Génesis 39
39
José jín ñasɨ́ꞌɨ́ Potifar
1Jee sáá kua̱ꞌa̱nꞌ ráa jín José nu̱u̱nꞌ ñuunꞌ Egipto, jee ɨɨn te̱e ñuunꞌ Egipto, naní Potifar, nkeꞌen re̱ꞌ José nu̱u̱nꞌ rá ñɨvɨ ichiyúkúnꞌ Ismael ya̱ rá kua̱ꞌa̱nꞌ jín José nu̱u̱nꞌ ñuunꞌ yukuán. Jee Potifar kúvi re̱ꞌ capitán tátúníꞌ yósóꞌ nu̱u̱nꞌ rá ñɨvɨ jiátíñú Faraón ráa, ya̱ kúvi te̱e tátúníꞌ ñuunꞌ Egipto.
2Jee íyó I̱toꞌoꞌ Ndiosíꞌ jín José, jee saáva nkene va̱ꞌa nɨꞌɨ ya̱ nsa̱ꞌá re̱ꞌ jee nééꞌ re̱ꞌ veꞌi i̱toꞌoꞌ re̱ꞌ Potifar, te̱e ñuunꞌ Egipto. 3Jee niniꞌ i̱toꞌoꞌ Potifar José ya̱ íyó I̱toꞌoꞌ Ndiosíꞌ jín José, jín ya̱ kéne va̱ꞌa nta̱ká ya̱ sáꞌá José nsa̱ꞌá I̱toꞌoꞌ Ndiosíꞌ. 4Jee nku̱neí José ni̱ꞌi̱nꞌ re̱ꞌ ya̱ ma̱ni̱ꞌ iniꞌ i̱toꞌoꞌ re̱ꞌ, Potifar, nne̱ꞌyá‑a re̱ꞌ, jee nsa̱tíñú re̱ꞌ nu̱u̱nꞌ i̱toꞌoꞌ re̱ꞌ jee ñani i̱toꞌoꞌ re̱ꞌ maáréꞌ ya̱ kuneen kuéntáꞌ re̱ꞌ veꞌi i̱toꞌoꞌ re̱ꞌ, jee nxi̱nóo i̱toꞌoꞌ re̱ꞌ nɨꞌɨ ya̱ kúmí‑i xi̱ntíín re̱ꞌ. 5Jee ne̱ ki̱vɨ̱ꞌ sáá ñani Potifar José ya̱ kuneen kuéntáꞌ José veꞌi re̱ꞌ jín nɨꞌɨ ya̱ kúmí re̱ꞌ, jee I̱toꞌoꞌ Ndiosíꞌ nsa̱ꞌá víꞌí ya̱ váꞌa nu̱u̱nꞌ veꞌi Potifar jín rá tataꞌ sáꞌá re̱ꞌ káá nu̱u̱nꞌ kuꞌúꞌ jie̱ꞌe̱ꞌ José. 6Jee nxi̱nóo re̱ꞌ nɨꞌɨ ya̱ kúmí re̱ꞌ xi̱ntíín José, jee ni ntu̱náꞌ nániꞌvɨꞌ ka̱ꞌ iniꞌ re̱ꞌ jie̱ꞌe̱ꞌ rá nantíñú re̱ꞌ, kua̱chi jie̱ꞌe̱ꞌ ya̱ yájíꞌ re̱ꞌ ni.
Jee viiꞌ íyó José jee ñunkúún túvi re̱ꞌ. 7Jee sáá njia̱ꞌa yakuꞌ tiempúꞌ jee ñasɨ́ꞌɨ́ i̱toꞌoꞌ José chi nchu̱nu̱u̱nꞌ ña re̱ꞌ, jee nkachiꞌ ña nu̱u̱nꞌ José:
―Kava kusuꞌ nú jín nuꞌuꞌ ―nkachiꞌ ña nu̱u̱nꞌ José.
