Dt 1
1
Tzyalx cot Moisés swach'c'ojlal Dios
1A 'a jun libro tic tz'ib'b'il can jun tzo'n̈ paxti 'ix yal Moisés 'a eb' israel yic 'ayc' eb' 'a lum cusltac lum 'a sla'nil xo sti a Jordán 'a stojlal 'aj tzq'uel c'u 'a lum tzcuch Arabá. Ata 'ay lum 'a yojltac a Chac Mar, 'a snan̈l jun tzo'n̈ chon̈b' tic, atn Parán, Tofel, Labán, Hazerot yet' Dizahab. 2Uxlche c'u ste'nb'il lum Horeb atn pax lum tzcuch Sinaí, masnto 'a lum Cades-barnea, atn 'a jun b'e tz'ec' 'a lum switzl Seír. 3A yic 'ayx 'och 'a schawinc ab'il yelt eb' israel 'a Egipto, 'a b'ab'l c'u yoch yuxlchil 'uj, ata syamch Moisés yaln 'a eb' chon̈ab' tas tzyutj Jehová yaln 'a yib'n̈ eb'. 4A yic mantzac yal Moisés jun tzo'n̈ tic, 'emnc xo win Sehón sreyl eb' amorreo yuj eb' israel. Ata cajn win 'a chon̈b' Hesbón. 'Ix 'em pax win Og sreyl Basán yuj eb'. Ata cajn win 'a Astarot yet' 'a Edrei. 5A yic 'ayc' eb' 'a lum pan̈n 'a stojlal 'aj tzq'uel c'u 'a sla'nil xo a Jordán, 'a yol smacb'en lum Moab, ata 'ix yac' Moisés scuynb'il eb' yit chon̈b' cha, 'ix yaln 'a eb' 'ixtic:
6A Jehová qui Diosalec, a 'ix aln jun tzo'n̈ tic 'ayn̈ec 'a lum Sinaí, ata yaljnac 'ixtic: Niwn xo tiempo 'ayx 'ec' 'a jun lum tzaln tic. 7A ticnec, meltzjan̈c can 'at 'a lum slum eb' amorreo 'ay 'a lum jolmctac witz, yet' 'a jun tzo'n̈ xo lugar 'ay 'a sla'nil eb' cha. Tzex 'ec' 'a lum span̈nil sti a Jordán, 'a lum jolmctac witz, 'a lum pan̈ctac, 'a lum Négueb, yet' lum 'ay 'a sti a mar 'a yol yic eb' cananeo, yet' pax lum Líbano, masnto tzc'och lum 'a sti a niwquil a Éufrates. 8An ton 'ix wac' jun lum chi 'ayex. A ticnec 'ixquec, 'at cajc lu'um, yujto wa'jnac in ti 'a eb' e mam eyicham, atn Abraham, Isaac, yet' Jacob to tzwac' lum 'a yin̈tl eb', xchi Dios 'ayn̈ec.
Sic'b'il 'och eb' juez
(Ex 18.13-27)
9A 'a yic jun tiempoal cha, ata xwal 'ayx 'ixtic: A in ch'ocoj caw matz techj ex wilni. 10Yujto til wal cunnal tzyac' Jehová qui Diosalec, ax ticnec, caw tzniwtj jun qui chon̈b'ec tic cujec, til wal tz'aj qui b'islec 'icha c'anal 'ay 'a satcha'an̈. 11A cab' Jehová qui Diosalec yet' eb' qui mam quichmec, a tz'a'n niwtjoc qui b'islec, to smil-l xo 'ec'b'al 'a yib'n̈ 'icha qui b'islec ticnec, ax ya'n syaxilal 'a quib'n̈ 'icha wal yaj ya'n can sti'. 12A in ch'ocoj, matz techj ex wiln yet' eyowal, mto chacjb'al tzpitzw chan̈ 'a e cal. 13Yuj cha, xwaln 'ayex, a 'a scal junjn 'in̈tal, to tze sic' 'elt eb' winc caw 'ay snab'en, eb' 'ay sjelnal, eb' caw tec'an, sec a eb' tzwa'ch yajlilc 'a e cal, xin chi 'ayex.
