2 Pwa 9
9
Ba tiŋi Jehu paare dem
1Dɛ dedwe mo Wɛ sampwori Elisa déem le nɔɔno wodwoŋi Wɛ sampwori kɔgɔ kom wone o ta ded‑o o we, “Fɔge n vɔ n gare-kura kiri-kiri n daare n jwoŋi kabɔɔ konto de ko wo nuga kam n ja n vo Ramofa-Gilead. 2Nmo ná yi da, se n beeri Jehu wolo na ye Jehosafate bu de Nimisi naa to jeiga. Nmo ná nɛ‑o, se n le‑o o yuudwonna wone n ja n zo diga wo. 3Laam kwei nuga kam n lwo Jehu yuu ne n daare ta ded‑o we, ‘Baŋa Wɛ na tage kolo to mo tento: amo laam mo tiŋi‑m se n ji Isarele teo pɛ.’#1 Pwa 19:15 Nmo ná ke konto n ti, se n pore diga kam n nwoŋi n yage jeiga kam lela n viiri.”
4Nɔn-doŋo kom na ye Elisa tontoŋeno to ma seene o vo Ramofa-Gilead. 5O na yi da to, o ma nii o na jar-keira yiga tiina bam na jei daane ye ba lara. O ma ta o we, “Amo tu, a jege kwora mo se a pa‑m.” Jehu ma bwei o we, “Kwora kam ye debam maama wone wɔ tete nyem mo?” O ma leiri o we, “Amo tu, ko ye nmo nyem mo.” 6Banto balei ma zo diga kam wo. Nɔn-doŋo kom ma kwei nuga kam o lwo Jehu yuu ne, ye o daare o ta we, “Baŋa Wɛ wom na ye Isarele tiina Wɛ to na tage kolo to mo tento: amo laam mo tiŋi‑m se n ji amo nɔɔna Isarele tiina bam pɛ. 7Nmo nam jege se n chɔge n tu Ahab dwi dem mo. Amo wó da konto baŋa ne a waare Jezebele de o na go a sampwori sem de a tontoŋena bam to.#1 Pwa 18:4 8Ahab dwi dem maama jege se ba te mo. O dwi dem bakeiri sem maama wó saare Isarele teo ne, ko ná ye balo ta na wo ba kwo sɔŋɔ ne to, de balo na tei ba tete to de.#1 Pwa 21:21 9Amo lage a pa se o dwi dem yɔɔre de chɔge nenɛɛne a na ke Nebat bu Jeroboam dwi dem, de Ahija bu Baasa dwi dem tei to mo. 10Ko nam ná ye Jezebele, kukuri mo lage se di‑o Jezerele tega kam baŋa ne, ye nɔɔna bá kwei‑o ba suli.” Nɔn-doŋo kom na yɔɔre o ta konto o ti to, mo o pore diga kam o duri o viiri.
11Jehu na nwoŋi o jwoori o dwonna yiga tiina bam tei to mo ba dedoa bwei‑o o we, “Yazura mo na? Bɛ mo ke ye chichwoo konto ba nmo tei?” Jehu ma leiri o we, “Ko dae kolokolo. Abam maŋe á yei sampwora kanto dwoŋi na yirisi tei to.” 12Ba ma leiri ba we, “N fɔe vwa mo! Ta n bere debam o na taga kolo to chekke.” Jehu ma ta o bere-ba nɔn-doŋo kom na tage kolo de kolo to ye o we, “Baŋa Wɛ na tage kolo to mo tento: Amo tiŋi nmo mo se n ji Isarele tiina bam pɛ.”
13Jehu yuudwonna bam maama ma ke lela ba le ba gare-danno ba lware Jehu nɛ sem seeni. Ba ma daare ba wu nabwanno ye ba tɔɔle we, “Jehu mo ye pɛ.”