8Soo ntu njiáꞌayuꞌú re̱ꞌ saꞌá maa, jee nkachiꞌ re̱ꞌ nu̱u̱nꞌ ñasɨ́ꞌɨ́ i̱toꞌoꞌ re̱ꞌ vá:
―Teso̱ꞌo nú, i̱toꞌoꞌ ni̱ꞌ nxi̱nóo re̱ꞌ xi̱ntíín ni nɨꞌɨ ya̱ kúmí re̱ꞌ, jee ni ya̱ íyó ni̱ꞌ yaꞌá, jee ntu̱ví íyó re̱ꞌ ya̱ naniꞌvɨꞌ iniꞌ re̱ꞌ jie̱ꞌe̱ꞌ rá nantíñú íyó veꞌi re̱ꞌ. 9Jee ni ntu̱ví ne̱ íyó inka ka̱ꞌ ñɨvɨ ya̱ kúñáꞌnú ka̱ꞌ nsú ka̱ꞌ nuꞌuꞌ iniꞌ veꞌi yaꞌá. Jee ni ntu̱náꞌ kúsáꞌán re̱ꞌ ni ɨɨn nantíñú nu̱u̱nꞌ ni̱ꞌ, chi kua̱chi noꞌó ni, chi ñasɨ́ꞌɨ́ re̱ꞌ kúvi nú. ¿Na̱ja kúvi saꞌá nuꞌuꞌ ɨɨn ya̱ máá niváꞌa, jee saꞌá ni̱ꞌ kua̱chi nu̱u̱nꞌ Ndiosíꞌ rúja? ―nkachiꞌ José nu̱u̱nꞌ ña.
10Jee súnika̱ꞌ nkachiꞌ ña suꞌva nu̱u̱nꞌ José ta ki̱vɨ̱ꞌ ta ki̱vɨ̱ꞌ soo ntu̱ví sáꞌá re̱ꞌ kuéntáꞌ nu̱u̱nꞌ káꞌánꞌ ña jee ntu ñákava re̱ꞌ kusuꞌ re̱ꞌ jín ña, ni ya̱ kutáꞌán re̱ꞌ jín ña. 11Jee ɨɨn ki̱vɨ̱ꞌ nki̱vɨ José iniꞌ veꞌi sáva saꞌá re̱ꞌ rá tiñu íyó saꞌá re̱ꞌ, soo ni ntu̱ví ni ɨɨn ñɨvɨ sátíñú iniꞌ veꞌi hora yukuán, 12jee ntɨɨn ña saꞌma José jee nkachiꞌ ña nu̱u̱nꞌ re̱ꞌ:
―Kava jín ni̱ꞌ ―nkachiꞌ ña nu̱u̱nꞌ José.
Soo jínu re̱ꞌ nkene re̱ꞌ jee nxi̱nóo re̱ꞌ saꞌma re̱ꞌ xi̱ntíín ña. 13Jee sáá niniꞌ ña ya̱ sáá nkene re̱ꞌ chíkéꞌi jee nxi̱nóo re̱ꞌ saꞌma re̱ꞌ xi̱ntíín ña, 14jee nkana ña rá musúꞌ ya̱ sátíñú veꞌi vá jee nkachiꞌ ña nu̱u̱nꞌ ráa:
―Kune̱ꞌyá rán, ya̱ yɨɨ́ ni̱ꞌ nki̱naka re̱ꞌ nu̱u̱nꞌ‑órán ɨɨn te̱e hebreo #39:14 Ñɨvɨ hebreo kúvi rá se̱ꞌya ichiyúkúnꞌ nkene nu̱u̱nꞌ ɨɨn te̱e naní Heber. Suni sukuán versículo 17. ya̱ vitan jee kási̱kɨ́ꞌ re̱ꞌ jie̱ꞌe̱ꞌ‑ó, chi nki̱vɨ re̱ꞌ tɨɨn xe̱e̱nꞌ re̱ꞌ nuꞌuꞌ, soo nka̱najíín ni̱ꞌin víꞌí ni̱ꞌ, 15jee sáá nteso̱ꞌo re̱ꞌ ya̱ nka̱najíín ni̱ꞌin nasɨ́kuitɨꞌ ni̱ꞌ jín nɨꞌɨ kuitɨꞌ fuersáꞌ ni̱ꞌ, jee jínu re̱ꞌ nkene re̱ꞌ chíkéꞌi jee ne̱ nxi̱nóo re̱ꞌ saꞌma re̱ꞌ yaꞌá.
