ROMANOS 2
2
Liñi tsa cua'ni cuayá' ycui' Ndyosi ji'i̱ ñati̱ chalyuu
1Lo'o cu'ma̱ ni, nchcui' tsa ma̱ ji'i̱ sca cha' cuxi nu ndyu'ni ñati̱; pana ná caja ñi'ya̱ nu cua'ni clyu ti' Ni ji'i̱ ycui' ma̱, nu lo'o nclyotu̱ ma̱ qui'ya nu ntsu'u ji'i̱ xa' ñati̱, lo'o jua'a̱ ycui' ca ma̱ ntsu'u qui'ya bi' ji'i̱ ma̱. Ñi'ya̱ ndu'ni cuayá' bese ji'i̱ ñati̱ cuxi, jua'a̱ ndu'ni ma̱, nu lo'o nchcui' ma̱ jua'a̱ ji'i̱ ñati̱; pana stu'ba ntsu'u qui'ya ji'i̱ ma̱ lo'o nu ñati̱ cuxi bi'. 2Cua jlo ti' ma̱ cha' liñi tsa ndu'ni ycui' Ndyosi lo'o nchcube' Ni ji'i̱ ngu' nu ndu'ni lcaa lo cha' cuxi. 3¿Ni cha' laca nti' ma̱ cha' ná caca ji'i̱ cu'ma̱ ñi'ya̱ nu ndyaca ji'i̱ nu ngu' cuxi bi'? Cha' cuiñi, ná clyaá ma̱ ji'i̱ ycui' Ndyosi nu lo'o cua'ni cuayá' Ni ji'i̱ lcaa ñati̱; na nsta ma̱ qui'ya ji'i̱ ñati̱ bi', masi ndu'ni ma̱ la cui' tya'a cha' cuxi nu ndu'ni ngu' bi'. 4¿Ni cha' laca ná ndube ti' ma̱ cha' tso'o tsa ntsu'u tyiquee ycui' Ndyosi ña'a̱ Ni ji'na? Ntucuá Ni cña ji'na, ndalo tsa tyiquee Ni ji'na; tso'o tsa nti' ycui' Ndyosi ña'a̱ Ni ji'na, cha' caja ñi'ya̱ nu tya'a̱chu̱' na ji'i̱ cha' cuxi nu ndiya tsa ti' na ji'i̱. 5Ná ntaja'a̱ ma̱ taquiya' ma̱ ji'i̱ cha' nu nchcui' ycui' Ndyosi lo'o ma̱, ná ntaja'a̱ ma̱ ca tyuju'u ti' ma̱ tsiya' ti; bi' cha' ndyanu cha' xcube' Ni ji'i̱ ma̱ lo'o tyalaa tsa̱, nu lo'o ña'a̱ ngu' cha' liñi tsa cua'ni cuayá' Ni ji'i̱ ñati̱ chalyuu. 6Tsa̱ bi' tya Ni ji'na tsa ña'a̱ nu ngua'ni na lo'o nguti'i̱ na chalyuu; 7sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la. 8Pana nu ñati̱ cuxi ni, nu xcui' cha' ji'i̱ ycui' ca ngu' ntsu'u tyiquee ngu', tlyu tsa cha' ti'í ta Ni ji'i̱ ngu' bi'; ñasi̱' tsa ycui' Ndyosi ji'i̱ lcaa ngu' bi', cha' ná ntaja'a̱ ngu' taquiya' ngu' tsiya' ti ji'i̱ lcaa cha' liñi nu nclyu'u Ni ji'i̱ ngu', cha' ndijña tsa ti' ngu' ji'i̱ cua ña'a̱ ca cha' cuxi nu ña'a̱ ngu'. 9Xcube' tsa Ni ji'i̱ ngu' bi' li', tlyu tsa cha' ti'í caca ji'i̱ lcaa ñati̱ chalyuu, cua ña'a̱ ca ñati̱ nu ndu'ni xcui' cha' cuxi. Clyo tyacua cha' ti'í bi' ji'i̱ ngu' judío, li' la cui' jua'a̱ tyacua ji'i̱ ngu' xa' tsu', nu si'i ngu' judío laca ngu'. 10Pana lcaa ñati̱ nu ndu'ni cha' tso'o ni, ta ycui' Ndyosi cha' tso'o nu ntsu'u ca slo Ni ji'i̱ ngu' bi'; cua'ni chi̱ loo Ni ji'i̱ ngu' bi' ca slo ycui' Ni li', cua'ni Ni cha' ti̱ ti tyi'i̱ tyiquee ngu' li'. Clyo tyacua cha' tso'o bi' ji'i̱ ngu' judío, lo'o li' la cui' jua'a̱ tyacua ji'i̱ ngu' xa' tsu'.
