़ह-रे़हला लोप्‍क्‍योगी तामया़ टेहम्‍बा माहच्‍येह।
ता़हनी ङाहगी ख्‍या फे़बेया़ला किन्‍ज्‍योगी छ्या़ला च्‍योल्‍गो येहबा। किन्‍ज्‍योगी ओहराङला थुज्‍यी ज़ी़ नाङगेन माएँगी सुङ सेमला ज़ुङदी टेहम्‍बा माहच्‍येहप्‍पा पेहती तेहतोङ। ओ़ह सुङगी पेहतीराङ किन्‍ज्‍योगी ख्‍या फे़बेया़ला यिह-छ्य़ेला स्‍युक क्‍ये च्‍य़ू नाङज्‍ये येह ओहले राहङगी मिहया़ला मेलाम थोप्‍केन्‍गी मिहया़ ज़ो नाङज्‍ये येह। ङाहगी सुज्‍यीगी सेर, ङुल दाङ काप्‍च्‍याला ह्‍अम्‍बा माहबे। राहङ फे़बेया़ला थुयी़ येहबा, दि लाहक्‍पागीॱराङ ल़ेह पेहती ङाह दाङ ङाहगी रो़हया़ला कोहकेन्‍गी से़हया़ ज्‍योर्सीन। ङाहगी थाम्‍ज्‍यी तामला राहङ फे़बेया़ला पे तेन सिहन्‍दी येह, राहङ फे़बेया़गीॱआङ दि ल़ेहमुराङ तुहक्‍पु पेहती ला़ मेहखाएँया़ला रो़ह पेह कोहएँ। चो़वो छ्येवा येशूगी सुङ नाङग्‍योकी दि स्‍याहल टेहम्‍बा साल्‍दी तेहतोङ, ‘लेहन्‍गे म़ेदी तेर्के सोनाम-साक्‍पु’!” म़ेदी पावलगी एफिससकी छो़बाया़गी गोबाया़ला मासीन।
दि तामया़ मा सिहन फान्‍ज्‍यो पावलगी मिह थाम्‍ज्‍यी ङ्याम्‍बु डी़दी पी़मु च़ूदी सोल्‍वाङ ताप्‍सीन। खुङया़ थाम्‍ज्‍यीराङ ङुहसीन ओहले पावलला प्राहङज्‍या ताप्‍ती खा लेहन्‍दी कोहङबा स्‍युहसीन। ओहले पावलगी, येहपाराङ नाहमॱआङ थु ङ्युहङज्‍ये म़ेह माक्‍यो सोङगोराङ खुङया़ माहङबुराङ तुहङाल पेहसीन। ओहले खुङया़गी पावलला छ्यु-टुह थु क्‍याल काहल्‍सीन।

Kuula ल़ेह-पेन 20