Hiob 5
5
Elifas blift doaropp, daut kjeen Schoden kjemt opp dee waut rajcht doonen
1Roop emol, Hiob. Woat die wäa auntwuaten?
Opp woonen Heiljen velatst du die?
2De onäwalajda stoaft von orruich sennen,
un de onvestendja en sien romiewren.
3Ekj hab jeseenen woo een onäwalajda sikj enwarteld,
oba dan met eemol wia aules veschwungen. #(3-5) Psa 37,35-36
4Äare Kjinja sent sikj nienich secha;
dee woaren biem Puat doljeschloagen,
un kjeena steit en fa an.
5Dee waut hungat, nämen däm siene Arnt,
un soogoa von mank daut Struck;
un dee waut darscht, lekjmulen no sien Vemieejen.
6Daut beese waust nich jrod soo opp een Aka,
un Trubbel kjient nich von en de Ieed;
7de Trubbel kjemt oppem Mensch von Jeburt,
soo aus Funken von een Fia nopp flieejen.
8En diene Städ, wudd ekj mie no Gott dreien,
ekj wudd de Sach en Gott siene Henj lajen.
9Dee deit groote Dinja, waut nich to vestonen sent,
un soo väl Wunda, daut dee nich to talen sent. #Hiob 9,10
10Hee lat daut opp daut Launt räajnen,
un bewessat de Flekja;
11hee häft de Läaje huach opp,
un lat dee daut goot utkomen,
waut doljeschloagen wieren. #Psa 75,8; Luk 1,52
12Hee vestieet dän Plon von de jewizte,
un lat an äaren Wajch nich utfieren;
13hee lat de kluake sikj en äare Kluakheit faust ranen,
un lat waut de lestje väahaben aus Donst veschwinjen. #1Kor 3,19
14Bie kloaren Sonnenschien woat an daut aula diesta;
un see langen opp Meddach soo rom aus enne Nacht. #Jes 59,9-10
15Hee rat de oame vom Schwieet,
un dee, dee sikj nich weeten, von de stoakje äare Macht.
16De oame kjrieen Hopninj,
un waut onopprechtich es, kjemt nich äwadäl.
17Woo goot kjemt daut fa däm ut,
dee Gott siene Lia aunnemt;
lot die daut nich too groff sennen,
wan dee, dee aule Macht haft, die belieet. #Psa 94,12; Spr 3,11
18Wan hee eene Wund schleit, dan vebinjt hee dee uk;
hee kaun schlonen, oba siene Haunt veheelt uk. #5Mo 32,39; Hos 6,1
19Wan hee die uk sas mol haft vom Trubbel jerat,
lat hee die daut säwende mol kjeen Schoden haben. #Psa 37,24; Spr 24,16
20En de Hungaschnoot woat hee die aum Läwen hoolen,
un em Kjrich woat hee die nich stoawen loten.
21Hee woat die von dee bewoaren,
waut schlajchtet noräden;
un du woascht die nich enjsten brucken,
wan daut vedoawen äwa kjemt.
22Bie daut vedoawen un de Hungaschnoot woascht du lachen,
un de wille Tieren em Launt woaren die nich enjsten.
23De Steena oppe Stap woaren die nich baudren,
un de wille Tieren woaren die doa tochloten; #Jes 11,6-9; Hos 2,20
24du woascht weeten daut dien Zelt secha es,
un du woascht dien Veehock noseenen
un doa woat nuscht wajch sennen.
25Du woascht weeten, daut du väl Nokomen haben woascht,
un daut dee, dee von die komen,
soo väl aus daut Graus oppe Stap sent.
26Soo aus eene Oa nich jedrascht woat ea dee riep es,
woascht du nich stoawen ea du oolt best.
27Horch doch. Wie haben dit lang nojesocht
un finjen daut es emma soo;
nemm daut soo aun, uk fa die.
Actualmente seleccionado:
Hiob 5: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
