1 R 2
2
Slajb' checnb'il xyac' David 'a Salomón
1Jab'xoj sjaw schamlil rey David, yuj cha, 'ix yaln can 'ixtc 'a Salomón, atn yunnal: 2Jab'xoj wal 'oj in chami, 'icha tz'aj smasnil eb' quit 'anmal 'a yolyib'n̈q'uinal. Caw te'n tzotj a b'a, 'icha junc winc caw te'n xo snab'en. 3Yiclj schecnb'il Jehová qui Diosal, tza b'on 'icha tznib'ej, yet' tas tzyal sley, schecnb'il, yet' pax scuynb'il tz'ib'b'il can 'a ch'an un̈ yic Moisés. To 'ixta', caw wach' 'oj 'el'choc smasnil tas 'oj a b'o', toxn̈ej 'aj tzach 'ati, 4sec wach' 'oj 'el'choc tas alb'il can yuj Jehová 'ayin, yic yaln 'ixtic: Toto tzyac' cuenta sb'a eb' en̈tl yet' sb'eyb'al, toto tojl 'oj yutc sb'a eb' 'a wojltac 'a smasnil sc'ojol, yet' 'a smasnil snab'en, to 'ixta', ma'oj yac' palta eb' en̈tl yoch reyl 'a chon̈b' Israel tic, xchi 'ayin.
5'In ojc xo ach tic, tas in yutj Joab, win yune 'ix Sarvia, 'ix smil cham win chawn̈ eb' sgeneralil eb' soldado quit israelal: atn Abner yunnal Ner, yet' Amasa yunnal Jeter. A wal yic may owal, 'ix milx cham eb' yu'uj, 'icha to a 'a owl 'ix cham eb', 'icha to 'ix b'on̈x sincha yet' xan̈b' yuj schic'l eb'. 6Yuj cha, caw jeln tzotj a b'a, ma'oj cham cab' Joab 'a 'ichn̈jta'. 7Palta ax eb' yunnal Barzilai 'aj Galaad, tza chamc'ojlej eb' in c'ana'. Tzawtjn̈ej eb' wac et'oc, yujto a eb' 'ix colwj 'ayin, yic in 'at 'elc 'a o'tac Absalón. 8Ax pax Simei 'ayc' 'a tic, yunnal Gera 'aj Bahurim, yin̈tl Benjamín, caw tu xyal 'ayin, yic wan in b'ey 'a Mahanaim. Palta 'ix c'och 'ayn 'a sti a Jordán yic tz'at in schanoc, yuj cha, 'a yojltac Jehová 'ix wa'n in ti 'a 'a to matz in mil chamoc. 9Man̈ ac' niwnc'ojlal 'a 'a. Ach tic caw 'ay a nab'en, tzcham wal a nani tas tzotej. Man̈ cab' ton̈joc tzcham 'a 'ichn̈jta', palta to yowlal tzmilx cham yuj tas tu sb'ojnac, xchi rey David.
Schaml rey David
(1 Cr 29.26-30)
10Ax 'a yic xcham rey David, ata 'ix mucx 'a jun lugar tzcuch Schon̈b' David. 11Chawinc ab'il 'ix yac' reyl 'a yib'n̈ chon̈b' Israel, uque ab'il 'ix yac' reyl 'a Hebrón, ax 33 ab'il 'ix yac' reyl 'a Jerusalén. 12A Salomón 'ix 'ochcn reyl sjelc rey David, atn smam. Caw te'n yutjnac sb'a 'a yopiso cha.
Schaml Adonías
13'Ix 'at Adonías yune 'ix Haguit 'at sc'umc 'ix Betsabé, snun Salomón. 'Ix sc'anb'n 'ix 'ixtc 'a 'a:
—¿Junc'ojlal am yaj a nab'en tzach jawi? xchi 'ix.
—N', xchi winac. 14'Ix syamn 'och win yal 'ixtic: 'Ay jun in nab'en tzwul wal 'ayach, xchi winac.
—Al 'an, xchi 'ix.
15—'In ojc ach tic, to a jun 'opiso yic reyal, wic xon yaji, ax smasnil eb' quit israelal tan̈b'il yuj eb', b'a'n̈ tzin 'och reyal. Ax ticnec, a ni wu'tac 'ix 'och reyal, yujto a Jehová a 'ixta 'ix 'utni. 16A ticnec jun, 'ay jun tas tzin nib'j tz'ac' a b'a yu'uj, palta man̈ a mac'q'ui, xchi winac.
—Al 'an, xchi 'ix.