11Si'i cua laca ti ñati̱ nu ndu'ni tyaca'a ycui' Ndyosi ji'i̱, sca ti cuayá' ndu'ni Ni lo'o cua ña'a̱ ca ñati̱ chalyuu. 12Ngu' xa' tsu' ni, masi bilya cuna ngu' lcaa cha' nu cua nda Moisés lo'o ngu' judío, pana tye cha' ji'i̱ ngu' jua'a̱ ti, si ntsu'u qui'ya ji'i̱ ngu'. La cui' jua'a̱ xcube' ycui' Ndyosi ji'i̱ ngu' judío, nu cua ndyuna cha' liñi nu nda jyo'o Moisés lo'o ngu'; si ntsu'u qui'ya ji'i̱ ngu', cua'ni cuayá' Ni ji'i̱ ngu' cuentya ji'i̱ cha' nu nchcui' Moisés bi' li'. Lo'o jua'a̱ sca ti cuayá' cua'ni cuayá' Ni ji'i̱ lcaa ñati̱ nu ndu'ni cha' cuxi. 13Ná caca tso'o cresiya ji'na cuentya ji'i̱ ycui' Ndyosi lo'o ndyuna ti na cha' liñi nu nda Ni lo'o na; sca ti si taquiya' na ji'i̱ cha' bi', si cua'ni na lcaa ña'a̱ cña nu ngulo Ni ji'na, li' caca tso'o cresiya ji'na cuentya ji'i̱ Ni. 14-15Ntsu'u ngu' xa' tsu' ni, cua laca ndu'ni ngu' ñi'ya̱ nu nscua lo quityi ji'i̱ ycui' Ndyosi, masi bilya cuna ngu' cha' bi'. Jua'a̱ jlo ti' na cha' nchca cuayá' ti' ngu' bi' ni cña laca nu nti' ycui' Ndyosi, xqui'ya cha' tyucui tyiquee ngu' ndu'ni ngu' tsa ña'a̱ cha' nu nda ycui' Ndyosi lo'o ngu' judío sa'ni la, masi bilya ta Ni cha' lo'o ngu' xa' tsu' bi'; hique ti ngu' bi' nda'ya cha' tso'o nu ndu'ni ngu' lo'o tya'a ñati̱ ngu'. Lo'o jua'a̱ hora ti nda ngu' bi' cuentya cha' qui'ya laca lo'o ndyu'ni ngu' sca cha' cuxi, pana ná ntsu'u cha' culacua ti' ngu' lo'o ndu'ni ngu' sca cha' tso'o. 16Jua'a̱ caca lacua, nu lo'o tyu'u lubii lcaa cha' nu ntsu'u ne' cresiya ji'i̱ ñati̱, tsa̱ li' lo'o culo Ni cña ji'i̱ Jesucristo cha' cua'ni cuayá' Ni ji'i̱ lcaa ñati̱; la cui' tyempo bi' culotu̱ Ni lcaa cha' nu ntsu'u cuaana ti ne' cresiya ji'i̱ ngu'. Jua'a̱ laca cha' nu nchcui' na' lo'o ñati̱ laja lo'o nclyu'u na' cha' tso'o ji'i̱ ycui' Ndyosi ji'i̱ ngu'.
Cña nu ngulo ycui' Ndyosi ji'i̱ jyo'o Moisés cha' cua'ni ngu' judío
17Pana nu cu'ma̱ ni, nacui̱ ma̱ cha' ngu' judío laca ma̱, bi' cha' jlya tsa ti' ma̱ ji'i̱ lcaa cha' nu nda ycui' Ndyosi lo'o jyo'o Moisés nu ngua sa'ni. Lye tsa ndu'ni tyucuaa ti' ma̱ lo'o xa' ñati̱, cha' nacui̱ ma̱ cha' sca ti cu'ma̱ laca ma̱ ñati̱ ji'i̱ ycui' Ndyosi. 18Na cua jlo ti' ma̱ ñi'ya̱ laca cña nu nti' ycui' Ndyosi cha' cua'ni ma̱, nti' ma̱; cua nguscua Moisés cha' bi' lo quityi cuentya ji'i̱ ma̱, bi' cha' cua nda la ma̱ xi cuentya ñi'ya̱ laca sca cha' tso'o, ñi'ya̱ laca sca cha' cuxi. 19Lo'o jua'a̱ nti' ma̱, cha' ycui' ma̱ nchca ji'i̱ ma̱ culu'u ma̱ tyucui̱i̱ liñi ji'i̱ ñati̱ nu ná jlo ti'; nti' ma̱ cha' taca ta ma̱ cha' lo'o ngu' nu ná ndyiji ñi'ya̱ nu caca cuayá' ti' ngu' sca cha' liñi; 20nti' ma̱ cha' taca culu'u qui'i ma̱ ji'i̱ ñati̱ nu ná nduna tso'o, cha' ple ti ngu' xi; nti' ma̱ cha' caca ma̱ mstru ji'i̱ ñati̱ nu bilya caca tsa'a̱ tsiya' ti. Nti' ma̱ cha' caca ma̱ jua'a̱, xqui'ya cha' jlya tsa ti' ma̱ cha' nu nguscua jyo'o Moisés bi'; laja cha' bi' nscua lcaa cha' nu caca jlo ti' na, lcaa cha' liñi nu ntsu'u nde chalyuu, nti' ma̱. 