Lv 26
26
Yaxilal tz'ajx 'a yib'n̈ eb' yiclum
(Dt 7.12-24; 28.1-14)
1'Ix yaln pax Jehová 'a Moisés 'ixtic:
Man̈ e b'o jun tzo'n̈ yechl e diosaloc. Man̈ e lin̈chan̈ q'uen q'uen 'aj tzeyal e b'a 'a yol e chon̈ab'. Man̈ e jos q'uen q'uen 'aj tz'ib'x 'och yechl eb' comn dios, man̈ eyac' 'ejm e b'a 'a jun tzo'n̈ cha, yujto an Jehová in, e Diosal waji. 2An Jehová in, an tzwala. Yowlal tzeyiclj sc'ul 'iljelal, yujto wic yaj jun c'u cha. Niwn cab' pax yel'ch in cajnub' 'a e sat.
3Toto yiclumn̈ej tzeyutj e b'a 'a in ley, tze b'eylb'ann̈ej in checnb'il smasnil, 4to 'ixta', 'oj wa' cot n̈ab' 'a 'icha stiempoal, ax syaxb' sat e lu'um. 'Oj yac' eyawb'en sat smasnil. 5An̈j 'ijnoc e te'w trigo ax yelx wul sat te uva. 'Ayt pax sch'inchj te uva cha, ax sjapx stiempoal yawx e trigo jun 'ejm xo, 'oj e wa si'mb'il, masnto 'oj e b'ut'ji. Caw wal 'oj eyac' tzaljoc e c'ojl 'a sat lum lum cha. 6Caw tzaljc'ojlal 'oj e can 'a yol e chon̈ab'. Yelc'ojlal 'oj e wayi, may tas 'oj e xib'tni. 'Oj ex in col 'a no chiwjum noc' yet' 'a yol sc'ab' owal. 7A eb' 'ajc'ojl yajch 'ayex, 'oj 'at eb' 'elc eyu'uj, 'oj laj e mil cham eb'. 8Toto own̈ e b'ey ax tic, 'oj 'at 'elc junc ciente eb' eyu'uj, ax toto jun ciente e b'ey ax tic, lajn̈e mil eb' 'oj 'at 'elc eyu'uj. A eb' 'ajc'ojl cha, 'oj cham eb' eyu'uj. 9Yujto 'oj wochx 'a wach'c'ojlal eyet'oc. 'Oj wa'x q'uib' e b'isul, 'oj wac' 'el'choc in trato eyet'oc. 10'Oj e wan̈j 'ixm trigo 'ayx sjayloc ab'il smolxi. 'Oj to eyi'cn 'el 'ixm 'a yet'l cha, ax e moln pax 'ixm 'ac' trigo tz'elxwuli.
11'Oj in cann̈j eyet'oc, ma'oj ex in patquilc can 'eli. 12'Aynn̈ej 'ec' 'a e cal, yujto e Diosal waji, ax xo tic, in chon̈b' eyaji. 13An Jehová e Diosal in, an ex wij 'elt 'a Egipto, sec wach' man̈xtoc ex can munljoc 'a eb' 'aj Egipto cha. An wal 'ix wij 'el jun munljel caw ya chi 'a eyib'an̈, yic wach' man̈xtoc 'ayx 'och 'a yaln̈ schecnb'il junc xo nacion̈.
Yailal 'a yib'n̈ eb' tenmtac
(Dt 28.15-68)
14Palta toto ax tic, matz eyiclj tas tzwala, matz e b'eylb'ej in checnb'il smasnil. 15Toto tze patquilj can 'el in cuynb'il, may yel'ch in checnb'il 'ayex, tzeyixtn 'el in trato in b'ojnac eyet'oc, 16an̈jtona 'in, 'oj in na', tas 'oj ex wutoc. 'Oj wa' cot xiwc'ojlal 'a eyib'an̈. 'Oj cot owya yab'il 'a e cal. C'a'lyab'il, 'oj 'och 'a e sat. 'Oj e tz'onb' cha'an̈, ax yel yip e niwnal. 'Oj cob' e b'o e munljel, palta ax eb' 'ajc'ojl 'oj molnoc sat smasnil eyawb'en cha. 17An 'oj woch 'ajc'ojlal 'ayex, ax e lajw 'el yuj eb' 'ajc'ojl cha. 'Oj e can 'a yaln̈ yuj eb', mun xoj 'oj e 'at 'eloc, wach'xam may mach tzex pechni.