17—Tzin tew 'ayach, to tzal 'a rey Salomón, to tzyac' win 'ix Abisag 'aj Sunem wistloc. 'Oj syiclc xon win tas 'oj ala', xchi win Adonías 'a 'ix.
18—Inye, 'oj wal 'a win rey tas chi tza nib'j cha, xchi 'ix.
19Xlajw cha, 'ix 'at 'ix Betsabé chi paxtinc yet' win rey Salomón yuj Adonías. Ax xyiln win rey, 'ix 'ochch snun, yuj cha, 'ix q'ue wa'an, 'ix 'em n̈ojn 'a yojltac snun cha. Xlajw cha, x'ejm pax wocn 'a sdespacho, 'ix ya'n 'ijxc cot jun niwquil xila 'aj tz'em wocn snun chi 'a swach' c'ab'. 20'Ix yaln 'ix 'ixtic:
—Tzin tew 'ayach, tzin nib'j tzwal jayb'eln̈ in paxti 'ayach. Palta man̈ a macc' tas tzwala, xchi 'ix.
—Al 'an nunin, tas chi tza c'an cha, ma'oj in macc' 'ayach, xchi win rey.
21—Comnoc ab' tzac' 'ix Abisag 'aj Sunem yistloc win o'tac Adonías, xchi 'ix.
22—¿Tas yuj tzwul a c'an 'ix Abisag yuj win Adonías cha? 'Icha to tzwul a c'ana', sec tzwac' wopiso tic 'a 'a, yujto in b'ab'l 'u'tac. 'In ojtac 'aych pax Abiatar ya'mal 'och sti eb' 'anma 'a Dios yet' winac, an̈jtona pax Joab yune 'ix Sarvia, 'aych pax yet'oc, xchi win rey 'a snun.
23A yic xlajw yaln rey Salomón jun tzo'n̈ cha, 'ix ya'n sti 'a yojltac Jehová 'ixtic: Ya' cab' Dios in yailal caw ow, toto matz cham Adonías yuj tas tzc'an tic. 24A Jehová in 'a'n 'och reyl sjelc in mam, atn David, sec wach' tz'el'ch tas 'ix yal yet' sti', a x'a'n jun 'opiso tic 'ayin, yet' 'a eb' win̈til. Yuj cha, tzwac' in ti', to 'oj cham Adonías chi wal ticnec, xchi Salomón.
25Xlajw cha, 'ix schecn 'at rey Salomón win Benaía yunnal Joiada, yic tz'at smilnc cham Adonías cha. Yuj cha, 'ix 'at winac, 'ix cham Adonías chi yu'uj. 26'Ix yaln pax win rey chi 'ixtc 'a Abiatar: A ticnec tzwal 'ayach, 'ixc 'a a lum 'a Anatot; yujto caw wal smoj a chami, palta matz ach in mil cham ticnec, yujto ach 'ajcuenta ach eln scaxail strato Jehová Dios 'a yojltac David, atn in mam, locn ach 'ix 'ab' syal yet' in mam cha, xchi. 27'Ixtnta 'ix 'aj yel Abiatar 'a yopiso ya'n 'och sti eb' 'anma 'a Dios yuj Salomón. 'Ix 'el'ch tas alb'il can yuj Jehová 'a Silo 'a yib'n̈ eb' yin̈tl Elí.
28An̈jtona pax Joab 'ix ya'ch sb'a yet' Adonías, wach'xam ma'ix ya'ch sb'a yet' Absalón. A yic 'ix c'och jun 'ab'x tic 'a Joab, 'ix 'at 'elc 'a scajnub' Jehová, 'ix 'och yamn 'a sch'ac yet'l xajmb'al yic tzcoln sb'a snani. 29Palta 'ix alx yab' rey Salomón, chajtlto a 'a yet'l xajmb'al 'a scajnub' Jehová, ata x'at scol sb'a Joab. Yuj cha, 'ix schecn 'at Salomón win Benaía yunnal Joiada, yic tz'at smilnc cham ta'. 30'Ix 'och Benaía 'a yol yamq'uil scajnub' Jehová, 'ix yaln 'a Joab 'ixtic:
—Tox 'ix yal win rey to tzach 'elt ta', xchi 'a 'a.
—¡Ma'ay! ¡A 'a tic tzin chami! xchi Joab cha.
