ម៉ាថាយ 2

ហោរាចូវថ្វាយង្គំព្រះយេស៊ូវ

1ព្រះយេស៊ូវកើតតេកបេថ្លេហិមឡឹងខែតយូដាម្សាហេរ៉ូឌវ័ស្ដាច់ ម្សាអិងកើតហោរាចូវរ៉ើខាងកើតមូតចូវទីក្រុងយេរូសាឡឹម 2កឹបេកអិងមោះកួយប៉ាយ៖ «ណា ស្ដាច់បេកយូដាន្ទើបកឹកើតអិងកួអាណា? ហៃដិងប៉ាយណាវកើត ចូវរ៉ើហៃពើកមន្ដរណាវលោះចូវរ៉ើខាងកើត កឹហៃចូវណិង ចូវថ្វាយង្គំណាវ» 3ពេលស្ដាច់ហេរ៉ូឌសង់យ៉ាំងអិង ណាវផីច្នាប់ កឹបេកកួឡឹងទីក្រុងយេរូសាឡឹមតឹងម៉ាត់ ណាវផីច្នាប់ដែល 4ស្ដាច់ក្យាមេៗចួសចារ្យ រ៉ើគ្រូខាងច្បាប់គម្ពីរ៍ព្រះពឺតតឹងម៉ាត់អនចូវជួបរ៉ើណាវ កឹណាវមោះប៉ាយ៖ «ណា ព្រះគ្រីស្ទក្រៃកើតតេកណា?» 5បេកអិងផងសួរស្ដាច់ប៉ាយ៖ «ព្រះគ្រីស្ទក្រៃកើតតេកបេថ្លេហិមឡឹងខែតយូដា ច្បោះបេកសួរកួយពាក្យចូវរ៉ើព្រះជ្រមោះមីកាបឺនសសេរដកប៉ាយ 6“បេថ្លេហិមកួឡឹងខែតយូដាវ៉ឺយ ម៉ៃម៉ឹមេនគីកលើសក្រុងសំខាន់ៗកួឡឹងខែតយូដាអឺ ច្បោះពោះកីកើតបេកក្ដាប់មូយណាក់កើតចូវរ៉ើម៉ៃ កឹណាវមីថែបេកអ៊ីស្រាអែលរាស្ត្រកឺ”#ជំពូក ២ ខ ៦ ពាក្យណិងកួឡឹងគម្ពីរ៍សញ្ញាតៀតេកជ្រមោះ មីកា ជំពូក ៥ ខ ១ តក់ ២។» 7លោះរ៉ើអិង ស្ដាច់ហេរ៉ូឌណាវក្យាហោរាចូវមោះស្ងាត់ៗ ចូវរ៉ើណាវស្អៀដិងច្បាស់ប៉ាយ មន្ដរអិងលោះចូវតឹសណា 8ពេលហោរាអិងផងសួរស្ដាច់រោច ស្ដាច់ណាវអនបេកអិងផងចៀបេថ្លេហិម ណាវសួរប៉ាយ៖ «ម័ងចៀប៉ឺរមោះកួយរ៉ើរើងកនអិងអនច្បាស់ចៀ ពេលម័ងប៉ឺរពើក ចូវសួរកឺឡង់ កឺចៀថ្វាយង្គំណាវដែល» 9-10ពេលស្ដាច់សួររោច ហោរាអិងផងណាវនាំឃ្នាចៀ កឹណាវពើកមន្ដរលឹមលោះចូវរ៉ើខាងកើតអិងនាំណាវចៀព្នេកទ័ន ពេលណាវពើកមន្ដរអិង ណាវអើកច្នាប់មេនទេន កឹមន្ដរអិងនាំណាវចៀព្នេកទ័នទាល់កឹតក់បនកនអិងកួ បឺនមន្ដរអិងឆុប 11កឹណាវមូតចៀឡឹងដុងអិង ណាវពើកកនអិងកួរ៉ើម៉ារាម៉ែណាវ កឹណាវនាំឃ្នាបត់កោលថ្វាយង្គំកនអិង បឺនកឹណាវបើកប៉្រអប់អែលចន្ទ័ៗណាវថ្វាយកនអិង កើតយ៉ាំងកឹ មាស គ្រើងផូម រ៉ើជារ់តាំង 12លោះរ៉ើអិង ណាវនាំឃ្នាចៀស្រុកណាវចៀក្រោយ ម៉ងណាវប៉កតូនក្រណាផ្សិង ច្បោះណាវមម្បិចពើកព្រះពឺតសួរណាវប៉ាយ “ញ្ជ័ក់ចៀហេរ៉ូឌចៀក្រោយ”។