18Toto matz na sb'a e c'ojl yuj jun tzo'n̈ cha, toto matz ex 'och yiclumal 'ayin, 'oj wac' niwtjoc sjaw yailal 'a eyib'an̈. 19'Oj wac' lajwc 'ejm e b'an̈quintaquil. Ma'oj wa' cot n̈ab' 'a satcha'an̈, man̈x 'oj yac' lum lum sb'a'al. 20Nab'an̈ej 'oj eyixtc e b'a e munlji, yujto a lum lum cha, man̈x 'a xon jac tas 'oj yac' lu'um, yet' pax smasnil te 'awb'ente', may xon sat te 'oj yac'a'.
21Toto an̈ja tenmtac tzeyutj e b'a 'ayin, matz eyiclj tas tzwala, 'oj wac' niwtjoc sjaw yailal 'a eyib'n̈ yuj e mul cha. 22'Oj wa' cot no chiwjum noc' 'a e cal, ax schin 'ejm no eyunnal, ax ya'n lajwc no e cajb'en noc', ax yemt e b'isl yuj no'. Man̈x 'a mach 'oj b'ey 'a b'e.
23Toto an̈ja matz na sb'a e c'ojl yuj jun tzo'n̈ cha, an̈ja eya'n pitb'oc 'el e b'a 'ayin, 24an̈jtona 'in, 'oj cot pax wowl 'ayex, ax wa'n niwtjoc sjaw yailal 'a eyib'n̈ yuj e mul cha. 25'Oj wa' cot owl 'a e cal eyailaloc, sec a tz'a'n spac in trato matz eyiclj cha. 'Oj laj cob' 'at e col e b'a 'a yol e chon̈ab', palta 'oj wac' cot yab'il 'a e cal, ax eyamchj yuj eb' 'ajc'ojl cha.
26Ya' sb'a macnex yic tze coln e b'a 'a yol e chon̈b' cha, a yic cha, 'oj wic' 'emt yoc e wa'i. Lajn̈e n̈al eb' 'ix 'ix 'oj b'onc tas tzc'ux 'a junc c'aq'uil. Yechl xoj 'oj 'aj yajx tas tze c'uxu. 'Oj cob' e wa'i, palta ma'oj e b'ut'ji.
27Toto ma'oj sna sb'a e c'ojl yuj jun tzo'n̈ cha, matz ex 'och yiclumal 'ayin, to an̈j 'ijnoc tenmtac tzeyutj e b'a, 28an̈jtona 'in, 'oj cot pax wowl 'ayex, ax wa'n niwtjoc sjaw yailal 'a eyib'n̈ yuj e mul cha. 29At wal yuj jun tzo'n̈ chi b'i'an, ax e chin 'ejm eb' eyunnal mto eyisil. 30'Oj laj in mac' poj jun tzo'n̈ yet'l e diosal 'aj tzeyal e b'a, ax in ma'n poj yet'l 'aj tz'a incienso. 'Oj in molb'tzoc 'och b'uln e niwnal chamnc chi 'a yib'n̈ jun tzo'n̈ e diosal may spixn cha. 'Ixta wal 'oj wutc in ch'oxn 'eli, to man̈xtzac ex in nib'j wila'. 31'Oj in mac' lan̈chjoc can e chon̈b' cha, ax slajw can 'ejm yatut e diosal, man̈x 'a yopiso e xajmb'al to su'q'ui yec' sjab' 'a wojltac.