'Ix meltzj Benaía, yic tz'at yalnc 'a win rey, tas 'ix yutj ta'wc sb'a Joab cha. 31'Ix yaln win rey 'ixtic:
—B'o cab' 'icha tznib'ej, cham cab' ta', tzlajw cha, tza mucni, sec wach' man̈xtzac b'inax 'a scal eb' yin̈tl in mam yet' 'ayin, yuj eb' 'anma may smul 'ix smil chamoc. 32'Och cab' smulc yuj Jehová, yujto man̈ yojcoc in mam, atn David, yic 'ix smiln cham win Joab chi win Abner yunnal Ner, sgeneralil eb' soldado israel, yet' pax Amasa yunnal Jeter, sgeneralil eb' soldado Judá. A eb' chawn̈ cha, caw wach' eb', yiclum eb'. 33A schaml eb' cha, 'och cab' smulc Joab, yet' eb' yin̈tl 'a smasnil tiempo. Palta ya' cab' Jehová sjunc'ojlal 'a quib'n̈ an̈ yin̈tl on̈ec rey David, to 'oj quemc wocnn̈ej 'a sdespacho, xchi Salomón.
34Xlajw cha, 'ix 'at Benaía yunnal Joiada, x'at smilnc cham Joab, 'ix mucx can 'a yatut 'a cusltac lu'um. 35Ax win rey chi 'ix 'a'n 'och Benaía yunnal Joiada, syajlilc eb' soldado sjelc Joab, yet' Sadoc 'ix 'ochcn ya'malc 'och sti eb' 'anma 'a Dios sjelc Abiatar. 36Xlajw cha, 'ix ya'n 'awtx cot Simei, 'ix yaln 'ixtc 'a 'a:
—B'o chan̈ junc atut 'a Jerusalén tic, sec wach' ata tzach can cajan. Palta man̈ ach 'at 'a junc xo lugar. 37Toto tzach 'el 'a tic, tza'n pural ec' 'a yojl a Cedrón, toto 'ixta', yowlal tzach chami, mun wal ach tzej cot chaml 'a eb'an̈, xchi Salomón 'a 'a.
38—Caw wach' 'ix al 'ayn mamin rey. 'Oj in b'o 'icha tas tzala, xchi Simei cha.
Najtl 'ix 'ec' cajn Simei 'a Jerusalén. 39Palta a wal slajw 'oxe ab'il, 'ix 'at chawn̈ eb' smoso to man̈ yicoc sb'a 'eloc. Ata 'ix c'och cajn eb' yet' Aquis yunnal Maaca, sreyl Gat. A yic 'ix alx yab' Simei, to ata 'ayc' eb' smoso 'a Gat, 40yuj cha, 'ix ya'n 'och stz'um no sb'uru muc'uc, 'ix 'at 'a Gat 'a win Aquis, yic tz'at saync 'ec' eb' smoso cha. 41'Ix yab'n Salomón, chajtlto 'a Simei 'ix xit'c 'a Gat, palta tox 'ix meltzj pax 'a Jerusalén. 42Yuj cha, 'ix ya'n win rey 'awtxoc cot winac, 'ix yaln 'a 'ixtic:
—¿Tom ma'ix wac' ac' a ti 'a Jehová, to matz ach 'at 'a junc xo lugar? 'Ix cham waln 'ayach, toto 'ay 'aj tzach 'at 'a junc xo lugar, yowlal tzach chami. ¿Tom ma'ix ach ta'w 'ayin, 'ix aln 'ixtic: Caw 'oj in yicl in b'on tas 'ix ala, xa chi 'ayin.? 43¿Tas yuj ma'ix a yiclj a ti 'ix 'ac' 'a Jehová, ma'ix a yiclj pax tas 'ix wala? 44Ach tic, na coti jantc maysch'olnil 'ix al 'a in mam, atn David; yuj cha, a ticnec a Jehová 'oj a b'eyc'ojlani, ax smasnil tas 'ix a b'o cha, 'oj cotcn 'a eb'an̈. 45Palta ya' cab' Jehová syaxilal 'a wib'n̈ an rey Salomón in tic, ax sdespacho rey David te'nn̈ej yaj 'a smasnil tiempo 'a yojltac Jehová, xchi win rey cha.
46Xlajw cha, 'ix yaln win rey 'a Benaía, to tz'at smil cham Simei cha, yuj cha 'ix 'at Benaía 'at smila'. 'Ixtnta 'ix 'aj swach' can jun 'opiso chi 'a yol sc'ab' Salomón.
Actualmente seleccionado:
1 R 2: CSS
Destacar
Compartir
Comparar
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Chuj San Sebastian © Sociedades Bíblicas Unidas, 1999.