14Ax xo tic, ex ta'w 'ayn 'ixtic: Caw wal tzchaj qui c'ojl jun a nab'en cha, xe chi 'ayin. 15Yuj cha, xin si'n 'elt 'a scal junjn 'in̈tal, eb' winc to jelan, eb' 'ay snab'en si'mb'il, 'ix wa'n yopiso eb' yic tz'och eb' eyajliloc. 'Ay eb' xwa'ch yopiso 'a yib'n̈ jun mil, 'ay eb' 'a yib'n̈ jun ciente, 'ay eb' 'a yib'n̈ cincuenta, 'ay eb' 'a yib'n̈ lajn̈wa'an̈, 'ay pax eb' x'och yajlil 'a yib'n̈ junjn 'in̈tal eb' quit chon̈b'ec. 16Xlajw cha, xwa'n can snab'enoc eb' eyajlil cha, xwaln 'a eb' 'ixtic: Wach' tzeyutj eyiln eyopiso, wach' tzeyutj e b'onyaj eb' quit chon̈ab', yet' pax eb' chuc chon̈b'al 'ayc' 'a qui calec. 17A yic tze b'onyaj eb' 'anma cha, man̈ chucchc cab' yel'ch eb' 'a e sat. Lajnn̈ej tzeyutj e b'onyaj eb', eb' 'emmquilal yeq'ui yet' eb' niwc winac. May cab' junc eb' 'aj tzex xiwi, yujto a jun b'eyc'ojlal cha, man̈ e yico'oc, palta yic Dios. Toto 'ay wal junc tas caw 'ajltac jun, tzeyac' 'e't 'a yol in c'ab', an xo 'oj in b'oyaji, xin chi 'a eb'.
18A 'a jun tiempoal cha, caw wal niwn tas 'ix wac' yojcoc can 'el eb', sec tojl tzyutj eb' sb'onyaj junc mach, xchi Moisés.
Eb' lajchwan̈ 'ilm lu'um
(Nm 13.1—14.4)
19'Ix yaln pax Moisés 'ixtic:
A yic on̈ cotc pax 'a lum yich witz Sinaí, 'ix qui tojlb'tzanc cot qui b'a 'a lum jolmctac witz yic eb' amorreo, yuj qui yiclni tas 'ix yal Jehová qui Diosalec. On̈ b'eyc cot 'a lum niwquil cusltac lu'um, lum caw 'ay smay, masnto on̈ jawc 'a Cades-barnea. A jun tic, xquilc qui masnil. 20Ata 'ix wal 'ayx 'ixtic: A ticnec b'i'an, on̈ jawc 'a sat slum eb' amorreo, atn lum tzyac' Jehová quico'oquec. 21A Jehová qui Diosalec, a tz'a'n lum 'ayn̈ec. A ticnec 'ochn̈ec 'a sat lu'um, 'ijec 'ec' lum 'icha 'ix yutj Jehová yalni, atn qui Diosalec yet' eb' qui mam quichmec. Man̈ ex xiwoc, may cab' mach tzchab'c'ojlej sb'a, xin chi 'ayex. 22Palta ax xo tic, xwul eyalnc 'ayn 'ixtic: Yel xom wal wach', toto 'ay jaywn̈oc on̈ tzon̈ b'ab'lji yic tz'at quilnc tas yilx lum lum cha. Tzlajw cha, tzon̈ meltzj paxi, tzwul calnoc eyab'i' 'aja b'e 'aj wach' qui 'atec, 'aja pax chon̈b' 'aj wach' cochec, xe chi 'ayin.
23A wal tas xe yal cha, caw wach' 'ix wab'i; yuj cha, xin si'n 'elt lajchwan̈ eb' winc 'a e cal, junjn 'a junjn 'in̈tal. 24A eb' chi 'ix 'at 'a lum jolmctac witz, 'ix c'och eb' 'a lum span̈nil yic Escol, 'ix laj 'ec' eb' smaclc yil jun lum cha. 25Xlajw yec' eb' yil lum lum cha, 'ix yi'n cot eb' sat te 'awb'ente 'ay 'a lu'um, 'ix ya'n eb' 'ayn̈ec. Xlajw cha, xyaln eb' 'ixtic: A wal lum lum chi tzyac' qui Diosalec quico'oc, caw wal wach' lu'um, xchi eb'. 26Palta ax xo tic, ma'ix yal e c'ojl e 'at 'a lum lum cha, 'ix eyac' pitl e b'a 'a tas xyal Jehová qui Diosalec. 27A 'a eyet'l 'aj 'ayex, ata xeyal speclal Jehová, xeyaln 'ixtic: Matz nib'j Jehová tzon̈ yilec, on̈ yijec 'elt 'a Egipto, palta cojn yuj on̈ ya'nec 'och 'a yol sc'ab' eb' amorreo, sec tzon̈ smilc eb'. 28Ax ticnec, ¿'aj wach' tzon̈ c'ochec? A eb' quit chon̈b'ec tic, 'ix yal eb' to a 'a jun lugar cha, 'ay eb' 'anma caw jeln to 'a quib'n̈ec. Caw niwc stel eb', caw niwc pax ab' schon̈b' eb', chan̈ pax ab' ya'jt smuroal schon̈b' eb' cha. Xyiln pax ab' eb' ewin yin̈tl win Anac, atn eb' niwc ste'il, caw 'ay smay eb', atn wal yuj jun tzo'n̈ eb' cha, caw tzon̈ xiwec, xe chi.
