Hiob 7
7
Daut Läwen es schwoa
1Es eenem siene Tiet oppe Ieed nich soo,
aus wan eena toom deenen veflicht es;
un sull eena siene Doag nich vejlikjen
met eenem dee fa een Dachloon schauft? #Hiob 14,6
2Daut es soo aus fa däm Sklow,
dee sikj de Tiet em Schauten wenscht,
ooda aus däm Oabeida,
dee no sien Dachloon luat.
3Ekj hab Moonaten jehaut, dee nuscht enbrochten;
ieremol eene Nacht es mie met lieden verant.
4Aus ekj mie dol läd, fruach ekj mie:
Woo lang woat daut dieren, bat ekj oppstonen kaun?
Mie kjemt de Nacht sea lank väa,
un ekj drei mie eemol no daut aundremol,
bat schlieslich daut Morjenroot kjemt.
5Mien Kjarpa es gaunz voll Warm
un miene Hut es brosch un kjietat.
6Miene Doag flieejen mie vebie
aus een Wäwa sien Schepkje;
dee veschwinjen onen daut see Hopninj brinjen. #Jes 38,12
7Hool daut em Denkj, daut mien Läwen
aul mau soo aus eemol utodmen es,
un miene Uagen woaren nienich wada waut goodet seenen.
8Dee waut mie nu noch seenen,
woaren mie boolt nich mea seenen;
wan du noch eemol kjikjst,
woa ekj wajch sennen.
9Daut Läwen es aus eene Wolkj,
dee doa vedonst un veschwinjt;
eena kjemt em Grauf
un sticht doa nich wada rut.
10Eena kjemt nich trigj no sien Hus,
un es nich mea opp siene Städ jeseenen. #Hiob 10,21; 14,12; Psa 103,16
11Un doawäajen woa ekj nu nich stell sennen;
ekj woa sajen, woo schwoa mie dit es,
un mien vebettadet Hoat kloagen loten.
12Sie ekj aul soo aus daut Mäa un daut Ojjeheia em Mäa,
daut du, Har, Wajchta rom mie stalst?
13Wan ekj mie jemietlich em Bad dol laj,
daut mie mien Trua een bät leichta saul sennen,
14dan enjst du mie met Dreem,
un stalst mie grulje Bilda väa,
15soo daut ekj leewa wudd aufjewarcht sennen,
un leewa doot sennen aus en dit lieden.
16Ekj sie saut von läwen;
ekj woa nich opp emma läwen;
lot mie bloos toch;
miene Tiet es aul mau soo aus eemol utodmen. #1Kjen 19,4
17Waut es de Mensch, daut du soo väl von däm moakst,
un daut du die om am kjemmascht,
18un daut du aule Morjen no am kjikjst
un am jieda Stund aufproofst?
19Woascht du eemol soo lang wajchkjikjen,
daut ekj mien Kjwiel oppschlucken kaun?
20Du, dee du de Menschen bewoaken deist,
waut moakt die daut ut wan ekj mie vesindicht hab?
Wuarom hast du mie opp Ziel?
Wuarom moakst du die daut schwoa met mie?
21Wuarom vejefst du mie nich miene Sind,
un nemst mie miene Schult wajch?
Ekj sie bat mie enne Ieed lajen,
un wan du dan no mie sieekjst,
woa ekj aul wajch sennen.
Actualmente seleccionado:
Hiob 7: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
