Ex 32

Jun yechl quelm wacx nab'a oro

(Dt 9.6-29)

1Ax xyiln eb' israel to tz'inni sjaw Moisés. 'Ix 'ec' tiempo yemx wul 'a sjolm lum witz cha, yuj cha, 'ix 'och oyn eb' 'a Aarón, xyaln eb' 'a 'ixtic:

—A ticnec b'i'an, tzqui nib'ej to tza b'o junc qui diosal tzon̈ jucb'tzani, yujto a Moisés win on̈ 'i'nec 'elt 'a Egipto, man̈ cojcoc tas 'ix 'i'ni, xchi eb' 'anma cha.

2'Ix ta'w Aarón 'a eb' 'ixtic:

—A ticnec, molb'tzejc q'uen yumchicn to oro 'aych 'a schicn eb' 'ix eyistzil, 'a eb' eyunnal mto 'a eb' 'ix eyisil. Tzlajw cha, tzeyi'n cot q'uen 'ayin, xchi 'a eb'.

3Smasnil eb' 'anma cha, c'uxn 'ix yij 'el eb' syumchicn cha, xwul ya'nc eb' 'a Aarón. 4Schan 'ec' jun tzo'n̈ q'uen cha, xya'n 'ulb'xoc 'a scal c'ac'. Syamn 'och stenn tojlb'oc, masnto 'ix b'o 'icha yechl junc quelm wacax. Xyiln eb' 'anma cha to xb'o 'el'chi, xyaln eb' 'ixtic:

Ex quit israelal, atn jun qui diosalec tic on̈ 'i'nec 'elt 'a Egipto, xchi eb'.

5A yic xyiln Aarón to wach' 'ix 'aj jun yechl wacx cha, yuj cha, 'ix sb'on jun yet'l xajmb'al 'a yojltac jun yechl cha. Xlajw cha, caw 'ip 'ix 'awj cha'an̈, xyaln 'ixtic:

—A q'uic'an tzqui nac sq'uin̈l jun tic, yuj qui'nec chan̈ sb'i Jehová, xchi.

6Ax 'a yic sacb' 'el 'a junx c'u cha, smasnil eb' 'anma cha, 'ix yac' eb' tz'a no noc' xajmb'aloc. Xya'n pax eb' xajmb'al yic junc'ojlal. Xlajw xoj cha, 'ix laj 'em wocn eb' 'anma chi swa'i, xlaj yu'nc eb' tas tzyuq'uej, axn wal cha, xlaj q'ue b'uynjoc eb' stzalji, xlaj ya'nc eb' chan̈al, xlaj sb'on eb' tas maysch'olnil 'a yojltac sdiosal cha.

7Yuj cha, 'ix yaln Jehová 'a Moisés 'ixtic:

A ticnec paxn̈ 'ejm muc'uc, yujto a eb' chon̈b' ejnac 'elt 'a Egipto, caw wal 'ix juw 'el snab'en eb'. 8Yajn̈j wal cha, 'ix yi'n 'el sb'a eb' 'a tas xwala, sb'on eb' jun yechl quelm wacax; xlaj cob' ya'nc 'ejm sb'a eb', xya'n eb' xajmb'al 'a jun yechl cha, xyaln eb' 'ixtic: Ex q'uit israelal, atn wal qui diosalec tic on̈ 'i'nec 'elt 'a Egipto, xchi cob' eb', xchi Dios 'a Moisés cha.

9Xyaln Jehová 'ixtc 'a Moisés:

—'Ix wila, to caw wal pit snab'en jun tzo'n̈ 'anma tic. 10A ticnec b'i'an, man̈ 'ac' a b'a yuj eb', yujto tzcot wowl 'a jun tzo'n̈ 'anma tic, to 'oj in satl eb' smasnil. Cojxn yet' eb' en̈til, ata 'oj in b'o jun niwquil chon̈ab', xchi Dios 'a Moisés.