ចួសយ៉ូសែបណាវនាំយាក់ម៉ារារ៉ើកនណាវបោលចៀខែតអេស៊ីព្ទ

13លោះរ៉ើអិង ចួសយ៉ូសែបណាវមម្បិចពើកទេវតាព្រះពឺតចូវសួរណាវប៉ាយ “យូរចៀ នាំកនណិង រ៉ើម៉ែណាវបោលចៀខែតអេស៊ីព្ទចៀ កឹកួតេកអិងចៀ ចាំកឺសួរអនចូវចៀក្រោយបឺនចូវ ចូវរ៉ើហេរ៉ូឌប៉្រុងប៉ឺរកម្ចែតកនណិង” 14កឹចួសយ៉ូសែបយូរ ណាវនាំកនអិងរ៉ើយាក់ម៉ារាបោលចៀខែតអេស៊ីព្ទតឹងស្ដាវ 15ណាវកួតេកអិងទាល់កឹស្ដាច់ហេរ៉ូឌក្ចែត កឹក្រៃរ៉ើរើងលឹមព្រះពឺតអនបេកសួរកួយពាក្យណាវសួរកួយប៉ាយ “កឺក្យាកនកឺចូវរ៉ើប៉្រទេសអេស៊ីព្ទ”#ជំពូក ២ ខ ១៥ ពាក្យណិងកួឡឹងគម្ពីរ៍សញ្ញាតៀតេកជ្រមោះ ហូសេ ជំពូក ១១ ខ ១។។

ស្ដាច់ហេរ៉ូឌប៉ញ្ជាកួយអនកម្ចែតកនក្រណែន

16ពេលស្ដាច់ហេរ៉ូឌដិងប៉ាយហោរាប៉ញ្ឆោតណាវ ណាវច្លក់ច្នាប់មេនទេន កឹណាវប៉ញ្ជាកួយអនកម្ចែតកនក្រណែនកន្ទ្រូសៗតឹងម៉ាត់ តេកបេថ្លេហិម រ៉ើបនបៀតៗតូនអិង កបន្ទ្រឹមអាយុបារក្មសែង ណាវគឹតន្ទ្រឹមមន្ដរលោះ លឹមណាវមោះប៉ញ្ជាក់ហោរា 17រើងអិងក្រៃរ៉ើរើងលឹមបេកសួរកួយពាក្យចូវរ៉ើព្រះ ជ្រមោះយេរេមាសួរកួយប៉ាយ 18“កួយសង់សម្លេងក្រប៉ៃមូយណាក់ញាមទោញតេករ៉ាម៉ា ក្រប៉ៃអិង ជ្រមោះរ៉ាជែល ណាវញាមច្ដាលកនណាវ ម៉ឹប៉ាយកួយជោយរលោមណាវកឹណាវម៉ឹឆុប ចូវរ៉ើណាវប៉ឹតប៉ុងកនម៉ាត់”#ជំពូក ២ ខ ១៨ ពាក្យណិងកួឡឹងគម្ពីរ៍សញ្ញាតៀតេកជ្រមោះ យេរេមា ជំពូក ៣១ ខ ១៥។។

ព្រះយេស៊ូវចូវរ៉ើខែតអេស៊ីព្ទចៀក្រោយ

19ម្សាស្ដាច់ហេរ៉ូឌក្ចែត ចួសយ៉ូសែបណាវណង់កួតេកខែតអេស៊ីព្ទអឺ កឹណាវមម្បិចពើកទេវតាព្រះពឺតចូវសួរណាវប៉ាយ៖ 20«យូរចៀ នាំកនណិង រ៉ើម៉ែណាវចៀក្តែកអ៊ីស្រាអែលចៀក្រោយចៀ បេកស្អៀកម្ចែតកនណិង ណាវក្ចែតម៉ាត់ហឺយ» 21កឹចួសយ៉ូសែបណាវយូរ ណាវនាំកនអិងរ៉ើយាក់ម៉ារាចៀក្តែកអ៊ីស្រាអែលចៀក្រោយ 22ម៉ងពេលចួសយ៉ូសែបដិងប៉ាយ កនស្ដាច់ហេរ៉ូឌ ជ្រមោះអើខេឡោសវ័ស្ដាច់តេកខែតយូដា ណាវម៉ឹហានចៀខែតអិងអឺ កឹណាវមម្បិចពើកទេវតាព្រះពឺតសួរណាវទ័ន កឹចួសយ៉ូសែបចៀខែតកាលីឡេ 23ពេលណាវចៀតក់ខែតកាលីឡេ ណាវចៀកួតេកក្រុងមូយ ក្រុងអិងជ្រមោះណាសារ៉ែត កឹរើងអិងក្រៃរ៉ើរើងលឹមបេកសួរកួយពាក្យចូវរ៉ើព្រះសួរដកប៉ាយ “ពោះកីកួយក្យាណាវប៉ាយ បេកណាសារ៉ែត”។

Actualmente seleccionado:

ម៉ាថាយ 2: KNT

Destacar

Copiar

Comparar