14Konto baŋa ne mo Jehosafate bu Jehu déem ke chichuŋu de Joram. Kanto maŋa ne Joram dedaane Isarele tiina bam maama ya yere Ramofa-Gilead mo se ba che Siria pɛ Hazayeli de o jar-keira bam. 15Pɛ Joram nam ya jwoori Jezerele mo se o teibi o fufwollu tem Siria tiina bam na ke o yera ne to. Jehu ma ta de balo na wo o tei ne to we, “Abam boboŋa ná seene ya ja se a ji pɛ, nam yé pa-na se nɔɔn-nɔɔno na chwoŋa o nwoŋi teo konto ne o vo Jezerele o ta kolo na ke to.” 16Jehu ma jeini o toroko baŋa ne o duri o kɛ Jezerele se o beeri pɛ Joram, o na tigi dáane de o fufwollu tem to ŋwaane. Ko maa ye dáane mo Judah teo pɛ Ahazia ya vei se o ware‑o.
17Jehu de o nɔɔna bam na twɛ Jezerele teo kom to mo yereno wodwoŋi zege teo kom vɔŋɔ yuu ne o tole o na ba na maa beene. O ma tɔɔle o ta de Joram o we, “Amo nɛ nɔɔna mo na wurigi sisei ba beene.” Pɛ Joram de ma ta o we, “Pa se nɔɔno kwei siseiŋa o vo o yi o bwei o nii ba veiŋa kam ye yazura veiŋa mo na?”
18Nɔɔno ma seene o di siseiŋa baŋa o vo o jeeri Jehu. O ma ta ded‑o o we, “Pɛ Joram bwei se o lɔre, á beene de yazura mo na?” Jehu ma leiri o we, “Nmo yiga mo ka kɔ? Nam pipiri n zo a kwaga kɔgɔ kom wone.” Teo kom yereno wom na tole o na to, o ma bwoŋi pɛ wom o ta ded‑o we, “Wolo n na toŋe to yi da, ye o nam ba jwoora.”
19Pɛ Joram daa ma toŋe nɔɔno wodwoŋi o ke belei. Wonto de ma di siseiŋa baŋa o vo o yi Jehu de o nɔɔna bam tei. O ma ta de Jehu o we, “Pɛ wom bwei se o lɔre, á beene de yazura mo na?” Jehu ma leiri‑o o we, “Nmo yiga mo ka kɔ? Nam pipiri n zo a kwaga kɔgɔ kom wone.” 20Teo kom yereno wom daa ta ma ta o we, “Nmo na toŋe wolo to yi da, ye o de nam ba jwoora. Ba yiga tu wom na wurigi tei o beene to nye de Nimisi bu Jehu mo. O na duri tei to nye de o yirisi mo.”
21Joram ma pa ni o we, “Ti-na siseiŋa de a toroko kom yiga á pa-ne.” Ba na ti to, Isarele teo pɛ Joram, dedaane Judah teo pɛ Ahazia ma di ba torokooro ba vo ba jeeri Jehu. Ba ma yi‑o tega kalo déem na ye Jezerele tu Nabofi nyem to jeiga ne. 22Joram na jeeri Jehu to, o ma bwei‑o o we, “Yazura veiŋa mo n vei na?” Jehu ma leiri o we, “Yazura laam wo yeim mo ye n nu Jezebele yɔɔre o tɔge jwo-yɔɔro de liri-mwa kikia?”
