Revelesen 18
18
A Papilun Lil irs
1Itauatah a si udlani lera, nla ensel uraur ml ima dan eia, nut huan istudau, si p'sp'asan iani ti nut iren arna nadep'. 2#Aisaia 21:9; Seremaia 51:8; Rev 14:8; Aisaia 13:21; Seremaia 50:39.Laha, iv'ara eia sp'n a nadl lil, kavr ti a, “A Papilun lil itars sarei, itars sarei, kadama kav'i nut m'im'iln stu avlak, kav'i nut m'im'iln udlani Atua ilep'lar avp'resin, kav'i m'lna m'anh stu udlani alep'lei. 3#Aisaia 23:17; Seremaia 51:7.Sena ti v'anu udlani atvm'n sera naui m'iel na nl reran kavan si stu m'a tav'et lera. Mlin udlani arna nadep' atvan sera si stu inep'a tav'et lera. M'ertu udlani arna nadep' la avan stua ha, siar ima kastudau, sena ti tav'et lahara irn nam'er a sei istudau nakl.”
4 #
Aisaia 48:20; Seremaia 50:8; 51:6,45. Sarei, nrn nadl uraur idan eia, kavr ti a, “Pavruh asnn, arm'ertuak, a ti mavp'lt m'a si stu iani. Imahei ti der la ipaiari ha, ipaier kam'i. 5#Ap'u 18:20,21; Seremaia 51:9.Sena ti si stuan itupiani itier sera nut eia. Atua iv'ahur p'kln udlani iaviviln. 6#Npin 137:8; Seremaia 50:29.Pavtu m'lna si udlani ittu sarei a kam'i kavani ipav'aru, ipaviviln a pari stuan. Sei iuhei al panikinan, pavtum'alet ani ml ipahua ipav'aru. 7#Aisaia 47:7-9.Hin itukl sera hin istudau kalak p'as, sian istudau. Pavutakm ani kavtum'alet a der ipalil ani, ipaviviln a si lera. Sena ti hin ivri arna nln, kavr ti a, ‘Kana nlak kav'i mlin tav'et, nav'i tvtanu, nkatakal naran kinkin.’ 8Sena si lera, deran udlani ipaiari arna napn ipamk uaki, iv'i m'ien kav'i tklien kav'i m'em'erien. Laha, ipahapu udlani a nep'v'en, sena ti a Mlin Lil Atua la iv'ana hua m'ei ha, Hin ihua.
M'ertu arna nadep' udlani avtakal sanan a Papilun
9 #
Esikiel 26:16,17. Laha, mlin udlani arna nadep' la avan si stu m'ei ha, kavlak p'as m'a sian udlani, apavvalau kavtakal sanan, naran apavla ienap' nen, sena ti ihapu. 10Kavp'tir v'iv'a sena ti avdedrn a der iari, kavvr ti a, ‘Uei, uei, v'anu lil lera a Papilun, iv'i v'anu hua, v'eti arna m'etaneiel iamk uaki Atua iutakm ani udlani.’
11 #
Esikiel 27:31,36. Laha, m'ertu udlani arna nadep' avan stua apavvalau kavtakal sanan, sena ti m'ertu kinkin iaul si kinkin avulul ani nakl ml. 12#Esikiel 27:12,13,22.Sei avulul ani iv'i sei aani a kul, silva, nav'et p'as, neiau tva ier, kalik tva, kalik im'ielm't, kalik iv'i silik, kalik m'iel, nai m'in ip'as, si ururaur udlani aani a lu si dm iv'i elevan, m'a si udlani aani a nai p'as kinkin, m'a nki aani a aian v'il, aian, m'a nav'et hua. 13Iv'i sinamun, m'a ru nai kinkin m'in ip'eset kav'i pumat, sida p'as iv'i vrankinsens, naui m'iel, ueil, vlaua p'as aan p'ret aranan, uit, pluk, sivsiv, hus m'a kat nen, m'er p'akr m'a m'im'ilr m'ertu. Si udlani lera avulul ani.
14Laha, apavvr ti a, Si p'sp'as udlani krn nam'er ani itruh asnm. Si p'as udlani m'a si udlani kuklh aranan ihei ml asnm, mkapaslei ml naran kinkin. 15#Esikiel 27:31,36.M'ertu udlani avan stua arna si lera, siar ima kastudau aranan, apavp'tir v'iv'a sena ti avdedrn a der iari, kavvalau, kavtakal, 16kavvr ti a, ‘Uei, uei, v'anu lil lera, iua kalik tva, m'a kalik im'ielm't, m'a kalik m'iel, kukl hin a sei iv'i kul, m'a nav'et p'as, m'a neiau tva ier. 17#Aisaia 23:14; Esikiel 27:26-30.Sena ti si p'sp'asan udlani ihiris arna m'etaneiel iamk uaki.’ M'ertu udlani avua pt nauak, m'er m'ertu udlani arna nauak, paskru udlani, m'er m'ertu udlani avan pari na stua arna nauak, avp'tir v'iv'a. 18#Esikiel 27:32.Naran avla ienap' nen, sena ti ihapu, avv'ara eia kavvr ti a, ‘?V'anu lil v'ata inep'a v'anu lil lera?’
19 #
Esikiel 27:30-34. Laha, avtin ptr a neiev' kavv'ara eia kavvalau kavtakal kavvr ti a, ‘Uei, uei, v'anu lil lera, iv'i nut m'ertu udlani nauakar iak, siar ima kastudau, sena ti nav'etan istudau, v'eti autakm ani udlani arna m'etaneiel iamk uaki.’
20 #
TVH 32:43; Seremaia 51:48. Kam'i kvlak arna nut eia, m'er apusel p'asan Atua, m'er pruvet, pavrn ipap'as ani, sena ti Atua itutakm sarei ani sena si stu iani a kam'i.”
A Papilun itars sarei, akapaslei ml naran kinkin
21 #
Seremaia 51:63,64;
Esikiel 26:21. Laha, ensel hua iamk ilev' nav'et iamk inep'a nav'et lil auhapapr a uit ani, kasrani al nata, kavr ti a, “Apani ti v'anu lil lera, a Papilun, ipars a nadep' kastu ipanap'i lera, akapaslei ml naran kinkin. 22#Esikiel 26:13; Aisaia 24:8.#Seremaia 7:34; 25:10.Laha, akarn drl kita ml a nlm naran kinkin, v'aha npin, v'aha drl ner v'aha natav. Akapasla m'ertu kinkin iendu pari p'as kinkin a lm'an. Akarn tna nav'et lil auhapapr a uit ani ml a nlm. 23Akala lait kinkin ml ipar a nlm. Akarn drl dui m'a tav'et arrn ip'as sena ti ap'hrm'arit ser, naran kinkin, sena ti m'ertuam avan stua kavv'i m'ertu lilil arna nadep'. Sena ti nakm kan ru nai kasner v'anu udlani karv'r arna navanel stu. 24#Seremaia 51:49.Laha, arna v'anu lera, ala ti di pruvet, m'a di m'ertuan Atua, m'a di m'ertu udlani arpr arna nadep', irarev'.”
Actualmente seleccionado:
Revelesen 18: nmb
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2023 Presbyterian Reformed Church of Australia
