Nm 18
18
A yopiso eb' ya'mal 'och sti eb' 'anma*r* 'a Dios yet' eb' levita
1'Ix yaln Jehová 'a Aarón 'ixtic:
Ach tic yet' eb' onnal, yet' pax smasnil eb' yin̈tl Leví, eb' 'aj locn ach 'a en̈til, toto 'ay mach tz'och smul 'a in cajnub', yuj jun mul cha, 'oj jawc yailal 'a eb'n̈ yet' eb' onnal, yujto tz'och e mul 'a eyopiso, to ya'mal 'och sti eb' 'anma eyaji. 2Ax pax eb' ecan to junn̈j en̈tl yet'oc, wach' cab' tzcolwj eb' et'oc yet' 'a eb' onnal, yic tzex munlj 'a eyopiso 'a yol Mantiado yic trato cha. 3Atn eb' 'oj munljoc et' 'a in cajnub' cha, palta checln̈ej 'aj wach' scolwj eb'. Matz tac' yochch eb' 'aj 'ay syamc'ab'il in cajnub', mto 'a yet'l xajmb'al. Toto ma'ay 'oj cham eb', ax e cham pax jun xo. 4Locn cab' eb' tzmunlj eyet' 'a yol Mantiado 'aj tzin chaj in b'a eyet' cha, ax tzeyal 'a eb' tas tzb'o eb'. Palta matz tac' sc'och junc comn 'anma 'a e tz'ey yic wan e munlj cha. 5Cojn ax tic 'ay eyaln eyic e b'on smasnil tas tzb'o 'a in cajnub', yet' 'a yet'l xajmb'al, sec man̈x 'oj cot wowl 'a yib'n̈ eb' 'anma tic. 6An Jehová in, an xin pojcn 'el eb' levita 'a scal eb' eyit israelal, yic tzwa'n eb' 'ayex, sec tzmunlj eb' eyet' 'a yol Mantiado cha. 7Palta ach tic yet' eb' onnal, cojn ex tztac' eya'n 'och sti eb' 'anma 'ayin, yic tze b'on junc munljel 'a 'aj 'ay yet'l xajmb'al, mto 'a yojltac 'och te cortina. A jun munljel cha, eyic yaji, yujto an 'ix wac' jun 'opiso tic 'ayex. Toto 'ay junc comn 'anma tzcob' ya'ch sb'a 'a jun munljel tic, tojln̈ej schami, xchi Dios.
A tas tz'ajx 'a eb'*r* ya'mal 'och sti eb' 'anma', yet' 'a eb' levita
8'Ix yaln pax Jehová 'ixtc 'a Aarón:
An 'ix wac' opiso a chan smasnil ofrenda tz'ajx 'ayn yuj eb' israel tic. A jun tzo'n̈ cha, wicn̈ej yaji, palta an xo tzwac' 'aych yet' 'a eb' onnal, sec eyic tz'ajcn jun tzo'n̈ cha. A jun tic ley tz'ajcn 'a e cal 'a smasnil tiempo. 9Smasnil jun tzo'n̈ 'ixm harina tz'ajx ofrendail 'ayn yuj eb' israel, 'ixm tzyac' eb' yet' no xajmb'al tz'a'i, no tz'a'n lajwc mul, yet' no yic stojl mul, a jun tzo'n̈ xajmb'al tic, caw niwn yel'chi, palta an tzwac' 'aych yet' eb' onnal. 10Smasnil eb' winc 'a e cal, tztac' schin eb' no xajmb'al cha, palta ata tzchi eb' 'a jun lugar to wic yaji, yujto an 'ay wic jun tzo'n̈ cha.
11Tzwa'n jun tzo'n̈ xo tic 'aych yet' eb' onnal, eb' esil yet' 'a smasnil eb' 'ayc' et'oc, atn jun tzo'n̈ ofrenda tzya'ch eb' israel 'a wojltac. A jun tic ley tz'ajcn 'ayx 'a smasnil tiempo. Tzann̈j junc ecan 'ayc' et'oc, cojn toto wach' yaj 'icha yaln ley, tztac' sc'uxn eb' jun tzo'n̈ xajmb'al cha. 12An̈jtona', an Jehová in, an tzwac' pax sb'ab'l sat 'awb'en 'ayach, atn jun tzo'n̈ tzyac' eb' israel 'ayn 'a junjn ab'il: Atn aceite caw wach', yal uva caw wach' yet' 'ixm trigo. 13Yet' pax smasnil sb'ab'l sat 'awb'ente tzyij cot eb' 'ayn an Jehová in, ec tz'ajcn jun tzo'n̈ cha. Tzann̈j junc ecan 'ayc' et'oc, toto wach' yaj 'icha yaln ley, tztac' sc'uxn jun tzo'n̈ ofrenda cha. 14Smasnil ofrenda tz'ajx 'ayn yuj eb' israel, ec pax tz'aji.
