Dt 15
15
A jun ab'il 'aj tz'ajx lajwc b'oc
1'Ix yaln pax Moisés 'ixtic: 'A junjn yuctquil ab'il, tzeya'n lajwc sb'oc eb' to 'ay sb'oc 'ayex. 2A jun niwnc'ojlal cha, 'ixtc 'oj eyutc 'ixtic: Smasnil eb' 'anma to 'ay junc tas tzmajnj 'ayex, yowlal tzeyac' niwnc'ojlal 'a eb' yuj tas majnab'il yuj cha. Man̈x e c'anb'c sb'oc junc quit chon̈ab', man̈x e c'an meltzjoc smajn cha, yujto a jun ab'il cha, 'ix yal Jehová to ata tzeyac' niwnc'ojlal smasnil b'oc 'a jun 'ejmn̈ej. 3Ax 'a junc eb' chuc chon̈b'al, tztac' e c'ann meltzjoc tas majnab'il yu'uj, palta a pax junc quit chon̈b' 'ay smajn 'ayex, yowlal tzeyac' niwnc'ojlal yuj tas chab'il yuj 'ayx cha. 4Sec may eb' 'anma meb'a 'oj 'aj 'a e cal, ax Jehová qui Diosalec, 'oj yac' syaxil 'a eyib'n̈ 'a sat lum lum 'oj yac' eyico'oc cha, 5toto wach' 'oj eyutc eyiclni, mto e b'eylb'an jun tzo'n̈ schecnb'il Jehová wan waln can 'ayx tic. 6'Oj yac' Jehová syaxilal 'a eyib'an̈, 'icha wal yaj yaln cani. Til wal tas 'oj eyac' majnil 'a jun tzo'n̈ xo nacion̈, palta ax xo tic may tas 'oj e c'an e majnoc. Til wal jun tzo'n̈ nacion̈ 'aj 'oj eyac' yajlil, palta man̈oc eb' 'oj yac' yajlil 'a eyib'an̈.
Tzon̈ colwj 'a eb' meb'a'
7Toto 'ay junc quit chon̈b'ec to meb'a 'a junc chon̈b' 'aj tzyac' Jehová Dios eyico'oc, man̈ tuc tzeyutj e nab'en 'a 'a, palta yowlal tzex colwj 'a junc quit chon̈b' to meb'a cha. 8Wach' cab' tzeyutj e nab'en 'a 'a, 'a'c junc tas smajnoc. 9Man̈ e na jun man̈ nab'enal tic 'ixtic: Jab'xoj sjaw jun yucl ab'il yic tz'ajx niwnc'ojlal smasnil b'oc, xe chi ta, xe jut e sat 'a junc quit chon̈b' to meb'a cha, majt eyac' junc chi smajnoc. Toto ma'oj eyac'a', 'oj q'ue yaw 'a Jehová eyu'uj, ax yoch jun chi e muloc. 10Yowlal tzex colwj 'a junc meb'a', man̈ teb'iloc tzeyac' tas tznib'ej. Toto 'ixta tzeyutej, ax Jehová qui Diosalec, 'oj yac' yaxilal 'a yib'n̈ smasnil tas tze b'o'o. 11A meb'a'il cha, may xon b'a'n̈ 'oj 'och wan 'a scal eb' 'anma 'a sat lum lum tic. Yuj cha, tzwaln can 'ayex, to wach' tzeyutj e nab'en 'a eb' quit chon̈b'ec tz'ab'n syal meb'a'il 'a yol e chon̈b' cha.
Ley 'a eb' tzchon̈ch sb'a mosoal
(Ex 21.1-11)
12Toto 'ay junc quit chon̈b'ec tzchon̈ch sb'a mosoal 'ayex, winac mto 'ix, cojn waque ab'il tzex yac' servil, ax 'a yucl ab'il, tzeya'n 'el 'a libre. 13A yic tzeya'n paxoc, man̈ eyac' meltzjoc 'a 'ichn̈jta', 'ay cab' jac tas tzeyac' 'a 'a. 14Tzeyac' jaywn̈oc scalnelu, niwn cab' strigo tzeyac'a, tzeya'n yal uva 'a 'a, tzyal 'el'chi to tze poj tas tzyac' Jehová 'ayx yet'oc. 15Tze na coti, chajtlto on̈ 'e'c mosoal 'a Egipto, palta a Jehová qui Diosalec on̈ 'i'nec 'elt 'a libre. Yuj cha, tzwaln can eyab' jun tzo'n̈ checnb'il tic.
16Palta toto a junc e moso cha, may sgana ex yactn cani, yujto tzc'ay eyet'oc, mto tzc'ay yet' eb' eyunnal, yujto wach' pax yaj eyu'uj. 17Toto 'ixta snab'en junc e moso cha, tzeyij 'och 'a yol sti spuertail eyatut, axta tzeyolcn schicn yet' junc q'uen niwquil 'acxa'. 'Ixta tzeyutej, sec tzcan e mosooc 'a smasnil tiempo. An̈jtona', 'ixta pax tz'aj eb' 'ix 'ix tz'ochcn 'a'j servil cha. 18Man̈ tuc cab' tzeyab'i, yic tzeya'n 'el eb' e moso 'a libre, eb' man̈ yico'oc sb'a, yujto waque ab'il pax tzex yac' servil eb', ax stojl eb', cojn spacl 'aj tzq'ue'ch 'icha tzeyutj e tojn junc e majn tz'acn tzyij stojl 'a junjn c'u. Toto 'ixta', 'oj yac' Jehová Dios syaxilal 'a yib'n̈ smasnil tas tze b'o'o.
Ley yuj sb'ab'l 'une no noc'
19Smasnil sb'ab'l 'une e wacax, e calnelu, toto smam no 'unn cha, yic Jehová tz'aj no', yowlal tze si'cn 'el no yico'oc.
Man̈ eyac' munljoc no sb'ab'l 'une e wacax, man̈ e joxl pax xil no sb'ab'l 'une e calnelu cha. 20'A junjn ab'il tze mol chin e no yet' eb' eyunnal 'a yojltac Jehová qui Diosalec, 'a jun lugar 'oj si'l yico'oc cha. 21Palta toto 'ay spaltail no', coxo, mto may yol sat no', mto 'ay tas palta 'a sniwnal no cha, man̈ eyac' no xajmb'al-l 'a Jehová qui Diosalec. 22Tztac' e chin no 'a yol e chon̈b' 'aj cajn ex 'ec' cha, toxn̈ej wach' eyaj 'icha yaln ley mto ma'ay, tztac' e chin no e masnil, 'icha tz'aj schix smasnil c'aj e no c'ultquilchej, 'ixta tzeyutj e chin no'. 23Palta man̈ e chi no schiq'uil, ton̈j tze secl 'a sat lum 'icha tz'aj secx 'el a a', xchi Moisés.
Actualmente seleccionado:
Dt 15: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