16Jee kuíre nchi̱só ña saꞌma José xiín ña nekuaꞌ nnenta i̱toꞌoꞌ José veꞌi. 17Saájee [ɨɨn nuún ni] nna̱kani ña nu̱u̱nꞌ yɨɨ́ ña rá tu̱ꞌun yaꞌá:
―Te̱e hebreo ya̱ kúvi musúꞌ ya̱ nkeꞌen nú ya̱ nki̱naka nú nu̱u̱nꞌ ránꞌ nkiji re̱ꞌ nu̱u̱nꞌ nuꞌuꞌ sáva tɨɨn xe̱e̱nꞌ re̱ꞌ nuꞌuꞌ. 18Soo sáá nka̱najíín ni̱ꞌin nasɨ́kuitɨꞌ ni̱ꞌ jín niꞌi fuersáꞌ ni̱ꞌ, jee nxi̱nóo re̱ꞌ saꞌma re̱ꞌ xiín ni̱ꞌ yaꞌá, jee jínu re̱ꞌ nkene re̱ꞌ chíkéꞌi. 19Jee suꞌva nsa̱ꞌá musúꞌ nkeꞌen nú jín nuꞌuꞌ ―nkachiꞌ ña nu̱u̱nꞌ yɨɨ́ ña.
Jee i̱toꞌoꞌ José vá nki̱tɨ̱ꞌ víꞌí iniꞌ re̱ꞌ sáá nteso̱ꞌo re̱ꞌ rá tu̱ꞌun ya̱ nakani ñasɨ́ꞌɨ́ re̱ꞌ nu̱u̱nꞌ re̱ꞌ. 20Saájee i̱toꞌoꞌ José vá ntɨɨn re̱ꞌ José jee nta̱túníꞌ re̱ꞌ ya̱ chiꞌi ráa José iniꞌ veka̱a nu̱u̱nꞌ yɨ́ꞌɨ́ rá ñɨvɨ ya̱ chíꞌi Faraón iniꞌ veka̱a vá. Faraón kúvi te̱e tátúníꞌ ñuꞌun Egipto. Jee yɨ́ꞌɨ́ José iniꞌ veka̱a yukuán.
21Soo ni̱yo I̱toꞌoꞌ Ndiosíꞌ jín José, jee ni̱yo náꞌví iniꞌ re̱ꞌ nne̱ꞌyá re̱ꞌ maa, chi nsa̱ꞌá re̱ꞌ ya̱ ni̱ꞌi̱nꞌ José ya̱ máníꞌ iniꞌ te̱e yósóꞌ nu̱u̱nꞌ ya̱ tátúníꞌ veka̱a vá. 22Jee te̱e yósóꞌ nu̱u̱nꞌ veka̱a vá nchiꞌi re̱ꞌ nɨꞌɨ rá ñɨvɨ yɨ́ꞌɨ́ veka̱a xi̱ntíín José. Jee José ví ya̱ tátúníꞌ nu̱u̱nꞌ nɨꞌɨ rénákúvi ya̱ sáꞌá yukuán. 23Jee te̱e ya̱ yósóꞌ tátúníꞌ nu̱u̱nꞌ veka̱a vá ntu̱ví nániꞌvɨꞌ iniꞌ‑i nu̱u̱nꞌ rá tiñu néen kuéntáꞌ José, chi I̱toꞌoꞌ Ndiosíꞌ íyó jín José, jee sáꞌá Ndiosíꞌ ya̱ nɨꞌɨ tiñu sáꞌá José kéne va̱ꞌa.
Actualmente seleccionado:
Génesis 39: meh
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2022, Wycliffe Bible Translators, Inc. All rights reserved.