32'Oj wac' lajwc 'ejm e chon̈b' cha, ax eb' 'ajc'ojl yajch 'ayex, a eb' 'oj wul cajnoc can paxi, 'oj laj sat sc'ojl eb' yiln jun cha. 33Ax xo tic, 'oj ex in pechcn 'at 'a scal jun tzo'n̈ xo nacion̈, tza'n 'och wespada eyu'uj, ax e 'atcni. A e nacion̈, 'oj 'ochcn waymtaquil, ax e chon̈ab', cusltac xoj yilx 'oj 'ajcn sjuwi. 34'Ixta wal 'oj 'aj lum lum chi scan sch'ocoj, sictac 'oj 'ajcn lum 'a smasnil tiempo, ya' sb'a ax tic, 'ayx 'ec' 'a snacion̈ eb' 'ajc'ojl yajch 'ayx cha. Ax lu'um, to tzyij can lum yip, 'icha stiempoal ma'ix eyac' xon 'iljoc lu'um, 'ixta 'oj can lum 'iljoc. 35A yic 'aycn lum sch'ocj cha, 'oj 'iljoc lu'um, yujto a yic 'ayx 'ec' 'a sat lu'um, may xon lum tz'ilj eyu'uj.
36Ax eb' eyin̈tl pitznto 'a scal eb' 'ajc'ojl yajch 'ayx cha, 'oj wac' jawc xiwc'ojlal eb' si'mb'il. 'Oj laj comn 'at eb' 'eloc, yic 'oj yab'nc eb' sc'an̈ yem c'otnjoc junc xil te'. 'Oj laj 'at eb' 'eloc, 'icha to 'ay mach pechjnac eb' yet' q'uen espada. 'Oj laj smac' telwc sb'a eb' s'at 'eloc, palta may mach tzpechn eb'. 37Mun 'oj laj stenlac sb'a eb' s'at 'eloc, 'icha to tz'at eb' 'elc 'a junc owal, wach'xam may mach tzpechn eb'. May xon junc eb' 'oj ste'wtzoc sb'a 'a yojltac eb' 'ajc'ojl cha. 38'Oj lajwc 'ejm eb' 'a scal jun tzo'n̈ nacion̈ cha, a lum slum eb' 'ajc'ojl cha, a lum 'oj satnc 'el eb'. 39Ax jaywn̈ocx eb' eyin̈tl pitznto 'a scal eb' 'ajc'ojl cha, 'oj wach' cham eb' yuj smul, yet' pax yuj e mul ax mamb'ilx tic.
40-41Yujto 'ix 'och stenmtacl eb' 'ayin, yuj cha, 'oj woch 'ajc'ojlal 'a eb', ax wa'n can 'at eb' 'a schon̈b' eb' 'ajc'ojl yajch 'a eb' cha. Toto 'oj sna sb'a sc'ojl eb' 'aj pit 'oj yutc sb'a 'ayin, ax yi'n 'ejm sb'a eb' 'a wojltac yuj yaln q'uet' eb' smul yet' e mul ax tic, tzyactn can eb' sb'on masych'olnilal, 42toto 'ixta', 'oj in na cot in trato yet' Jacob, Isaac yet' Abraham, chajtlto tzwal wac' lum lum 'a yin̈tl eb'. 43Ya' sb'a tz'elcn eb' 'a sat lu'um, ax scan lum 'iljoc, ax eb' 'oj yab' eb' syal yuj smul cha, yujto matz yiclj eb' in checnb'il yet' in cuynb'il xwac' 'ayex.
44A yic 'oj laj 'ec' jun tzo'n̈ chi 'a yib'n̈ eb' yuj smul, wach'xam 'ayc' eb' 'a yol schon̈b' eb' 'ajc'ojl cha, ma'oj in patquilc can 'el eb'. Ma'oj in satl eb' smasnil, sec matz lajw 'ejm in trato b'ob'il wuj yet' eb' e mam eyicham, yujto an tic e Diosal waji. 45Palta yuj swach'loc eb', yuj cha, tzin nan cot in trato b'ob'il wuj yet' eb' e mam eyichm cha. Q'ueln 'och wal jun tzo'n̈ xo nacion̈ yic ex wi'n 'elt 'a Egipto sec tzin 'och e Diosaloc. An Jehová in, an tzwala, xchi Dios 'a Moisés.
46Atn jun tzo'n̈ ley tic, checnb'il yet' cuynb'il 'ix schaj Moisés 'a Jehová yic 'ayc' 'a sjolm lum witz Sinaí, sec tz'och scuynb'ilc chon̈b' Israel.
Actualmente seleccionado:
Lv 26: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
