Gálatas 3

Pablo lakikushqan

1¡Mana tantiyakuq Galacia runakuna! Noqansi rayku Jesucristo cruzcho wanushqanta shumaqmi tantiyayarqayki. Sayno kaykaptinqa ¿pitaq kuchipa tulunta amupaykuyäshushkanki [lutan yachasikuyta chaskikuyänaykipaq]? 2Kanan mä wilayämay. ¿Qamkuna Moisés qelqashqan leykunata cumplirku o Jesucristupa wilakuyninta wiyar payman yärakurku Espíritu Santuta chaskikuyashkanki? 3¿Pasaypa mana tantiyakuqnaku kaykuyanki? Espíritu Santu yanapäyäshuptikimi Tayta Dios munashqanno kawayta qalaykuyashkanki. Sayno kaykaptinqa ¿imanirtaq Espíritu Santuta mana cäsur Moisés qelqashqan leykunata cumpliyta munaykäyanki? 4Sayno karqa ¿manakaqlapaqsuraq Jesucristuta chaskikuyashqaykipita nakayashkanki? Manachi manakaqlapaqqa nakayankimansu karqan.

5¿Say leykunata cumpliyashqaykipitasuraq Tayta Dios Espíritu Santuta qoyäshushkanki? Saynöpis ¿leykunata cumpliyashqaykipitasuraq qamkunacho milagrukunata ruran? Manami saypitasu, sinöqa Jesucristupa ali wilakuyninta wiyar payman yärakuyashqaykipitami.

Abrahamno yärakur salvash kashqansi

6Yärakuptinmi Abrahamtapis jusaynaqtana Tayta Dios chaskirqan.#Gén. 15.6; Rom. 4.3. 7Shumaq tantiyakuyay. Tayta Diosman noqansipis yärakurqa mayqan ayllu karpis Abrahampa ayllunmi kaykansi.#Rom. 4.16.

8Tayta Diospa palabranmi nikan mana Israel runakunatapis payman yärakuyashqanpita Tayta Dios perdonananpaq kashqanta. Saymi ali wilakuyninta Abrahamta wilapar Tayta Dios nirqan: <<Qam kaynikipami lapan casta runakunapis bendicionnïta chaskiyanqa>>.#Gén. 12.3.

9Saymi Tayta Diosman yärakur Abraham bendicionta chaskishqanno noqansipis bendicionta chaskiykansi.#3.9 Say bendicionqa salvacionmi kaykan (Hech. 3.26).

10 Moisés qelqashqan leykunata cumpliyashqanpita salvash kayashqanta yarpaqkunaqa lapanpis maldicionädumi kaykäyan. Tayta Diospa palabranchöpis kaynömi qelqaraykan: <<Qelqaraykaq leykunata lapanta mana cumpliq kaqqa maldicionashqami kanqa>>.#Deut. 27.26.

11Sayno kaykaptinqa Moisés qelqashqan leykunawanqa manami mayqanpis salvakuyanqasu. Saypa trukanqa Tayta Diospa palabrancho nikan: <<Munashqäno kawaq runaqa noqaman yärakamarmi kawanqa>>.#Hab. 2.4; Rom. 1.17.

12Moisés qelqashqan leykuna manami Diosman yärakur salvakunansipaqsu parlan, sinöqa kaynömi nin: <<Leynïkunata cumpliq kaq runaqa lapantami cumplinman>>.#Lev. 18.5; Rom. 10.5.

13Isanqa say leykunata cumpliyta mana kamäpakurmi maldicionädu karqansi. Saymi noqansipa trukansi maldicionädu runano wanur Jesucristo salvamashkansi. Tayta Diospa palabranchöpis kaynömi qelqaraykan: <<Pï runapa ayanpis qerucho warkaraptin maldicionashqami kanqa>>.#Deut. 21.23.

14Jesucristupis sayno wanurqan Abrahamta Tayta Dios promitishqan bendicionta mana Israel runakunapis chaskikuyänanpaqmi. Saymi Jesucristuman yärakur Tayta Dios promitishqan Espíritu Santuta chaskikunsi.