23Joram na nigi konto to, o ma pipiri o duri ye o laare baŋa baŋa o bwoŋi Ahazia o ta o we, “Swa mo o kea! Pa dé ke lela dé duri dé lu!” 24Jehu ma yɔɔre o saŋe o taŋa o ta Joram. Chene dem ma zɔ o bakale tetare laŋa seeni de vo de moore o bochare-kili wone pa se o to o toroko kom wone o te. 25Jehu ma ta de o tontoŋeno Bidika o we, “Kwei Joram yera yam n dole n yage tega kalo déem na ye Nabofi nyem to ne. Nmo wó guli we, debam balei déem na wo daane dé tɔge o kwo Ahab kwaga to mo Baŋa Wɛ maŋe o sɔɔle cham o yage Ahab yuu ne o we, 26‘Amo diim na nɛ Nabofi de o bia bam jana bam na taare tega kam tei to, amo ta wó yɔɔre a pa se n jwoori n ŋwe jana bam konto jene tega kam konto baŋa ne. Amo Baŋa Wɛ na tage tei to mo konto.’ Mo kokuri, n jege se n kwei‑o n de n yage Nabofi tega kam ne, ne Baŋa Wɛ kwora kam na bere we ko wó ke tei to.”#1 Pwa 21:19
27Judah teo Pɛ Ahazia na nɛ kolo na jege ko ke to, o ma duri o yɔɔre Bɛte-Hagan seeni. Jehu ma pare‑o ye o ta de o nɔɔna bam o we, “Go-na o de.” Ba ma seene ba ta‑o de chena chwoŋa kalo na diini Guri seeni to yuu ne. Jei sem konto bwola de Ibeleyam. Ba na tage‑o to, Ahazia ma wane o duri o yi Megido. O ma te teo kom wone. 28O tontoŋena bam ma kwei‑o de toroko ba ja ba jwoori Jerusalem. Ba ma suli‑o o kwoa bam yibeeli ne David teo Jerusalem ne.
29Ko déem ya ye Ahab bu Joram bena fuga-dedwe paare dim bene dem ne mo Ahazia bobo se o di Judah teo paare.
Jezebele toone
30Jehu déem ma zaŋe o vo Jezerele. Jezebele na nigi to, o ma kwei yi-chero o ma o bei o yi-bonno, o daare o fɔge o vɔ o yu-ywei sem. O laam ma vo o jeini o diga kam takworo ni ne ye o pɔe Jehu. 31Jehu na yɔɔre o tɔge manchwoŋo kom o zo to mo Jezebele bage‑o o we, “Hae! Nmo bere we n veiŋa kam ye yazura veiŋa mo na? Nmo kikia de Zimiri kikia wo daare daane, de n na go n tu wom to.”#1 Pwa 16:8-20
32Jehu ma kwoni o yuu o nii takworo kom seeni ye o ta de kwor-dɛa o we, “Abam wɔ mo zege amo kwaga ne? Wɔ mo wora?” Pɛ sɔŋɔ kom tontoŋena badwonna maa tɔge takworo kom ba leesi ba nii. 33Jehu ma bage-ba o we, “Yigi-na Jezebele á de tega ne!” Ba ma seene ba yigi‑o ba de tega ne. O na yi tega to, mo o jana bam taare kabira kam ba kɛ ba taare sisei sem de, de Jehu na pɛ se nɔne o baŋa ne se kɛ to.
34Jehu ma zo pɛ sɔŋɔ kom wo o di wodiu. O laam ma ta de nɔɔna badwonna o we, “Sensɔla wo kaane wom yuu ne. De ko de, nam kwei-o-na á suli tega ne, se o ye pɛ bukɔ mo.” 35Ba na nwoŋi se ba kwei o yera yam ba suli konto to, ba wo nɛ-ya, ko ná dae o yu-kwoli-champoa, de o napera, de o jataala yerane mo ba nɛa. 36Ba ma vo ba ta ba bere Jehu kolo na ke to. O ma ta o we, “Ko ye Baŋa Wɛ kwora mo seene ka ji chega.#1 Pwa 21:23-24 O déem tɔge Tisibi tu Elija baŋa mo o ta o we, ‘Kukuri wó ja Jezebele ya-nɔna se di Jezerele tega kam baŋa ne. 37O yera yam wó tore yera yera ya taa tigi Jezerele tega kam maama baŋa ne nenɛɛne popɔnɔ mo tei, pa se nɔɔn-nɔɔno bá lɔre o na ye wolo to.’ ”
Actualmente seleccionado:
2 Pwa 9: KBG
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Ghana Institute of Linguistics, Literacy and Bible Translation (GILLBT)
