Lv 4
4
A no xajmb'al yuj yajx lajwc mul
1'Ix yal Jehová 'a Moisés 'ixtic:
2Al yab' smasnil eb' et israelal, to an tzwal jun tzo'n̈ tic: Toto 'ay mach tz'och smul, palta man̈ sc'anc sc'ojl tzb'o tas 'ay yowlal sb'on yuj in checnb'il an Jehová in, yowlal tzyiclj smasnil jun tzo'n̈ 'oj wal tic.
3Q'uinloc a win sat ya'mal 'och sti eb' 'anma tz'och smul, a smul cha tz'och pax smulc eb' chon̈ab'. Toto 'ixta', yowlal tzyac' win junc no quelm wacx may spaltail xajmb'al-l 'ayn an Jehová in yuj smul cha. 4Tzyij cot win no 'a yamq'uil Mantiado 'aj tzin chaj in b'a eyet'oc, ata tzyac' q'ue sc'ab' 'a sjolm no'. Tzlajw cha, tzmiln cham win no 'a wojltac. 5Tzyi'n cot win jac schic'l no', tzya'n can 'och 'a yol Mantiado cha. 6Tzyac' 'ejm win yune sc'ab' 'a scal schic'l no cha, uc 'ejm tzic 'ejm win schic'l no chi 'a wojltac an Jehová in, atn 'a yojltac 'elt te cortina 'aych 'a yol in cajnub'. 7Tzb'on̈n 'och win jac schic'l no 'a sch'ac jun yet'l 'aj tz'a incienso, jun 'aych 'a wojltac 'a yol Mantiado cha. Ax smasnil schic'l no tzcani, ata tzsecx can 'ejm 'a yich jun yet'l xajmb'al 'ay 'a yojltac 'elt Mantiado cha. 8Yowlal tzyij 'el win jun tzo'n̈ tic 'a no quelm wacx tz'ajx xajmb'al-l yuj mul cha: Smasnil xepual no yol sc'ojol, 9no stut schab'il yet' smasnil xepual 'aych 'a spatquil, yet' pax c'axp seyb' no yet' xepual. 10Lajn tzyutj 'icha tz'aj yijx 'el yic no wacx tz'ajx xajmb'al-l yic junc'ojlal. Ax win ya'mal 'och sti eb' 'anma cha, a tz'a'n tz'a no 'a yib'n̈ yet'l xajmb'al. 11Palta ax stz'umal no wacx cha, yet' smasnil schib'jal no', junn̈j tz'aj yet' no sjolom, no xub', no yoc, no yol sc'ojol, yet' pax stza no', 12tzyal 'el'chi, to tz'ijx 'el smasnil no xajmb'al chi 'a junc lugar wach' yaj sb'o 'a spatquil 'el camplamento, atn 'aj tzsecx xon 'el ta'an̈. Ata tz'ajx tz'a no 'a yib'n̈ c'atzitz.
13Toto smasnil eb' et chon̈b' tz'och spaltail, palta man̈ sc'anc sc'ojl eb' tzb'o'o, may pax junc mach tzyil cot sb'a to 'ay yowlal yuj in checnb'il an Jehová in. 14A yic tzyiln cot sb'a eb' chajtlto x'och smul eb', yowlal tzyac' eb' junc no quelm wacx xajmb'al-l yuj smul chi smasnil. Tzyij cot eb' no 'a yamq'uil Mantiado 'a 'aj tzin chaj in b'a eyet'oc. 15Ata tzyac' q'ue eb' yichm wincal chon̈b' sc'ab' 'a sjolm no'. Tzlajw cha, tzmiln cham eb' no 'a wojltac an Jehová in. 16Ax win sat ya'mal 'och sti eb' 'anma cha, tzyij 'och win jac schic'l no 'a yol Mantiado cha. 17Tzyac' 'ejm win yune sc'ab' 'a scal schic'l no', uc 'ejm tzic 'ejm win schic'l no chi 'a wojltac, atn 'a yojltac 'elt te cortina. 18Tzb'on̈n 'och win jac schic'l no chi 'a sch'ac jun yet'l 'aj tz'a incienso 'a wojltac an Jehová in, 'a yol Mantiado cha. Ax smasnil schic'l no tzcani, tzsecx can 'ejm 'a yich jun yet'l xajmb'al 'ay 'a yojltac 'elt Mantiado, 'a 'aj tz'a no xajmb'al. 19Tz'ijx 'el pax smasnil xepual no xajmb'al cha, tzlajw cha, tz'ajx tz'a 'a yib'n̈ yet'ul, 20tzyal 'el'chi, to tzb'o jun quelm wacx chi xajmb'al-l 'icha no xajmb'al tox 'ix b'inaxi. 'Ixta tzyutj win ya'mal 'och sti eb' 'anma sb'on no xajmb'al chi yuj smul eb' chon̈b' cha, ax smul eb' cha, 'oj 'ajxoc can lajwoc. 21Tzlajw cha, tz'ijx 'el jantc to no xajmb'al chi 'a spatquil 'el camplamento. Ata tzwach' 'ajx tz'a no', 'icha wal tz'aj no tox 'ix b'inax 'a b'ab'el, yujto a jun xajmb'al cha, tz'ajx yuj smul eb' 'anma'.