Abrahamta Tayta Dios promitishqan

15Wawqi panikuna, kananqa runakuna rurayashqan testamentuman tinkusiypami tantiyasiyäshayki. Musyashqansinöpis testamentuta rurar firmaptinqa manami pipis manakaqman churannasu ni imatapis yapannasu. Saynölami Tayta Dios promitishqanpis kaykan.

16Pay promitishqanqa Abrahampaq y paypita miraqpaqmi kaykan. Manami Abrahampita lapan miraqkunapaq kashqantasu Tayta Dios nirqan, sinöqa paypita miraq juklaylapaq kashqantami.#3.16 Sayno nikan Gén. 12.7 versïculuchömi. Hebreo y griego idiömachöqa aska miraqkuna nishqan y juklayla miraq nishqanpis say palabralami kaykan. Sayno nir Jesucristupaqmi parlaykarqan.

17Saymi nï: Abrahamwan pactuta [Cristucho] rurashqanpita chusku pachak kimsa chunka (430) wata qepataraqmi Tayta Dios leyninkunata Moisésta entregarqan.#Éxo. 12.40. Qepataraq shamush karmi Abrahamta promitishqanta anulashsu. 18Saymi Moisés qelqashqan leykunata cumplishqansipitasu salvacionta chaskinsi, sinöqa Abrahamta promitishqanta Tayta Dios cumpliptinmi. Moisés qelqashqan leykunata cumplishqansipita salvakunansipaq kaptinqa Tayta Dios promitishqanpis walälapaqmi kanman karqan.#Rom. 4.14.

Moisés qelqashqan leykuna imapaq kashqanpis

19Sayno kaptinqa ¿imapaqtaq say leykuna kaykan? Say leykunata Moisésta entregarqan runakuna jusayuq kayashqanta tantiyakuyänanpaqmi.#Rom. 3.20; 7.7. Saynöpis say leykuna karqan Jesucristo shamushqanyaqlami. Paymi kaykan Abrahamta Tayta Dios promitishqan runa.

Saynöpis Tayta Dios leyninkunata angilkunawanmi Moisésta entregasirqan.#Hech. 7.38, 53; Heb. 2.2. Moisésnami say leykunata runakunata wilaparqan. 20Abrahamta promitirmi isanqa jukwan wilakasinanpa trukanqa kikin Tayta Dios parlaparqan.

21Sayno kaykaptinqa ¿Tayta Diospa leyninkuna salvamänansipaqsuraq kaykan? ¡Manami! Say leykuna salvamänansipaq kaptinqa promitishqanta Tayta Dios manakaqmanmi churanman karqan. Salvamänansipaq kaptinqa leyninkunata cumplirmi salvakushwan karqan. 22Isanqa Tayta Diospa palabran nikan lapansipis jusayuq kashqansitami. Jesucristuman yärakurraqmi Tayta Dios promitishqanta chaskikur salvakunsi.

23Jesucristuman manaraq yärakushqami Moisés qelqashqan leykuna munaynincho sararämarqansi. Sayno sararämarqansi Jesucristo shamushqanyaqmi. 24Surinta rïcu runa ashmayninpa makinman churashqannömi noqansitapis say leykunapa munayninman Tayta Dios churamashkansi. Sayno churamashkansi Jesucristo shamuptin payman yärakur salvakunansipaqmi. 25Wamra shaksharkur ashmaqninpa makincho manana kashqannömi Jesucristuman yärakur Moisés qelqashqan leykunapa munayninchönasu kaykansi.

Tayta Diospa wamranna kashqansi

26Wawqi panikuna, Jesucristuman yärakurnami kananqa Tayta Diospa wamrankunana kaykansi. 27Saynöpis bautizakushpansimi Jesucristuwan juklaylano kar paypa makinchöna kaykansi. 28Saymi Israel runa karpis mana Israel runa karpis, ashmay karpis mana ashmay karpis, olqu karpis warmi karpis Jesucristucho karqa Tayta Diospa wamranna kaykansi. 29Saynöpis Jesucristuta chaskikur Abrahampita miraqnami kaykansi. Saynöpami Abrahamta Tayta Dios promitishqanta noqansipis chaskinsi.#Rom. 4.13.

Actualmente seleccionado:

Gálatas 3: qvhB

Destacar

Copiar

Comparar