Números 10
10
Qellaypita rurash cornëtakunata tukayashqan
1Moiséstami Tayta Dios nirqan: 2<<Martilluwan takapaylapa qellaypita ishkay cornëtakunata rurasinki. Say cornëtakunata tukasinki runakuna shuntakäyänanpaq y aywayänanpaqpis. 3Ishkay cornëtakunata tukayaptinmi Tinkuna Toldu punkuman lapan runakuna shamur nawpaykiman shuntakäyanqa. 4Juk cornëtalata tukaptinqa cada trïbupa mandaqninkunalami shayämunqa.
5<<Aywalay tönuta tukayaptinmi Tinkunansi Sagrädu Toldupa inti jeqamunan kaqlänincho posädaraykaq runakuna toldunkunata shuntarkur aywar qalaykuyanqa. 6Saypita yapay cornëtata tukaptinmi Tinkunansi Sagrädu Toldupa sur kaqlänincho posädaraykaq runakuna toldunkunata shuntarkur aywar qalaykuyanqa. Saynömi tukanqa cadaläpita yarquyänanpaq.
7<<Runakuna shuntakäyänalanpaq kaptinqa jukno tönuta tukasinki. 8Cornëtata tukaqkunaqa Aarón ayllu cürakunalami kayanqa. Say nishqäkunaqa imayyaqpis leymi qamkunapaq y qamkunapita miraqkunapaqpis kanqa.
9<<Nacionnikiman contraykikuna shamur atacayäshuptiki guërraman yarquyänaykipaq cornëtata tukayanki. Saynöpami yanapäshayki contraykikunata vinciyänaykipaq. 10Saynölami cornëtata tukayanki fiesta kaptin, lulu killa kaptin, sacrificiuta rupasiyashpayki y jawka kawakuy sacrificiuta rupasiyashpaykipis. Saynöpami qamkunata promitishqäta yarpar imaypis yanapäyäshayki. Noqami Tayta Diosniki kaykä>>.
Sinaí jirkapita Israel runakuna aywakuyashqan
11Egiptupita yarquyashqanpita juk wata y juk killa cumplirkur ishkay chunka (20) junaq kaykaptinnami Pactu Toldu jananpita pukutay aywar qalaykurqan. 12Saymi Sinaí jirkapita Israel runakuna trïbunpa trïbunpa qatinaylanpa aywaykäyaptin Parán niyashqan sunyaq jirkacho pukutay ichikuykurqan.
13Sinaípita yarqur Moisésta Tayta Dios yäsishqannölami#Núm. 2.1-34. 14Judá trïbu runakuna bandërankunawan puntata aywayarqan. Paykunawan juntumi ishkay trïbu runakunapis#10.14 Judá trïbu runakunawan juntu aywayaq runakunaqa Isacar trïbu y Zabulón trïbu runakunami kayarqan. Saypita musyanaykipaq liyinki Núm. 2.3-9. aywayarqan. Judá trïbupa mandaqninmi karqan Aminadabpa surin Naasón. 15Isacar trïbupa mandaqninmi karqan Zuarpa surin Natanael. 16Zabulón trïbupa mandaqninnami karqan Helónpa surin Eliab.
17Paykunapa qepantanami aywayarqan Gersónpita miraq runakuna y Meraripita miraq runakunapis. Paykunami Sagrädu Tolduta paskarir apayarqan.
18Paykunapa qepantanami Rubén trïbu runakuna bandërankunawan aywayarqan. Paykunawan juntumi ishkay trïbu runakunapis#10.18 Rubén trïbu runakunawan juntu aywaq runakunaqa Simeón trïbu y Gad trïbu runakunami kayarqan. Sayta musyanaykipaq liyinki Núm. 2.10-16. aywayarqan. Rubén trïbupa mandaqninmi karqan Sedeurpa surin Elisur. 19Simeón trïbupa mandaqninmi karqan Zurisadaipa surin Selumiel. 20Gad trïbupa mandaqninmi karqan Reuelpa surin Eliasaf.
21Paykunapa qepantanami Coatpita miraq runakuna aywayarqan Sagrädu Toldupa lapan manëjunkunata apakurkur. Nawpaq trïbu runakuna ichisiyashqan Sagrädu Tolduman chaykurmi apayashqan manëjukunata churayaq.
22Paykunapa qepantanami Efraín trïbu runakuna bandërankunawan aywayarqan. Paykunawan juntumi ishkay trïbu runakunapis aywayarqan.#10.22 Efraín trïbu runakunawan juntu aywaq runakunaqa Manasés trïbu y Benjamín trïbu runakunami karqan. Saypita musyanaykipaq liyinki Núm. 2.18-24. Efraín trïbupa mandaqninmi karqan Amiudpa surin Elisama. 23Manasés trïbupa mandaqninmi karqan Pedasurpa surin Gamaliel. 24Benjamín trïbupa mandaqninmi karqan Gedeonipa surin Abidán.
25Lapanpitapis mas qepantanami Dan trïbu runakuna bandërankunawan aywayarqan. Paykunawan juntumi ishkay trïbu runakunapis#10.25 Dan trïbu runakunawan juntu aywaq runakunaqa Aser trïbu y Neftalí trïbu runakunami kayarqan. Saypita musyanaykipaq liyinki Núm. 2.25-31. aywayarqan. Dan trïbupa mandaqninmi karqan Amisadaipa surin Ahiezer. 26Aser trïbupa mandaqninmi karqan Ocránpa surin Pagiel. 27Neftalí trïbupa mandaqninmi karqan Enánpa surin Ahira.
28Saynömi Israel runakuna trïbunpa trïbunpa qatinaylanpa aywayarqan.
Walkinanpaq cuñädun Hobabta Moisés ruwakushqan
29Madianita Ragüelpa#Éxo. 2.16. surin Hobabmi Moiséspa cuñädun karqan. Paytami Moisés nirqan: <<Yanapäyämänanpaqmi Tayta Dios promitiyämash. Saymi Tayta Dios rikasiyämänanpaq kaqman aywayäshaq. Walkiykayälämay, tayta. Bendicionta chaskiyashqäta rakipäyäshaykimi>>.
30Sayno niptinmi Hobab nirqan: <<Manami kamäpakushaqsu. Markächo ayllükunamanmi kutikushaq>>.
31Niptinmi Moisés nirqan: <<Ama kutikuysu. Lapan jirkakunatami qam reqinki. Maycho posädakunansipaq ali kashqantapis musyankimi. Saymi qamta ruwakü reqisimar pushayämänaykipaq. 32Noqakunawan aywaptikiqa Tayta Dios kamaripämashqansita rakipänakushunmi>>.
33Sinaí jirkapita aywakurmi Israel runakuna kimsa junaq aywayta aywayarqan. Pactu Babultami puntanta apayarqan posädakuyänanpaq sitiuta tariyashqanyaq. 34Campamentupita yarquyashqanpitami Tayta Dios kachamushqan pukutay cada junaq paykunapa jananpa aywarqan. 35Puntata aywananpaq Pactu Babulta yarqasiyaptinmi Moisés nirqan:
<<Favornïkuna sharkuykulay, Tayta Dios.
Contraykikuna mashipa mashir qeshpiyäsun.
Chikishuqnikikunapis nawpaykipita qeshpir aywakuyäsun>>.#Sal. 68.1.
36Babulta ichisiyaptinnami Moisés nirqan: <<Tayta Dios, yupaytapis mana atipaypaq Israel runakunaman kutimuyna>>.
Actualmente seleccionado:
Números 10: qvhB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.
