Números 18

Cürakunata levitakuna yanapäyänanpaq nishqan

1Saypitanami Aarónta Tayta Dios nirqan: <<Qampis, surikikunapis y Leví trïbu mayikikunapis Sagrädu Tolducho imatapis lutanta rurarqa jusayuqmi rikakuyanki. Cüra rurananpaq kaqkunata imatapis lutanta rurarmi isanqa qam y surikikunala jusayuq rikakuyanki.

2<<Leví trïbu mayikikunata wilanki qamta y surikikunata yanapäyäshunaykipaq. Paykunami Pactu Tolducho sirviyaptiki ima ruraykunachöpis yanapäyäshunki. 3Nishqaykita rurarmi say tolduta täpayanqa. Isanqa sagrädu kaqkunaman ama witipäyanqasu ni patiucho kaykaq altarpa nawpanmanpis ama yaykuyanqasu. Yaykur o witipar imarqa paykunapis qamkunapis wanuyankimi. 4Levitakunalami Tinkuna Tolducho ima ruraykunatapis ruräsiyäshunki. Jäpa runakunataqa pitapis ama minkakuyankisu.

5<<Qamkunalami altarcho y tolducho rurayänaykipaq kaqkunata rurayanki. Kay nishqäkunata cäsukuyaptikiqa Israel runakunata mananami castigashaqnasu. 6Israel runakunapita Leví trïbu mayikikunata noqami akrashkä Tinkuna Tolducho ruraykunata ruräsiyäshunaykipaq. 7Qamta y surikikunata sirvimaq cüra kayänaykipaq churash kaptïmi qamkunala altarcho y Lugar Santïsimucho rurayänaykipaq kaqkunata rurayanki. Jäpa runa kaykar pipis sayman yaykuq kaqmi isanqa wanunqa>>.

Cürakunapa derëchun ima kashqanpis

8Saypitanami Aarónta Tayta Dios nirqan: <<Israel runakuna noqapaq apayämushqanta qammi cuidanki. Say apayämushqan sagrädu kaqkunata qamtawan surikikunatami qoykushkä. Kay nishqäkunaqa imayyaqpis leymi qamkunapaq kanqa. 9Israel runakuna sacrificiupaq apamur altarcho mana rupasiyashqankunaqa qamkunapaqmi kanqa saki mikuy ofrenda karpis, purificasina sacrificiu karpis y consagrasina sacrificiu karpis. Lapanpis say sagrädu kaqkuna qampaqwan surikikunapaqmi kanqa. 10Olqu kaqkunala say sagrädu kaqkunata sagrädu sitiucho mikuyanki.

11<<Saynöpis nawpächo joqarkur wakman kayman kuyusishqayki ofrendakuna qampaq, olqu surikikunapaq y warmi surikikunapaqmi kanqa. Say ofrendakunataqa püru kaqkunalami mikuyanqa. Kay nishqäkunaqa imayyaqpis leymi qamkunapaq y qamkunapita miraqkunapaqpis kanqa.

12<<Saynöpis punta poquqta cosechayashqanpita alinnin kaq aceitita, vïnuta y trïguta noqapaq primiciata apayämushqankuna qampaqmi kanqa. 13Lapan cosëchankunapita punta poquqkunata noqapaq apayämushqankunapis qampaqmi kanqa. Isanqa saykunata mikuyanqa püru kaq aylluykikunalami. 14Israel runakuna imatapis noqapaq apayämushqan#Lev. 27.28. lapanpis qampaqmi kanqa.

15<<Israel runakunapa qechpa olqu wamrankuna y malta uywakunapa punta yuriq orqu wawankunapis noqapaq apayämushqanqa qampaqmi kanqa. Sayno kaptinpis qechpa wamranta y impüru uywakunapa punta yuriq wawanta entregayäshunaykipa trukanqa qellaytami apayämunqa. 16Yurishqanpita juk killayuq kaykaptinmi apayämunqa pisqa siclo qellayta. Say qellaykunata pësanqa Tinkunansi Sagrädu Tolducho kaykaq pësakunawanmi. Say pësakunawan pësaptin juk siclo kanqa chunka juk grämu qellaymi.