15Smasnil sb'ab'l 'unnal eb' et israelal, yet' sb'ab'l 'une scajb'en noc' eb' tzyac' 'ayin, ec tz'aji. Palta a yuj eb' sb'ab'l 'unnal eb' 'anma cha, yet' sb'ab'l 'une no noc' to matz tac' yoch xajmb'alil, tza c'an q'uen tumn sjeloc. 16A yic jun 'uj xo yalji, tz'ajx jun tumn chi sjeloc. A yuj eb' 'unn cha, o'e q'uen tumn plata tz'ajx yuj eb', a tzyal yal-l q'uen tzc'anx 'a in cajnub', o'e gramo yal-l junjn q'ue'en. 17Palta man̈ a cha jelxc sb'ab'l 'une no wacax, no calnelu yet' no chiwo. Yujto a jun tzo'n̈ noc' cha, to wic yaji. Yowlal tza mil cham no', tza secn q'ue schic'l no 'a yib'n̈ yet'l xajmb'al, ax xepual no', tza n̈us tz'a 'a wojltac, yujto su'q'ui sjab' tzwab'i. 18Ec tz'aj no schib'jal cha, no sn̈i sc'ojol, yet' no xub' 'a swach', yujto a jun xajmb'al cha, to niwn yel'chi. 19Smasnil ofrenda tzyac' eb' eyit chon̈b' wico'oc an Jehová in, an tzwac' pax 'ayach, 'a eb' onnal, 'a eb' esil yet' 'a smasnil eb' 'ayc' et'oc. A jun tic ley tz'ajcn 'ayx 'a smasnil tiempo. A jun trato tic, may tz'aj sjelmj 'a jun 'ejmn̈ej, yujto an tzin b'o et'oc yet' pax 'a smasnil en̈til, xchi Dios.
20Xyaln pax Jehová 'a Aarón 'ixtic:
Ach tic may xon a locnal 'a slum eb' et israelal, may aln ec 'a lu'um, yujto 'icha to a macl tzin 'aj 'a scal eb' et chon̈b' tic. 21A 'a eb' levita, ata tzwac' sdiesmoal sat 'awb'en tzyac' eb' eyit israelal 'ayn yuj smunljel, atn tzwac' stojloc eb' yic tzmunlj 'och eb' 'a in Mantiado cha. 22Ax pax smasnil jun tzo'n̈ xo eb' eyit israelal, may yaln eb' yic sjaw 'a in Mantiado, toto ma'ay, 'oj 'och smul eb', ax scham eb' ta'. 23Yuj cha, cojn eb' levita 'ay yaln yic 'a in munljel tzb'o 'a yojol. Toto 'oj 'och spaltail eb' 'a in munljel, mun 'oj jawc yailal 'a yib'n̈ eb'. A jun tic ley tz'ajcn 'a smasnil tiempo 'a eb' levita, yujto may yaln eb' yic 'a slum eb' yit israelal. 24Yujto yic eb' yaj smasnil sdiesmoal sat 'awb'en tzyac' eb' israel 'ayin, yuj cha, tzwaln cani to may yaln eb' yic schan slum 'a eb' yit israelal cha, xchi Dios.
25Xyaln pax Jehová 'a Moisés:
26Al 'a smasnil eb' levita: To a yic tzchan eb' smasnil sdiesmoal smunljel eb' yit chon̈ab', atn jun tzo'n̈ tzwac' smacloc eb', yowlal tzyijcan pax 'el eb' sdiesmoal jun tzo'n̈ diesmo cha, tzya'n eb' 'ayin. 27A jun tzyac' eb' 'ayn cha, lajn wal tzyutj eb' ya'n 'icha tzyutj eb' yit chon̈b' eb' ya'n sdiesmoal strigo yet' yal uva. 28A 'a sdiesmoal tas tzyac' eb' chon̈b' cha, ata tzyij pax 'el eb' levita sdiesmo tzyac' 'ayn an Jehová in, ax 'a Aarón win ya'mal 'och sti eb', ata tzyac' eb' jun ofrenda cha. 29A 'a smasnil tas tzchaj eb' cha, ata tzyijcan pax 'el eb' jun macn̈ chi tzyac' 'ayin. A jun macn̈ tzyac' eb' 'ayn cha, atn wal caw swach'l 'a scal.
30Al 'a eb': To a yic tox xyijcan 'el eb' tas tzyac' 'ayn cha, ax jantcto tas tzcani, a eb' tznani tas tzyutej, 'icha tzyac' junc mach yet' strigo, mto yet' te yal uva, 31tztac' sc'uxn eb' yet' yunnal, yaln̈ej 'aj 'ayc' eb'. Atn jun chi tztojlej eb', yic tzmunlj eb' 'a yol Mantiado cha. 32Toto tox xyijcan 'el eb' jun macn̈ tzyac' 'ayn cha, tztac' sc'uxn eb' jantc to tas tzcani. A jun cha, man̈ muloc. Toto 'ixta', matz yixtj eb' yofrenda eb' yit israelal tzyac' 'ayin, sec ma'oj cham eb', xchi Dios.
Actualmente seleccionado:
Nm 18: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
