Lv 18
18
Jun tzo'n̈ mul 'ay yowlal
1'Ix yaln Jehová 'ixtc 'a Moisés:
2Al yab' eb' et israelal, to an tzwac' jun tzo'n̈ ley tic:
An tic Jehová e Diosal in.
3Man̈ e b'eylb'oc sb'eyb'al eb' 'aj Egipto, atn jun nacion̈ 'aj 'e'nc ex cajan.
Man̈ e b'eylb'oc pax sb'eyb'al eb' 'aj Canaán, atn 'aj wan ex wi'n 'ati.
4An Jehová e Diosal in, an tzwala. Yicljec in checnb'il, tze b'eylb'an pax in ley.
5An tzwala to tze b'eylb'ej in checnb'il yet' in ley. A mach 'oj yiclnoc, 'oj 'ajxoc sq'uinl yu'uj.
6An tzwala to may cab' junc winc 'a e cal tzcomn yamn cot junc 'ix 'ix to yican to sb'a yet'oc, yic tzb'on 'ajmulal yet' 'ix.
7May cab' junc mach 'a e cal, tzyij e'l sq'uixwel smam yic tzb'on 'ajmulal yet' snun; yujto caw snun, man̈ smojc sb'on jun cha.
8May cab' mach tzyij 'el sq'uixwel smam yic tzb'on 'ajmulal yet' yistzil smam cha.
9May cab' mach tzb'on 'ajmulal yet' yanab', wach'xam to schab'l 'anb' yaj yuj smam mto yuj snun; toxn̈ej 'a yol yatut smam 'aljnac 'ix, mto chuc 'ajtil 'aljnac 'ix, matz tac' sb'on 'ajmulal yet' 'ix.
10May cab' mach tzyij 'el sq'uixwel sb'on 'ajmulal yet' yixchiquin, yujto yixchicn 'ix 'ix chi yuj yunnal, mto yuj yisil, matz tac' sb'on 'ajmulal yet' 'ix.
11May cab' mach tzb'on 'ajmulal yet' yune yistzil smam, yujto caw yisl smam cha, caw yanab'. Matz tac' sb'on 'ajmulal yet' 'ix.
12May cab' mach tzb'on 'ajmulal yet' yanb' smam, yujto yicanto sb'a 'ix yet' win smam win cha.
13May cab' mach tzb'on 'ajmulal yet' snul'j snun; yujto yicanto sb'a 'ix yet' snun win cha.
14May cab' mach tzyij 'el sq'uixwel yu'tac smam, yic tzb'on 'ajmulal yet' yistzil yu'tac smam cha.
15May cab' mach tzb'on 'ajmulal yet' yalib', yujto yistzil yunnal; matz tac' sb'on 'ajmulal yet' 'ix 'ix cha.
16May cab' mach tzyij 'el sq'uixwel yu'tac, yic tzb'on 'ajmulal yet' yistzil yu'tac cha.
17A junc 'ix 'ix 'ay junc yune' mto yixchicn to wach'xo, toto 'ay mach 'a e cal tz'i'n 'ix yistziloc, matz tac' sb'on win 'ajmulal yet' 'ix schab'l 'isl cha, mto 'ix yixchicn 'ix yistzil win cha. A jun cha caw q'uixwel, yujto junn̈jto eb' 'ix.
18May cab' mach tzmontj snul'j yistzil schab'l 'istziloc, matz tac' yi'n win 'ix, ya' sb'a to pitznto 'ix yistzil win cha, sec wach' may owl 'a scal eb' 'ix.
19May cab' mach tzway yet' 'ix 'ix to stiempoal yel a a 'a 'a.
20May cab' mach tzb'on 'ajmulal yet' yistzil junc xo yit wincal, sec wach' matz 'och smul yuj jun cha.
21An Jehová in, an tzwala. May cab' mach tzyac' yunnal xajmb'al-l 'a jun comn dios tzcuch Moloc. Toto tzyac' yunnal chi xamb'alil, tz'och smul 'ayin.
22May cab' mach tzb'on 'ajmulal yet' yit wincal, 'icha tzb'o yet' 'ix 'ix. A jun cha, caw wal yajb'entac.
23May cab' mach tzmuln yet' no noc', sec matz juw 'el yuj jun cha. 'Ixta pax 'ix 'ix, may cab' junc 'ix 'ix tzmuln yet' no noc' cha, yujto caw yajb'entac jun cha.
24Man̈ eyixtc 'el e b'a yet' jun tzo'n̈ tic, yujto a yet' jun tzo'n̈ tic, xyixtj 'el sb'a jun tzo'n̈ nacion̈ 'oj in satl 'a eyojltac. 25Yuj jun tzo'n̈ cha, xjuw 'el slum eb' chi 'a in sat. Wan xo wa'n yowlal 'a slum eb' cha, ax slum eb' chi wan laj satn 'eli. 26Palta ax israel ex tic, yet' pax eb' chuc chon̈b'al cajn 'a e cal, yicljec jun tzo'n̈ in checnb'il tic, tze b'eylb'ani, man̈ eya'ch e b'a 'a tas maysch'olnil, 27yujto a jun tzo'n̈ maysch'olnil tic, a sb'ojnac eb' 'anma b'ab'l cajjnac lum lum cha, yuj cha, man̈x wach'c lu'um. 28Man̈ e b'o maysch'olnil 'a sat lu'um, sec wach' ma'oj ex satl lum 'icha 'ajnc eb' b'ab'l cajjnac lu'um. 29Tzann̈j mach tz'ec' 'a yib'n̈ sb'on jun tzo'n̈ tas yajb'entac tic, tojln̈ej satx 'el 'a e cal. 30Yuj cha, b'eylb'ejc in checnb'il, man̈ e b'eylb'oc jun tzo'n̈ b'eyb'al to yajb'entac, yujto a jun tzo'n̈ tic sb'eylb'ej eb' 'anma b'ab'l cajjnac lum lum chi 'ayex, man̈ eyixtc 'el e b'a yu'uj. An Jehová e Diosal in, an tzwala, xchi Dios.
Actualmente seleccionado:
Lv 18: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