29Yuj cha, xwaln 'ayx 'ixtic: Man̈ e comn xib'tc e b'a yuj jun tzo'n̈ cha. 30A Jehová qui Diosalec, a 'oj b'ab'ljoc cujec, a 'oj 'a'noc owl cujec, 'icha wal cutjnaquec quiln tas 'ix sb'o 'a Egipto, 31yet' pax tas quiljnaquec 'a lum cusltac lu'um. A Jehová qui Diosalec, 'icha to quetzb'iln̈ec yu'uj, yic on̈ yi'nec cot 'a yol b'e, masnto on̈ jawc 'a jun lugar tic. 'Icha wal tzyutj squetzn b'ey junc mamb'il yunnal mto yisil, 'ixta 'on̈ yutjec. 32Palta ax xo tic, caw wal ma'ix eya'ch e c'ojl 'a Jehová qui Diosalec. 33A Dios b'ab'l scot cujec, yic sayn 'aj wach' on̈ 'ochcwa'an. A 'a 'ac'wal, a jun c'ac' tzon̈ 'i'nec b'eyoc, ax 'a c'ual, a jun 'asn tzon̈ 'i'nec pax b'eyoc, xchi Moisés.
Cotnc yowl Dios 'a eb' israel
(Nm 14.20-35)
34'Ix yaln pax Moisés 'ixtic: A yic xyab'n Jehová to wan eyaln speclal, yuj cha, xcot yowal, 'ix ya'n can sti 'ixtic: 35May wal junc eb' 'anma tu snab'en 'a jun tiempoal tic, 'oj 'ilnoc lum lum caw wach' cha, atn lum wa'jnac in ti wa'n 'a eb' e mam eyicham. 36Cojn Caleb win yunnal Jefuné, a win tic, 'oj yilch wal win lu'um. 'Oj wac' lum 'a winac, yet' pax 'a eb' yin̈til, atn lum 'aj x'ec' winac, yujto syiclj smasnil tas 'ix wala, xchi Dios 'ayin.
37Eyuj wal ax tic, 'ix cot yowl Jehová 'ix yaln 'ixtc 'ayin: An̈jtona pax ach tic, ma'oj a c'och 'a sat lum lum cha.
38A Josué win yunnal Nun, win a checab', a win 'oj 'ochx can a jeloc, yic tzyi'n b'ey jun chon̈b'al eb' 'anma tic. 'A'cn snab'enoc, yujto a 'oj 'a'noc 'och eb' et chon̈b' 'a sat lum lum cha. 39Wach'xam ax tic, 'ix eyala to a eb' 'ajc'ojl yajch 'ayex, a eb' 'oj macnoc can 'ec' eb' eyunnal, atn eb' eyunnal cotc to, eb' to mant 'a snab'en, palta atn wal eb' chi 'oj c'och 'a sat lum lum cha. An xo 'oj wac' lum yico'oc eb'. 40Ya' sb'a mantzac c'och stiempoal wa'n lum 'a eb', tztac' e meltzj can pax 'a lum cusltac lu'um, 'a jun b'e tzc'och 'a a Chac Mar, xchi 'ayn eyu'uj.
Xlajw 'el eb' israel yuj stenmtaquil
(Nm 14.39-45)
41Yuj cha, xe pacn 'ayn 'ixtic: Caw wal yel x'och qui mul 'a Jehová, palta ax ticnec jun, 'oj qui 'atc 'a owl cha, 'oj ca'c quip 'icha 'ix yutj Jehová qui Diosalec yalni, xe chi. Yuj cha, xcob' eyi'noc eyamc'ab' yic owal. Am wal e nani to yajn̈ej ax e q'ue'ch 'a lum jolmctac witz cha. 42'Ix yaln Jehová 'ayin to tzyac' wal 'ixtc 'ayex: Man̈ ex 'at 'a owl cha; man̈ e te'wtzoc e b'a eya'n owl yet' eb' 'ajc'ojl yajch 'ayx cha, sec matz ex lajw 'eli, yujto man̈ in 'ayc 'ec' eyet'oc, xchi Dios, xin chi 'ayex.
43'Ix wal jun tzo'n̈ chi eyab'i', palta ax xo tic, ma'ix e chaj eyab' 'ayin. 'Ix e ten tas xyal Jehová 'ayex, ex 'ec' 'a yib'an̈, ex 'at 'a eb' lum jolmctac witz cha. 44Ax 'ix 'aji, a eb' amorreo cajn ta', 'ix 'elt tzicnjoc eb' 'ayx 'icha no sno'l 'acan̈, ex spechn eb', masnto ex cotcn 'elc yuj eb' 'a lum yol smacb'en Edom yet' 'a yol yic Hormá. 45Ax yic ex laj japxi, xlaj eyamn 'och eyoc' 'a yojltac Jehová, palta man̈x 'ic yab' Jehová tas xeyal cha. 46Yuj ton wal cha, najtl tiempo on̈ canc 'a yol smacb'en lum Cades, xchi Moisés.
Actualmente seleccionado:
Dt 1: CSS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
