Logo de YouVersion
Ícono Búsqueda

SAN MATEO 1

1
Jyo'o cusu' ji'i̱ Jesucristo
1Nde nscua na' qui'i ti cha' ji'i̱ lcaa ñati̱ nu ngua jyo'o cusu' ji'i̱ Jesucristo, cha' ñati̱ tya'a ji'i̱ jyo'o David laca yu, lo'o jua'a̱ ñati̱ tya'a ji'i̱ jyo'o Abraham laca yu, masi tyijyu' ti.
2Jyo'o Abraham bi' ngua sti Isaac;
li' jyo'o Isaac bi' ngua sti Jacob;
li' jyo'o Jacob bi' ngua sti Judá lo'o ca ta'a tya'a ngula yu;
3li' jyo'o Judá bi' ngua sti Fares lo'o Zara, lo'o Tamar ngua naa xtya'a̱ ngu' bi'.
Li' jyo'o Fares bi' ngua sti Esrom;
li' jyo'o Esrom bi' ngua sti Aram;
4li' jyo'o Aram bi' ngua sti Aminadab;
li' jyo'o Aminadab bi' ngua sti Naasón;
li' jyo'o Naasón bi' ngua sti Salmón;
5li' jyo'o Salmón bi' ngua sti Booz, lo'o Rahab ngua naa xtya'a̱ Booz bi'.
Li' jyo'o Booz bi' ngua sti Obed, lo'o Rut ngua naa xtya'a̱ Obed bi'.
Li' jyo'o Obed bi' ngua sti Isaí;
6li' jyo'o Isaí bi' ngua sti rey David;
li' jyo'o rey David ngua sti Salomón, lo'o xtya'a̱ Salomón bi' ngua nu cuna'a̱ nu ngua clyo'o jyo'o Urías clyo.
7Lo'o li' jyo'o Salomón bi' ngua sti Roboam;
li' jyo'o Roboam bi' ngua sti Abías;
li' jyo'o Abías bi' ngua sti Asa;
8li' jyo'o Asa bi' ngua sti Josafat;
li' jyo'o Josafat bi' ngua sti Joram;
li' jyo'o Joram bi' ngua sti Uzías;
9li' jyo'o Uzías bi' ngua sti Jotam;
li' jyo'o Jotam bi' ngua sti Acaz;
li' jyo'o Acaz bi' ngua sti Ezequías;
10li' jyo'o Ezequías bi' ngua sti Manasés;
li' jyo'o Manasés bi' ngua sti Amón;
li' jyo'o Amón bi' ngua sti Josías;
11li' jyo'o Josías bi' ngua sti Jeconías lo'o tya'a ngula yu.
Tyempo bi' ndyaa lo'o ngu' Babilonia ji'i̱ ngu' Israel ca quichi̱ tyi ngu' ca tyijyu', ne' chcua̱ ji'i̱ ngu' Babilonia ndyaa quiña'a̱ tsa ngu' Israel bi' li'.
12Ca tyijyu' bi' ngula Salatiel sñi' jyo'o Jeconías bi';
li' jyo'o Salatiel bi' ngua sti Zorobabel;
13li' jyo'o Zorobabel bi' ngua sti Abiud;
li' jyo'o Abiud bi' ngua sti Eliaquim;
li' jyo'o Eliaquim bi' ngua sti Azor;
14li' jyo'o Azor bi' ngua sti Sadoc;
li' jyo'o Sadoc bi' ngua sti Aquim;
li' jyo'o Aquim bi' ngua sti Eliud;
15li' jyo'o Eliud bi' ngua sti Eleazar;
li' jyo'o Eleazar bi' ngua sti Matán;
li' jyo'o Matán bi' ngua sti Jacob.
16Lo'o li' sñi' jyo'o Jacob bi' ngua José nu ngua clyo'o María xtya'a̱ Jesús,
lo'o jua'a̱ Cristo naa Jesús bi'.
17Jua'a̱ naa jyo'o ngu' cusu' bi', tii jlyacua tya'a ba'a ngu' lo'o ngutu'ú Abraham ña'a̱ cuayá' nu ngula jyo'o David. La cui' jua'a̱ tya tii jlyacua tya'a ba'a ngu' lo'o ngutu'ú jyo'o David, ña'a̱ cuayá' nu ndyaa lo'o ngu' xa' tsu' ji'i̱ ngu' Israel ca quichi̱ tyi ngu', nu lo'o ngusu'ba ngu' ji'i̱ ngu' Israel ne' chcua̱ ca quichi̱ Babilonia tyijyu'. Lo'o la cui' jua'a̱ tya tii jlyacua tya'a ba'a ngu', li' ngula nu laca Cristo.
