Levítico 21
21
Cürakuna imano kayänanpaqpis nishqan
1Moiséstami Tayta Dios nirqan: <<Aarónpita miraq cürakunata niy: <Cüra impüru mana rikakunanpaq ayllun wanuptinpis ayanta ama yatanqasu. 2Mamanpa, taytanpa, surinpa, wawqinpa ayantami isanqa yatanman. 3Doncëlla paninpa ayantapis yatanmanmi. Impüru rikakunan kaptinpis paykunapa ayantaqa yatanmanmi. 4Warminpa ayllun wanuptinmi isanqa impüru mana rikakunanpaq ayanta ama yatanqasu.
5<< <Pï wanuptinpis lakikur aqsanta ni shaprantapis cüra ama rutukunqasu. Qarantapis pishtaypa pishtar ama kusukunqasu.#21.5 Say wisan Baal diosta adorarmi runakuna qaranta pishtaypa pishtar kusukuyaq. Saypita masta musyanaykipaq liyinki 1Rey. 18.28.#Lev. 19.27-28; Deut. 14.1. 6Saypa trukanqa Dios munashqanta rurar cürakuna santu kawayanqa. Runakuna apayämushqanta altarcho rupasiyänanpaqmi cürakunata Tayta Dios akrash. Say rupasishqankunami Tayta Diospa mikuynin kanqa. Sayno kaykaptinqa Tayta Diospaq santu kayanqa.
7<< <Cürakunataqa Tayta Diosmi akrash santu kayänanpaq. Sayno kaykaptinqa ama majasakäyäsunsu prostitütawan, violash warmiwan o runanpita rakikash warmiwanqa.
8<< <Cürakuna santu kayashqanta Israel runakuna tantiyakuyäsun. Paykunata respitayanqa noqapaq apayämushqanta altarcho rupasiq kayashqanpita y noqa santu kashqäpita. Noqami qamkunata akrashkä santu kayänaykipaq.
9<< <Cürapa jipash surin prostitüta rikakurqa papänintami penqayman churan. Say niraq jipashtaqa kawaykaqta rupasiyanki.
10<< <Mandaq cüralami sagrädu mödanataqa jatikunqa. Sayta jatikunqa mandaq cüra kananpaq umanman sagrädu aceitita winapash kaptinmi. Saymi wanupakurpis tinsha uma purinqasu ni mödanantapis rachinqasu. 11Maman wanuptinpis o taytan wanuptinpis sutaraykashqan kaqman ama yaykunqasu. Sayman yaykurqa impürumi rikakunqa. 12Sagrädu aceitita umanman winapash kaykar ayaman aywarqa Tayta Diospa Sagrädu Tolduntapis impüruyäsinqami. Noqami Tayta Dios kaykä.
13<< <Mandaq cüraqa doncëlla jipashta warminpaq ashinqa. 14Manami majasakanmansu viüdawan, runanpita rakikash warmiwan, violash warmiwan ni prostitütawanpis. Warminpaq ashirqa Leví trïbupita doncëlla jipashta ashinqa. 15Sayno majasakaptinqa paypita miraqkunata manami jamuräyanqasu. Mandaq cürataqa noqa Tayta Diosmi akrashkä santu kananpaq> >>.
Sänu kaqkunala cüra kayänanpaq nishqan
16Mastapis Moisésta Tayta Dios nirqan: 17<<Aarónta ninki: <Qampita miraqkuna sänu kaqkunalami cüra kayman yaykuyanqa. Paykunalami Tayta Diospaq runakuna apayämushqanta altarcho rupasiyanqa. Say rupasiyashqanqa Tayta Diospa mikuyninmi kaykan. 18Saymi mandaq cüra kayänanpaq yaykuyanqasu qaprakuna, weqrukuna, sera cärayuqkuna, makllukuna, 19chankan o rikran pakikushkuna, 20kurkuyashkuna, pichikuna, nübiyash nawiyuqkuna, qarachukuna, chupuwan qeshyaqkuna y runtun däñashkunapis. 21Aarónpita miraqkuna sänu mana karqa Tayta Diospaq apayämushqanta manami altarcho rupasiyanqasu. Sänu kaqkunalami rupasiyanqa. 22Altarcho mana rupasirpis Tayta Diospaq apayämushqan sagrädu mikuytami isanqa mikuyanqa. 23Saynöpis cortïnata ama päsayanqasu, Lugar Santïsimumanpis ama yaykuyanqasu ni altarmanpis ama witiyanqasu. Sayman witirqa Sagrädu Tolduta manami respitaykäyansu. Noqa Tayta Diosmi paykunata akrashkä santu kayänanpaq> >>.
24Tayta Dios sayno nishqantami Moisés wilarqan Aarónta, Aarónpa surinkunata y lapan Israel runakunatapis.
Actualmente seleccionado:
Levítico 21: qvhB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.
