Hiob 3
3
Hiob beschot daut hee läft
1Dan aus Hiob daut ieeschte waut säd, veacht hee dän Dach aus hee jebuaren wia, 2un säd:
3Mucht doa nich soon Dach sennen,
aun woonen ekj jebuaren wia,
ooda eene Nacht, wua see säden:
Wie woaren een Junkje haben. #Jer 20,14-18
4Mucht dee Dach em diestren veschwinjen;
mucht Gott em Himmel dän eendoont sennen;
mucht doa kjeen Licht fa dän sennen.
5Mucht de Dach dunkel un diesta bliewen,
un von dikje Wolkjen bedakjt sennen;
mucht dee eene Sonnenvediestrunk jehaut haben,
daut see sikj aula enjsten.
6Mucht dee Nacht em diestren veschwinjen;
mucht dee nich em Joa jefungen woaren,
un en kjeene Moonat väakomen.
7Mucht dee Nacht onfruchtboa jewast sennen,
daut kjeena sikj lud jefreit haud.
8Lot dee, waut Leviatan bezeibren kjennen,
opp disen Dach beeset nopp brinjen.
9Lot däm Morjen kjeen Stiern haben,
un vejäfs opp Licht luaren;
lot doa kjeen Morjenroot schienen,
10wiels dee miene Mutta äa Lief nich too hilt,
un mie nich fa dit Ojjlekj bewoaren deed.
11Wuarom sie ekj nich bie de Jeburt jestorwen?
Wuarom storf ekj nich aus ekj to Welt kjeem?
12Wuarom neem miene Mutta mie oppe Schoot,
un wuarom wia doa Malkj fa mie?
13Dan kunn ekj nu stell ligjen met de Vestorwne,
dan kunn ekj schlopen un mie utreiwen,
14met de Kjennichs un aunjestalde oppe Ieed,
waut Ruinen von oole Städa fresch oppjebut haben, #2Sam 18,18
15un met Vewaulta, dee Golt hauden,
un äare Hiesa voll Selwa spikjaden.
16Wan ekj doch ver miene Tiet jestorwen wia,
un unjajeschoaft jeworden wia,
soo aus een Kjint, daut nienich daut Licht jeseenen haft.
17Em Grauf hieet de gottloosa opp met Trubbel moaken;
doa kjennen dee, dee meed sent, sikj utreiwen.
18Doa sent de Jefangne frädlich;
doa hieren see nich mea dän Wajchta roopen.
19Doa sent de groosoatje un de onbekaunde;
doa es de Sklow loos von sienen Harn.
20Wuarom jeft Gott Licht fa dee, dee daut miseroblich jeit?
Wuarom jeft hee dee, dee aules betta es, daut Läwen,
21dee, dee no däm Doot luaren,
un dee nich kjemt;
ooda dee, dee doano sieekjen aus no waut vestoaknet, #Opb 9,6
22un sikj jrintlich freien,
wan see bat daut Grauf komen?
23Wuarom jeft hee Licht fa däm,
dee sikj goanich met siene Sach trajchtfinjt,
aus wan Gott jieda Däa toojestalt haft? #Hiob 19,8
24Daut stänen kjemt foakna aus Broot äten;
daut jaumren kjemt aus een Stroom Wota.
25Daut fa waut ekj mie enjsten deed, es jekomen;
daut waut mie gruld, haft mie jetroffen.
26Ekj finj kjeenen Fräd,
ekj kaun nich stell sennen,
ekj kaun mie nich utreiwen;
ekj hab bloos Trubbel.
Actualmente seleccionado:
Hiob 3: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