Ñi'ya̱ ngua lo'o ngula Jesucristo
18Nde nscua na' ñi'ya̱ ngua lo'o ngula Jesucristo. Cua ngüiñi cha' ji'i̱ María bi', cha' caja clyo'o lo'o nu José sñi' Jacob bi'. Bilya tyalaa María slo José nu lo'o ngua cuayá' ti' nu María bi', cha' cua ntsu'u sñi'; cña ji'i̱ Xtyi'i ycui' Ndyosi ngua bi', cha' ngua tana María bi'. 19Pana nu José bi' ni, tya'na ti' yu ji'i̱ María, tso'o tsa ntsu'u tyiquee yu ña'a̱ yu ji'i̱. Lo'o cua ndyuna yu cha' bi', ná nti' yu ta yu cha' tyuju'u ti' ji'i̱ Mariá, masi nga'aa caja clyo'o yu lo'o xqui'ya sñi', ngua ti' yu; tye cha' jua'a̱ ti ngua ti' yu, cha' ná nti' yu sta yu qui'ya ji'i̱ ca toni'i̱ cña. 20Laja lo'o nclyacua ti' yu ni cha' laca ngua jua'a̱, li' ndu'u tucua sca xca̱ ji'i̱ ycui' Ndyosi slo yu laja xcalá yu. Nchcui' xca̱ bi' lo'o yu li':
―José ―nacui̱ xca̱ ji'i̱ yu―, ñati̱ tya'a ji'i̱ jyo'o David laca nu'u̱ ―nacui̱―. Ná cutsi̱i̱ nu'u̱ caja clyo'o lo'o Mariá, cha' ca̱a̱ cho' toni'i̱ jinu'u̱. Si'i na cuxi ngua'ni María bi' tsiya' ti; cña nu ngua'ni Xtyi'i ycui' Ndyosi laca cha' ntsu'u sñi' Mariá juani. 21Lo'o cala sñi' nu cuna'a̱ bi', cubi' qui'yu caca nu bi'. Lo'o xcua xtañi cubi' bi' li', bi' ca naa Jesús. Lo'o nu Jesús bi' ni, bi' laca nu cua'ni lyaá ji'i̱ ñati̱ nu ntsu'u cha' ji'i̱ lo'o ycui' Ni, cha' clyaá ngu' ji'i̱ qui'ya nu ntsu'u ji'i̱ ngu'.
22Lo'o jua'a̱ ngua cha' bi', cha' nu cua nchcui' ycui' Ndyosi lo'o ngu' sa'ni cha' jua'a̱ caca. Tyempo sa'ni nguscua jyo'o cusu' nu ngua tu'ba ji'i̱ ycui' Ndyosi cha' bi' lo quityi. Ndi'ya̱ nguscua ngu':
23Caca tana sca nu cuna'a̱ nu ntucua ycui' ti, lo'o li' qui'yu caca sñi';
Emanuel ñacui̱ ngu' ji'i̱ cubi' bi'.
Jua'a̱ nscua lo quityi, bi' cha' jua'a̱ ngua ji'i̱ María li'. Nu nchcui' ngu' Emanuel ni, ndi'ya̱ nti' ñacui̱ cha' bi': Ndi'i̱ ycui' Ndyosi lo'o na.
24Lo'o li' ngue ti' José, ndu'u yu ndyaa yu slo María cha' caja clyo'o yu lo'o, ñi'ya̱ nu nacui̱ xca̱ ji'i̱ ycui' Ndyosi ji'i̱ yu. Li' ñaa lo'o yu ji'i̱ ca toni'i̱ ji'i̱ yu, 25pana ná ngujua' yu lo'o ña'a̱ cuayá' nu cua ngula sñi'. Lo'o cua ngula cubi', li' ngua naa Jesús.

Actualmente seleccionado:

SAN MATEO 1: cta

Destacar

Compartir

Copiar

None

¿Quieres guardar tus resaltados en todos tus dispositivos? Regístrate o Inicia sesión

YouVersion utiliza cookies para personalizar su experiencia. Al usar nuestro sitio web, acepta nuestro uso de cookies como se describe en nuestra Política de privacidad