Nm 8
8
A tas tz'aj yoch sc'a'l cantil
1'Ix yaln Jehová 'a Moisés 'ixtic:
2Al 'a Aarón, to a yic 'oj ya'nc 'och sc'a'l uque cantil, ata tzya' cot sacq'uinlal 'a yojltac jun yet'l cantil cha, xchi. 3'Ix syiclj Aarón sb'on 'icha 'ix yutj Jehová yaln 'a Moisés, 'ix ya'n 'at sacq'uinlal jun tzo'n̈ cantil chi 'a yojltac jun yet'l cha, sec ata tzyac' sacq'uinlal. 4A jun yet'l cantil cha, b'ob'il yet' oro, tenb'il yet' martillo, tz'el yich 'a yib' masnto tzq'ue'ch 'a sjolm 'a 'aj 'aych svasoal 'icha snich yajchi. 'Ix yac' b'o Moisés jun yet'l cantil 'icha wal 'ix yutj Jehová sch'oxn yechl 'a 'a.
'Ochnc yopiso eb' levita
5'Ix yaln pax Jehová 'ixtc 'a Moisés:
6Pojl smasnil eb' levita 'a scal smasnil eb' eyit israelal, tzlajw cha, tza sacb'tzan eb'. 7'Ixtc 'oj otc a sacb'tzan eb': Tza tzicch a a 'a eb', a tzc'anx 'a yic tzsacb'tzax can junc tas. Tzlajw cha, tzjosn 'el eb' xil smasnil sniwnal, tzju'n pax 'el eb' spichul, 'ixta tz'aj sacb'tzan sb'a eb'. 8Tzlajw cha, tzyi'n cot eb' junc no quelm wacax yet' jac 'ixm harina caw wach' calb'il yet' aceite, yic tzya'n eb' yofrendail 'ixm trigo, tz'ajx pax junc xo no quelm wacx xajmb'al-l yuj mul. 9Tzaln 'a eb' levita to tzjaw eb' smasnil 'a stz'ey Mantiado 'a 'aj tzin chaj in b'a eyet'oc, tza'n pax syam sb'a smasnil eb' eyit israelal. 10Tzaln 'a eb' levita cha, to tzjaw eb' 'a wojltac an Jehová in, ax smasnil eb' syajlil junjn 'in̈tal eb' chon̈ab', tzya't eb' sc'ab' 'a sjolm eb'. 11A Aarón a tz'a'n 'och eb' levita chi 'a wojltac, yuj yofrendaoc eb' eyit chon̈b' cha. 'Ixta 'oj 'ajcn yoch eb' levita chi in yac' servil. 12Tzlajw cha, tzya'n 'at eb' levita chi sc'ab' 'a sjolm e no quelm wacx cha, tz'ajx junc no xajmb'al-l yuj mul, ax junc xo no tz'ajx tz'a xajmb'al-l 'ayn an Jehová in, yic tzsacb'tzax can eb' levita cha. 13Tzlajw cha, tza'n 'och eb' levita chi 'a yojltac Aarón yet' 'a yojltac eb' yunnal, yic tz'ajx eb' 'ayin. 14'Ixta 'oj otc a pojn can 'el eb' levita 'a scal eb' eyit israelal, yic tz'ochcn eb' wico'oc. 15A yic tox xlajw sacb'tzax can eb' 'icha yaln sleyal, yet' 'a yic tox 'ix 'ajx eb' 'ayn cha, tztac' xo sjaw eb' munljoc 'a in Mantiado cha. 16A eb' tz'ochcn wico'oc 'a scal smasnil eb' eyit israelal. A eb' tzin chaj sjelc smasnil eb' b'ab'l 'unin. 17Yujto wic yaj smasnil eb' e b'ab'l 'unnal, 'ixta pax sb'ab'l 'une e cajb'en noc'. A wal yic xwa'n cham smasnil eb' sb'ab'l 'unnal eb' 'aj Egipto, a wal ta 'ix in si'cn 'el eb' e b'ab'l 'unnal chi wico'oc. 18Yuj cha, ax eb' levita tzin chaj sjelc eb' e b'ab'l 'unnal chi ticnec. 19An xin si'cn 'elt eb' levita tic 'a e cal e masnil, 'ix wa'n can eb' 'a Aarón yet' 'a eb' yunnal, sec wach' a eb' tzin 'a'n servil e jelc 'a jun Mantiado 'aj tzin chaj in b'a eyet'oc, yic tzwa'n lajwc e mul. Ax eb' chon̈ab', matz tac' sjaw eb' 'a stz'ey in cajnub', sec wach' may tas 'oj 'i'nc eb', xchi Dios.
20Ax Moisés yet' Aarón yet' smasnil chon̈b' Israel, 'ix syiclj eb' tas 'ix yal Jehová 'a Moisés yuj eb' levita cha. 21A eb' levita 'ix 'achn eb', sju'n pax 'el eb' spichul, ax Aarón 'ix 'a'n 'och eb' 'a yojltac Jehová 'icha ofrendail, xya'n pax xajmb'al yic sacb'tzax can eb'. 22Ax yic xlajw ye'cn jun tzo'n̈ tic, 'ix 'el yich smunlj eb' levita 'a jun Mantiado cha, ax Aarón yet' eb' yunnal, a tzjucb'tzan eb'. 'Icha wal xyutj Jehová yaln 'a Moisés, 'ixta xyutj eb' syiclni tas 'ix alx yuj eb' levita cha.
A stiempoal tz'a'w servil eb' levita
23'Ix yaln Jehová 'a Moisés 'ixtic:
24A eb' levita 'oj 'el yich ya'w servil 'a in Mantiado, atn eb' tz'acwnacx 25 ab'il sq'uinal. 25Ax yic tzlajw eb' 'a 50 ab'il, tz'el eb' 'a yopiso 'a jun 'ejmn̈ej. 26A yic 'oj q'ue'choc sq'uinl eb' 'icha cha, tztac' tzcolwj eb' yet' eb' tzmunlj 'a jun Mantiado cha, palta man̈xtzac munlj eb' 'a smunljel xon 'icha tzb'o'o. 'Ixta tzotj a'n 'och eb' levita 'a smunljel, xchi Dios.
Actualmente seleccionado:
Nm 8: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
