Mateo 4
4
Icogabeca camagari irantacaquerime Jesos ora te onganinate.
(Mr 1.12-13; Ir 4.1-13)
1Aique Isëre Tosorintsi páganëri Ira Jesos cara tera ontimingani. Cara, icoque camagari iraniantimari. Icogabeca irantacaquerime Jesos ora te onganinate. 2Cara, itica Jesos 40 cataguiteri, te irapëmate pairoraca. Págasantëri itasegane. 3Aro iátasiqueri Jesos camagari, iraniantëmari. Icantabepari:
—Obirosonorica Itomi Tosorintsi, pomeguiro oca mopëca pan, popero.
4Yotabitanëri Jesos:
—Quero nopeguiro. Ocanti Sanguenari jirai isanguenati comantantatsiri:
Te patiro intimantimaro pan matsiguenga, carari intimantëmarotisati Irinibare Tosorintsi cara inguemisanqueroca.
5Aique yáganëri camagari cara Jerosarénquë. Cara, yoguëri jonoica oquibe pongotsi irasi Tosorintsi. 6Aro icantabecari:
—Obiroca Itomi Tosorintsi, atsi pomatsecanë osobinta quibatsiquë. Pinguenguero ocanti Sanguenari:
Tosorintsi iragáquimiri ironomire irisaanganetsitepague iromisanquemi. Irágaigabaquemi arota quero poparigopë mopëquë.
7Yotabitanëri Jesos:
—Quero picantiri Tosorintsi ora inganque; posamitiri ora icogui inganque. Aisati ocanti Sanguenari:
Quero piniantari Pitingomi Iriantinta Pitosorintsite.
8Aisati yáganëri Jesos camagari jonoquë oquibequë oguitoja. Ijigotëneri omagaro quibatsi, 9icantabecari:
—Pinetsaigueri antagaisati timaigatsi quibatsiquë. Aroca pintingominquina naro, pobaticagueritotasiquinaca, aro nomëmiro omagaro, nangantaiguëri antagaisati intaegui cara intingomintaiguëmi iriro.
10Yotabitanëri Jesos aisati:
—Pijáte, jaara, obiro Satanás. Ocantiti Sanguenari negaca:
Pintingomintimari paniro Atingomi Irironta Pitosorintsite. Paniro Iriro pomanocoqueri pinguemisanqueri.
11Aro iátaji camagari ijocanëri. Aique ipocasitaigapëri ironomirepague Tosorintsi irisaanganetsite, imitocotaigapëri Jesos.
Iáque Jesos Garireaquë.
(Mr 1.14-15; Ir 4.14-15)
12Cara Jesos iquemocoqueri Joan cara yomianquengani, iáque Jesos cara Garireaquë. 13Te intime Nasarequë, carari iáque Caperinaoquë. Caperinao iroonti poeboro onamijaquë oquibe angaare jitacha Garirea. Aisati pini aronisati iguebatsite Saborón aisati irasi Nejatari. 14Aro omoncaraca ora isanguenatocoque Isaías comantantatsiri jirai cara icanque:
15Ainta matsiguenga timaigatsi quibatsipaguequë: Saborón aisati Nejatari timatsi onamijaquë angaare jitacha Garirea; aisati aiquero basiniquë angaare oquibeguintesonori; aisa antatinta Jorirán; aisati Garirea canta itimaigui tojai matsiguenga cagarijegui jorío. 16Jirai icantabetaigacari ibega iraegui timatsi tsitiniriquë tenta irogóigueri Tosorintsi. Iriátaiguëme Sharincabeniquë, carari yamai aisati icantaigari ira timaigatsi cataguiteriquë, aroquenta iquemocotaigabaqueri Jesos.
17Aro iparintaca Jesos iquenguitsatomotaiguëri matsiguenga canta, icantaiguëri:
—Pingantaigaima yacaqueroca, pijocajiro ora picantagueti te onganinate, pabentimari Tosorintsi pënibaquenta orequima iragáantane cara intingomibintaiguëmi.
Jesos icoigaiguëri irogomere.
(Mr 1.16-20; Ir 5.1-11; Jn 1.35-51)
18Iroontita yanëisigui Jesos cara onamijaquë angaare jitacha Garirea, iniopëri Simón aisati ireinti, Antiris. Simón aisati ijita Peroro. Isiriatasegui simaguitinta ini. 19Iniopëri Jesos aro icampëri:
—Intsome, piguiatanëna. Jirai pitarobacaati pisiriatiri sima carari nomëmi irorai pitarobacaare; pinguemisantacaguinari matsiguenga.
20Aito cara ijocanëro isiritite, yoguiataiganaqueri. 21Yogagaiganaca negaqueronta, Jesos iniopëri pite basini, Santiago aisati ireinti, Joan. Iriro pitirooti itomi Sebereo. Yobetsicaigaseguiro irisiriamento cara ibitoquë. Aisati icaimaigapëri Jesos. 22Aito cara ijocaiganaqueri iriri cara ibitoquë, yoguiataiganaqueri.
Icomantagueanti Jesos cara Garireaquë.
(Mr 1.35-39; 3.7-8; Ir 4.42-44; 6.17-19)
23Iquenagueque Jesos cara Garireaquë; yogomeanti omagaro poeboropaguequë cara yapatoitaiga jorío. Aisati iquenguitsatocotagueantëro iragáantane Tosorintsi cara intingomibintaiguëri matsiguenga. Aisati Jesos yogaguibegajiri tojai janaitatsiripague. 24Iquemocotaiguëri Jesos omagaro Siriasati. Aro yamaigapëri tojai imatsiguenga janaitaguetatsiri aisati catsibaguetatsiri arota iraguibegajiri. Yamapëri Jesosiquë ira inanca camagari, ira tingaraachari, aisati ira emëngari. Yogaguibegajiri antagaisati. 25Yoguiataigapëri tojaisonori matsiguenga: Garireasati, Tecaporisisati, Jerosaresati, Joreasati, aisati ira paniacha antatinta Jorirán.
Actualmente seleccionado:
Mateo 4: not
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2008, Wycliffe Bible Translators, Inc. All rights reserved.