22Toto tz'och smul junc eb' yajl yaji, palta man̈ sc'anc sc'ojl tzb'o tas 'ay yowlal sb'on yuj in checnb'il an Jehová in, yowlal tzyiclj smasnil jun tzo'n̈ 'oj wal tic. 23A yic tznachj 'el yu'uj chajtlto x'och smul, yowlal tzyij cot junc no mam chiwo xajmb'alil, junc no may spaltail. 24Tzya'n q'ue sc'ab' 'a sjolm no chiwo cha, tzmiln cham no 'a wojltac 'aj tzmilx cham xon no noc' tz'ajx xajmb'alil, yujto xajmb'al yic mul yaj no'. 25Tzlajw cha, ax junc win ya'mal 'och sti eb' 'anma chi tz'i'n cot jac schic'l no yet' yune sc'ab', tzb'on̈n 'och 'a sch'ac jun yet'l xajmb'al 'a 'aj tz'a xon no cha. A jantc to schic'l no tzcani, tzsecx can 'ejm 'a yich jun yet'l xajmb'al cha. 26Tz'ajx tz'a smasnil xepual no 'a yib'n̈ yet'l xajmb'al, 'icha wal tz'aj no yic junc'ojlal. 'Ixta tzyutj win ya'mal 'och sti eb' 'anma sb'on no xajmb'al chi yuj smul win yajl cha, ax smul win cha, 'oj 'ajxoc can lajwoc.
27Q'uinloc a junc 'anma may yopiso tz'och smul 'a tas 'ay yowlal yuj in checnb'il an Jehová in, palta man̈ sc'anc sc'ojol, 28a yic tznachj 'el yu'uj chajtlto x'och smul, yowlal tzyij cot junc no nun chiwo may spaltail, yuj ya'n xajmb'al-l 'ayn yuj smul tz'och cha. 29Tzyac'q'ue sc'ab' 'a sjolm no', tzmiln cham no 'a 'aj tzmilx cham xon no noc' tz'ajx tz'a xajmb'alil. 30Ax junc win ya'mal 'och sti eb' 'anma', a tz'i'n cot jac schic'l no yet' yune sc'ab', tzb'on̈n 'och 'a sch'ac jun yet'l xajmb'al 'a 'aj tz'a xon no xajmb'al cha, ax jantc to schic'l no tzcani, tzsecx can 'ejm 'a yich jun yet'l xajmb'al cha. 31Tz'ijx 'el smasnil xepual no xajmb'al cha, 'icha tz'aj yijx 'el yic no tz'ajx xajmb'al-l yic junc'ojlal. Tz'ajx tz'a 'a wojltac an Jehová in, caw wal wach' sjab' tzwab'i. 'Ixta tzyutj win ya'mal 'och sti eb' 'anma chi sb'on jun xajmb'al cha, sec tz'ajx lajwc smul jun 'anma cha.
32Toto calnelu no tzyij cot jun mach tz'a'n jun xajmb'al cha, a junc no nun calnelu may spaltail tzyij coti. 33Tzyac'q'ue sc'ab' 'a sjolm no', tzmiln cham no 'a 'aj tzmilx cham xon no noc' tz'ajx tz'a xajmb'alil. 34Ax junc win ya'mal 'och sti eb' 'anma chi tz'i'n cot jac schic'l no yet' yune sc'ab', tzb'on̈n 'och 'a sch'ac jun yet'l xajmb'al 'aj tz'a xon no xajmb'al cha. A jantc to schic'l no tzcani, ata tzsecx can 'ejm 'a yich jun yet'l xajmb'al cha. 35Tz'ijx 'el smasnil xepual no', 'icha wal tz'aj yijx 'el yic no tz'ajx xajmb'al-l yic junc'ojlal. Tz'ajx tz'a xepual no 'a yib'n̈ yet'l xajmb'al. Junn̈j tz'aj stz'a yet' jun tzo'n̈ xo xajmb'al tz'ajx xon tz'a 'a wojltac an Jehová in. 'Ixta tzyutj jun ya'mal 'och sti eb' 'anma chi sb'on jun xajmb'al cha, sec tz'ajx lajwc smul jun 'anma cha.
Actualmente seleccionado:
Lv 4: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