21Na nclyu'u ma̱ ji'i̱ tya'a ñati̱ ma̱ tu'ni, ¿ni cha' laca ná nchca culu'u ma̱ ji'i̱ ycui' ca ti ma̱? Nacui̱ ma̱ cha' ná tso'o cuaana ngu' na nu ntsu'u ji'i̱ xa' ñati̱. ¿Ha ná lo'o cu'ma̱ tya ntucuaana ma̱ ntsu'u quiya'? 22Nacui̱ ma̱ cha' ná tso'o tyu'u cha' ji'i̱ ngu' lo'o clyo'o xa' ñati̱. ¿Ni cha' laca cha' lo'o cu'ma̱ ndu'ni ma̱ cha' cuxi bi' lacua? Si ná ndiya ti' ma̱ tsiya' ti lo'o ndu'ni tlyu xa' ñati̱ ji'i̱ jo'ó nu si'i ycui' Ndyosi laca, ¿ni cha' laca ndya'a̱ ma̱ ntucuaana ma̱ cha' tso'o nu ntsu'u ne' laa ji'i̱ ngu' bi'? 23Nacui̱ ma̱ cha' tso'o la tsiya' ti laca cha' nu nda jyo'o Moisés lo'o ma̱, pana ndyu'ni tsa ma̱ cha' cuxi lo'o ycui' Ndyosi nu lo'o ná ndaquiya' ma̱ ji'i̱ cha' bi'. 24Na ndu'ni ti ma̱ ñi'ya̱ nu nacui̱ quityi cusu', quityi ji'i̱ ycui' Ndyosi nu nchcui' ndi'ya̱: “Cuxi tsa nchcui' ngu' xa' tsu' ji'i̱ ycui' Ndyosi xqui'ya cu'ma̱”. Jua'a̱ cha' nscua lo quityi.
25Jlya tsa ti' ma̱ cha' nu nacui̱ cha' si'yu ma̱ quiji̱ ngu' qui'yu sñi' ma̱ lo'o tya cuañi' ngu', cha' culacua̱ ngu'. Tso'o tsa si lo'o taquiya' ma̱ lcaa cha' nu nda ycui' Ndyosi lo'o jyo'o Moisés; pana si ná taquiya' ma̱ lcaa cha' bi', cua laca ma̱ ñi'ya̱ si ná nsi'yu quiji̱ ma̱ tsiya' ti li'. 26Lo'o jua'a̱ nu ngu' xa' tsu' nu ná nsi'yu quiji̱ ngu' ni, si taquiya' ngu' bi' cha' nu nda Moisés lo'o na, li' stu'ba ti tucuá ycui' Ndyosi cha' ji'i̱ ngu' bi', ñi'ya̱ ntucuá Ni cha' ji'i̱ ngu' judío tya'a na nu cua nsi'yu quiji̱ ngu'. 27Chañi cha' ná ngua'a̱ cuayá' lo quiji̱ ngu' bi' jua'a̱; ná ntsu'u cha' bi' ji'i̱ ngu', cha' ngu' xa' tsu' laca ngu'. Pana si ndu'ni ngu' bi' lcaa cña nu nti' Ni cha' cua'ni ngu', ta ngu' cha' tyuju'u ti' ji'i̱ cu'ma̱ ngu' judío, cha' ná ndaquiya' ma̱ ji'i̱ cha' bi', masi cua ndyuna ma̱ cha' liñi ji'i̱ ycui' Ndyosi, masi cua ngua'a̱ cuayá' lo quiji̱ ma̱. 28Si'i na tyucui tyiquee ngu' judío laca na lo'o tacati tsa ndyu'ni na ji'i̱ ycui' Ni cha' ña'a̱ ti ngu' ji'na. Ná caca cña jua'a̱, masi ngua'a̱ cuayá' lo quiji̱ na; 29si'i jua'a̱ laca na ngu' judío. Tyucui tyiquee ngu' judío laca na lo'o xñi tso'o na cha' ji'i̱ ycui' Ndyosi; liñi la tyu'u cha' ji'na lo'o Ni si chca'a̱ cuayá' ji'i̱ ycui' Ndyosi ca ne' cresiya ji'na. Li' taca culo Ni cña ji'na lo'o Xtyi'i ycui' Ni, si'i lo'o sca cha' nu nscua lo quityi ti. Lo'o li' tso'o tsa cua'ni ycui' Ndyosi lo'o na, nga'aa si'i ñati̱ chalyuu ti nu chcui' tso'o ji'na li'.
Actualmente seleccionado:
ROMANOS 2: cta
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 1981, Wycliffe Bible Translators, Inc. All rights reserved.
