Lv 21
21
Sleyl yic eb'*r* ya'mal 'och sti eb' 'anma 'a Dios
1'Ix yaln Jehová 'a Moisés 'ixtic:
Al jun tzo'n̈ tic 'a eb' ya'mal 'och sti eb' 'anma', atn eb' yin̈tl can Aarón, tzal 'a eb', to matz yixtj 'el sb'a eb' 'a sat ley, yic tzc'och eb' 'a stz'ey junc chamnc 'anma 'a yol schon̈ab'. 2Cojn toto yuj smam, yuj snun, yuj junc yunnal, yuj junc yisil, mto yuj junc yu'tac, 3mto yuj junc yanb' cob's to, junc to cajn 'ec' yet'oc, junc mantzac nupni; a yuj jun tzo'n̈ eb' cha, tztac' yixtn 'el sb'a eb' 'a sat ley. 4Palta matz tac' yixtn 'el sb'a eb' yuj sniwnal junc yican yistzil.
5Man̈ cab' sjoxl eb' xil sjolom, matz tac' pax sjoxn 'el eb' xil sti'.#Lv 21.5 A sb'eyb'al eb' tzyal sb'a 'a jun comn dios Baal, to tzjoxl eb' sjolom, tzjosn 'el eb' xil sti, tzpoln lajwc sb'a eb' 'a yic 'ay junc chamnac. Yuj cha, matz yal sc'ojl Dios to 'ixta tzyutj sb'a eb' israel. May cab' eb' tzyac' lajwc sniwnal yuj junc chamnc 'anma cha. 6Wach' cab' tzyutj sb'a eb' 'a in sat an sDiosal in eb' tic. Man̈ cab' yac' b'uchxoc eb' in b'i, yujto a eb' tz'a'n tz'a no xajmb'al, tzya'n pax 'och eb' 'ixm pan ofrendail 'a wojltac. Yuj cha, yowlal to wach'n̈j tzyutj sb'a eb'.
7Matz tac' yi'n sb'a eb' yet' eb' 'ix 'ajmul 'ix. Matz tac' yi'n sb'a eb' yet' eb' 'ix 'ix c'umb'ilx winc yu'uj, mto eb' 'ix spojjnac sb'a yet' yichmil, yujto sic'b'il 'och eb' wico'oc. 8'Ay cab' sjelpal eb' 'a e sat, yujto a eb' tz'a'n 'och 'ixm pan ofrendail 'a wojltac. Yuj cha, chuc cab' yel eb' 'a e sat, yujto an Jehová in tic, caw wach'nn̈ej, an xin si'cn 'el eb' sec caw wach' tz'ajcn eb'.
9Toto a junc yisl win ya'mal 'och sti eb' 'anma cha, tzyixtj 'el sb'a 'a 'ajmulal, a jun cha, tzyij 'el sq'uixwel smam, yowlal tz'ajx tz'a'oc.
10A win sat ya'mal 'och sti eb' 'anma', 'ay yopiso win ya'n 'och te pichl ya'ilb'il yaj sb'o'i, yujto 'ac'b'ilq'ue perjuma 'a sjolom yic si'x can 'ochi. Yuj cha, matz tac' scomn 'em tzicn xil sjolom, mto tziljat spichul yic tzch'oxn 'el junc scusc'ojlal. 11An̈jtona', matz tac' pax yixtn 'el sb'a yuj yoch 'a 'aj 'ayc' junc chamnc 'anma', wach'xam a smam mto snun. 12An Jehová in, an tzwala. Matz tac' yel 'a yol in cajnub' yuj schamlil eb' cha, matz tac' to man̈x 'a yel'ch tzyutj can in cajnub', yujto 'ac'b'ilq'ue perjuma 'a sjolom yic si'x can 'och wico'oc.
13Yuj cha, a wal junc 'ix cob's mant 'a winc tzc'umej, a tzyi'aj. 14Caw wal matz tac' yi'n win junc 'ix chamnc yichmil, mto junc 'ix ton̈j spojjnac sb'a yet' yichmil, mto junc 'ix 'ajmul 'ix. Palta a wal junc 'ix caw cob'es, junc 'ix yit chon̈b' to sb'a yet'oc, a chi smoj yi'ni, 15sec man̈toc comn 'anma xoj tz'aj 'el'ch eb' yin̈tl 'a scal eb' yit chon̈ab', yujto an Jehová in tic, an in si'jnac 'och wico'oc, xchi Dios, xa chi 'a eb', xchi 'a Moisés.
16'Ix yaln Jehová 'a Moisés 'ixtic:
17Al jun tic 'a Aarón: Ticnec yet' 'a yic b'aq'uin̈, may wal junc eb' yin̈tl 'ay tas palta 'a sniwnal 'oj stac' ya'n 'och 'ixm pan 'a wojltac, 'ixm tz'ajx ofrendail 'ayin. 18-20May wal junc eb' 'ay tas palta 'a sniwnal tztac' yoch 'a jun 'opiso tic: atn eb' matz uj yilni, eb' coxo, eb' palta sn̈i', eb' tu schiquin, eb' wecchjnac sc'ab', mto yoc; eb' n̈ojn sb'eyi, eb' tzapn sc'ab', eb' c'ochn yoc, eb' 'ay sac 'a yol sat, eb' 'ay yab'il 'a sniwnal, eb' 'ay q'ue c'on yab'il 'a 'a, yet' eb' pojl sq'ue'en. 21May wal junc eb' tic 'oj stac' ya'n 'och no xajmb'al tz'a 'a wojltac an Jehová in. Toto palta sniwnal cha, matz tac' ya'n 'och 'ixm pan ofrendail 'a wojltac. 22Tztac' sc'uxn eb' jun tzo'n̈ ofrenda cha, yet' smasnil jun tzo'n̈ xo tas to wic yaji, 23palta matz tac' yochl eb' 'a 'aj 'ay te cortina, mto 'a stz'ey yet'l xajmb'al, sec wach' man̈ comnoc xoj tzyutj eb' in cajnub', yujto an Jehová in, an 'ay wic jun tzo'n̈ cha, xchi Dios, xa chi 'a Aarón cha, xchi Dios 'a Moisés cha.
24Xlajw cha, 'ix yaln pax Moisés jun tzo'n̈ tic 'a Aarón yet' 'a eb' yunnal, yet' pax 'a smasnil eb' yit chon̈ab'.
Actualmente seleccionado:
Lv 21: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