11Xlajw cha, syamn 'och Moisés sc'ann niwnc'ojlal 'a Dios yuj eb' chon̈b' cha, xyaln 'a Jehová 'ixtic:

—Mamin Jehová, ¿tas wal yuj tzcot yowl a c'ojl 'a yib'n̈ eb' a chon̈b' tic, palta 'in to ach 'ix ej 'elt eb' 'a Egipto yet' 'a poder? 12Comnoc ma'oj a cha yal eb' 'aj Egipto chi 'ixtic: 'In to tu snab'en Dios 'a yib'n̈ eb' 'anma cha. Ton̈j xwul yi'l eb' 'a tic yic tzcham eb' 'a cusltac lum yu'uj, sec am tzsatcn 'el eb' 'a sat lum lum tic, 'oj schic eb'. Yuj cha, comnoc man̈toc 'ayn̈j cot yowl a c'ojl 'a yib'n̈ eb' a chon̈b' tic, comnoc tzac' wal niwnc'ojlal eb'. 13Comnoc tza na cot tas aljnac can yet' eb' a checb' 'a pecti', atn Abraham, Isaac yet' Israel. A 'a eb' aljnac can 'ixtic: 'Oj wac' q'uib' sb'isl eb' eyin̈tl b'aq'uin̈, lajn wal 'oj 'aj sb'isl eb' 'icha c'anal 'a satcha'an̈. A smasnil lum lum tic, 'ix wac' in ti wa'n 'a eb' eyin̈til, yic eb' tz'aj lum 'a smasnil tiempo, 'in xa chi, xchi Moisés cha.

14Xlajw cha, 'ix sjeln Jehová snab'en yic matz satl eb' schon̈b' cha. 15Ax Moisés 'ix pax 'emt 'a sjolm lum witz Sinaí, mec'b'il xo chapachn̈ q'uen q'uen yu'uj, q'uen 'ajtil tz'ib'b'il 'och jun tzo'n̈ checnb'il, tz'ib'b'il junjn eb' q'uen 'a schapaq'uil. 16Caw a Dios 'ix b'on eb' q'ue'en, a pax tz'ib'jnac 'och schecnb'il chi 'a eb' q'ue'en.

17Ax yic wan yemxwul eb' 'a sla'nil eb' chon̈b' cha, xyab'n Josué yel yaw eb' 'anma cha, 'ix yaln 'a Moisés 'ixtic:

—Coyn wal to owl 'aych yuj eb' 'anma chi 'a yol camplamento, xchi.

18'Ix ta'w Moisés chi 'ixtc 'a 'a:

—A jun tzo'n̈ 'aw cha, man̈ 'awc yic tz'ajx ganar owal, man̈ 'awc pax yic nan̈loc 'anma tzcham yuj owal; palta to b'it tz'och tzwab'i, xchi Moisés cha.

19Ax yic 'ix 'eml Moisés 'a sla'nil camplamento cha, 'ix yiln 'och jun yechl quelm wacx cha. Ax eb' 'anma', wan laj schan̈lwi eb', yuj cha, caw 'ix cot yowal, sjuln 'ejm eb' q'uen q'uen mec'b'il yuj cha, 'ix sma'n can poj 'a lum yich witz cha. 20Yajn̈j wal cha, 'ix 'at stza'noc 'elt jun yechl quelm wacx cha, sjuln 'at 'a scal c'ac', stenn chojoc, pococ xoj 'ix 'aji. Ax jun spoccal cha, 'ix ya'n 'ejm 'a scal a', 'ix yecn yuc' eb' israel chi jun a a cha. 21'Ix yaln Moisés 'ixtc 'a Aarón:

—¿Tas wal ach yutj jun tzo'n̈ 'anma tic, yuj cha xa chan wal 'och jun sniwquil mul eb' tic? xchi Moisés.

22'Ix ta'w Aarón 'ixtic:

—Mamin, comnoc matz cot owl 'ayin. 'In ojc wal snab'en eb' 'anma tic, caw wal tznib'j eb' sb'o maysch'olnil. 23'Ix tew 'och eb' 'ayin, xyaln eb' 'ixtic: A ticnec b'i'an, b'o junc qui diosal tzon̈ jucb'tzani, yujto a win Moisés, win on̈ 'i'nec 'elt 'a Egipto, man̈ cojcoc tas 'ix 'i'ni, tecn man̈x 'oj jawoc, xchi eb' 'ayin. 24Yuj cha, 'ix waln 'a eb' 'ixtic: A mach 'aj 'ay q'uen oro yet' q'uen yumchiquin, 'ijec cot q'uen 'ayin, xin chi 'a eb'. Xlaj yi'noc cot eb' jun tzo'n̈ chi 'ayin, 'ix wa'n 'ulb'xoc 'a scal c'ac'. Ax x'aji, 'ix 'el-l tza'njoc jun yechl quelm wacx tic, xchi Aarón cha.