17<<Wäkapa, uyshapa y cabrapa punta yuriq wawanpa chaninta apayämunanpa trukanqa kikin uywata apayämunqa. Saykuna noqapaq kaptin pishtarkur altar jananman yawarninta jichanki. Wirantapis altar janancho rupasinki. Say rupasishqaykipa mushkuyninmi noqapa shonqüpaqno kanqa. 18Say uywakunapa aysanpis qampaqmi kanqa. Nawpächo joqarkur wakman kayman kuyusishqayki uywapa aluq kaq chankanwan qasqunpis#18.18 Wakin runakunaqa pëchunpis niyanmi. qampaqmi kanqa. 19Israel runakuna noqapaq lapan apayämushqanpis qampaq, olqu surikikunapaq y warmi surikikunapaqmi kanqa. Kay nishqäkunaqa imayyaqpis leymi qampaq y qampita miraqkunapaqpis kanqa. Qampaq y qampita miraqkunapaq imayyaqpis sayno kananpaqmi promitiykä>>.

Levitakunapa derëchun ima kashqanpis

20Saypitanami Aarónta Tayta Dios nirqan: <<Israel runakuna aywaykäyashqan nacionman chaykur chakrankunata chaskiyaptin qampis ni surikikunapis manami chaskiyankisu. Chakrata chaskiyänaykipa trukanqa noqami qamkunapa herenciayki kashaq. 21Leví trïbu mayikikunapaqnami Israel runakuna apayämushqan diezmukuna kanqa. Say diezmukuna paykunapaq kanqa Tinkuna Tolducho sirviyämaptinmi.#Lev. 27.30-33; Deut. 14.22-29; Mal. 3.8-10.

22<<Leví trïbupita mana kaykar Tinkuna Tolduman pipis witipaq kaqqa wanunqami. 23Sayno kaykaptinqa levitakunalami Tinkuna Tolducho rurayänanpaq kaqkunata rurayanqa. Saycho imatapis lutanta rurarqa jusayuqmi rikakuyanqa. Say nishqäkunaqa imayyaqpis leymi qamkunapaq y qamkunapita miraqkunapaqpis kanqa.

<<Israel nacioncho levitakunapa chakrankuna manami kanqasu. 24Sayno kanqasu Israel runakuna noqapaq apayämushqan diezmukuna paykunapaq kaptinmi>>.

25Nirkurmi Moisésta Tayta Dios nirqan: 26<<Levitakunata niy: <Israel mayikikuna apayämushqan diezmumi qamkunapa herenciaykikuna kanqa. Apayämushqan diezmupita qamkunapis diezmuta rakirir Tayta Diospaq apayämunki. 27Say diezmutami Tayta Dios chaskinqa Israel mayikikuna trïgunpita o vïnunpita diezmuta apayämuptin chaskishqannöla. 28Saymi Israel mayikikuna apayämushqan diezmuta chaskir qamkunapis saypita diezmuta Tayta Diospaq apamur cüra Aarónta entregayanki. 29Imata chaskirpis alinnin kaqtaqa imaypis Tayta Diospaq apayämunki>.

30<<Levitakunata mastapis niy: <Alinnin kaqta apayämuptikimi Israel mayikikuna trïgunpita o vïnunpita diezmuta apayämuptin chaskishqannöla Tayta Dios chaskinqa. 31Pusuq kaqtaqa lapan castaykikunawan maychöpis mikuyanki. Tinkuna Tolducho aruyashqaykipita päguykikunami say kanqa. 32Alinnin kaqta Tayta Diospaq apamurqa pusuq kaqta mikurpis manami jusayuqsu kayanki. Israel mayikikuna apayämushqan diezmukunata lapanta sarikurqa manami sagrädutanösu cuentayanki. Sayno rurarqa Tayta Diospa castïgunwanmi wanuyanki> >>.

Actualmente seleccionado:

Números 18: qvhB

Destacar

Copiar

Comparar