Números 6
6
Nazareo kar imano kawananpaqpis tantiyasishqan
1Moiséstami Tayta Dios nirqan: 2<<Israel runakunata niy: <Mayqan runapis o mayqan warmipis nazareo kananpaq Tayta Diosta promitirqa 3manami vïnuta ni ima shinkäsikuqtapis upunqasu. Saynöpis manami upunqasu üvapita rurash vinagrita ni üvapa yakuntapis. Manami üvata ni päsastapis mikunqasu.#Luc. 1.15. 4Nazareo kananpaq promitishqanta cumplishqanyaq manami imatapis üvapita rurash kaqta mikunqasu ni upunqasu. 5Nazareo karqa Tayta Diospaq santumi kanqa. Saymi nazareo kananpaq promitishqanta cumplishqanyaq aqsanta rutukunqasu. 6Nazareo kaykarqa pï wanuptinpis ayaman ama witipäsunsu. 7Maman wanuptinpis, taytan wanuptinpis, wawqin wanuptinpis ni panin wanuptinpis impüru mana kananpaq ama witipäsunsu. Sayno ama witipäsunsu Tayta Diospaq consagrädu kashqanta cumplir. 8Nazareo kananpaq Tayta Diosta promitishqanta cumplishqanyaqmi say runa o say warmi consagrädu kanqa.
9<< <Nawpancho pipis elaqpita wanuptinqa Tayta Diospaq consagrashqan aqsan impürumi rikakunqa. Saymi qanchis junaq päsarkuptin aqsanta rutukunqa purificakunanpaq. 10Saypita waraynin junaqnami ishkay kulkushkunata karpis o ishkay pushapa palumakunata karpis Tinkuna Toldu patiuman apaykur cürata entreganqa. 11Cüranami jukta purificasina sacrificiupaq y jukaqtana rupasina sacrificiupaq rupasinqa. Saynöpami say nazareo runa o nazareo warmi püru rikakunqa. Aqsanpis yapaymi Tayta Diospaq consagrädu kanqa. 12Saynöpis watayuq carnishta consagrasina sacrificiupaq apamurmi yapay nazareo runa o nazareo warmi kanqa. Isanqa impüruyayninpami nawpata nazareo kashqan tiempupis manakaqlapaqna kanqa. Saymi nazareo kayta qalaykunanpita yapay cumplinqa promitishqan tiempu cumplishqanyaq.
13<< <Nazareo kayman yaykushqan tiempu cumplirkuptinnami Tinkuna Toldu patiuman shamunqa. 14Sayman shamurmi juk watayuq carnishta rupasina sacrificiupaq apamunqa, juk watayuq china uyshata purificasina sacrificiupaq apamunqa y juk carnita jawka kawakuy sacrificiupaq apamunqa. Say uywakunaqa lapanpis sänumi kayanqa. 15Saynöpis alinnin jarinapita rurash levadüraynaq tantata canastawan apamunqa. Say tantaqa aceitiwan masarashqami kanqa. Say canastamanmi winanqa aceitiwan lushipash levadüraynaq llapsha tantata, saki mikuy ofrendakunata y vïnutapis.
16<< <Saykunata chaskirkurmi purificasina sacrificiuta Tayta Diospa nawpancho cüra rupasinqa. Saypitanami rupasina sacrificiutapis rupasinqa. 17Nirkurnami jawka kawakuy sacrificiupaq apayämushqan carnita y canastacho levadüraynaq tantakunatapis Tayta Diospaq joqarkur wakman kayman kuyusinqa. Saynöpis apamushqan saki mikuyta y vïnutami altarman winapanqa. 18Say hörami nazareo runa aqsanta Tinkuna Toldu patiucho rutukunqa. Say consagrädu aqsatanami jawka kawakuy sacrificiu rupaykashqan ninaman qaykunqa.
19<< <Nirkurnami rutukush nazareo runata cüra makyanqa calduypa yanush carnipa palitillanta. Saynöpis canastapita makyanqa levadüraynaq juk tantata y levadüraynaq llapsha tantatapis. 20Saykunata nazareo runapita yapay shuntarkurnami Tayta Diospa nawpancho joqarkur wakman kayman kuyusinqa. Saypitanami sagrädu kar cürapaq kanqa. Saynöpis cürapaq kanqa Tayta Diospa nawpancho wakman kayman kuyusishqan qasqunwan#6.20 Wakin runakunaqa pëchunwan niyan. aluq kaq chankanpis. Saypitaqa nazareo runa vïnuta upunmannami.
21<< <Nazareo runa aypäpakurqa ofrendatapis uywatapis masta apamunqa. Nazareo kananpaq Tayta Diosta promitirqa ley nishqannöla lapantapis cumplinqa> >>.#Hech. 21.23-24.
Cürakuna bendicionta qor imata niyänanpaq kashqanpis
22Moiséstami Tayta Dios nirqan: 23<<Aarónta y surinkunata yäsinki Israel runakunata bendicionta qor niyänanpaq:
24<< <Tayta Dios bendicionninta churamur ima peligrupitapis sapaykuläshunki.
25 Tayta Dios ali rikashushpayki imaypis kuyapaykuläshunki.
26 Tayta Dios imachöpis kuyapäyäshushpayki ali kawayänaykipaq yanapaykuyäläshunki>.
27<<Saynöpami Israel runakunata yanapänäpaq jutïta joqarir cürakuna manakayämanqa. Sayno manakayämaptinmi bendicionnïta qoshaq>>.
Actualmente seleccionado:
Números 6: qvhB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.