25'Ixta to b'i'an, 'ix nachj 'el yuj Moisés to a eb' 'anma cha, schaj sc'ojl eb' ya'n squixwloc 'a sat eb' 'ajc'ojl yajch 'a eb', man̈x 'ic tenchj 'och wan eb' yuj Aarón. 26Ax Moisés 'ix 'och lin̈n 'a sti camplamento 'ix yaln 'ixtic:

A ticnec jun, a mach tzyal sc'ojl ya'n 'och sb'a 'a yol sc'ab' Jehová, cot cab' 'a in tz'ey tic, xchi.

Ax smasnil eb' yin̈tl Leví 'ix jaw eb' 'a stz'ey. 27Yuj cha, xyaln Moisés chi 'ixtc 'a eb':

—A Jehová qui Diosalec a 'ix aln 'ixtic: Junjn ex tzeyij eyespada, tzex 'at 'a scal camplamento tic, tzlaj e milnc can cham eb' eyu'tac, eb' e wach'c'ojol yet' eb' cajn 'a e tz'ey, xchi Dios, xchi Moisés cha.

28'Ix syiclj eb' levita jun checnb'il cha, 'aym 'oxe'oc mil eb' winc xcham 'a jun c'u cha. 29Xlajw cha, 'ix yaln Moisés 'a eb' levita chi 'ixtic:

—A ticnec, tze chaj can eyopiso 'a yojltac Jehová, yujto ex meltzj 'och 'a eb' eyunnal, 'a eb' eyu'tac, sec 'oj yac' Dios syaxilal 'a eyib'an̈, xchi Moisés chi 'a eb'.

30Ax 'a junx c'u cha, 'ix yaln pax Moisés 'a eb' 'anma chi 'ixtic:

—Ax tic, caw wal niwn e mul 'ix 'och 'a sat Jehová, tic tzin 'atx 'a sjolm lum witz chi jun 'ejm xo, 'a 'aj 'ayc' cha. Lemb'il 'oj wac' ganar ya'n niwnc'ojlal 'ayx yuj e mul tic, xchi Moisés cha.

31Xlajw xoj cha, 'ix 'atx Moisés 'a lum jolm witz cha, lum 'aj 'ayc' Jehová, xyaln 'a 'ixtic:

—Yel ton wal Mamin, a jun chon̈b'al eb' 'anma tic, caw wal niwquil smul eb' x'och 'a ojltac. Sb'o eb' jun sdiosal nab'a oro, xya'n 'ejm sb'a eb' 'a 'a. 32Yuj cha, tzin tew 'och 'ayach, comnoc wal tzac' niwnc'ojlal 'a yib'n̈ eb'. Palta toto matz ac' niwnc'ojlal eb' jun, wach' cab' tza suc sat in b'i 'a yojl ch'an̈ libro 'ajtil tz'ib'b'il eb' ec xo yaji, xchi Moisés.

33'Ix ta'w Jehová 'ixtc 'a 'a:

—Cojn eb' tz'och smul 'ayin, a eb' chi tzin suc sat sb'i 'a yojl in libro. 34Ax ticnec 'an, 'ixic, 'ij 'at eb' chon̈b' tic 'a jun lugar 'aj xwal 'ayach. A jun wángel 'oj b'ab'ljoc eyu'uj, a 'oj e jucb'tzani. Palta 'ay jun c'ual, 'oj wac' syailal eb' 'anma tic yuj smul 'ix 'och 'ayin, xchi Dios.

35Yuj cha, 'ix ya'n cot Jehová jun niwquil yab'il 'a yib'n̈ eb' israel, yujn̈ej wal to 'ix yac' 'ejm sb'a eb' 'a jun yechl quelm wacx sb'o Aarón.

Actualmente seleccionado:

Ex 32: CSS

Destacar

Copiar