HAGAI 1
1
Ratnan Ngubuk Nelun Yahuda Mudut Ruma' Allah Baruh
1 #
Esr 4.24—5.2; 6.14 Aceh aco bulan anem, bang lak luk kedueh kareb Raca' Darius ngimet Parsi, idi Tuhan nepebala dengan tang Nabi Hagai. Idi bala ini kuan Serubabel Saltiel, lun rayeh Yahuda, idi kuan Yosua Yosadak luk Imam Rayeh.
2Idi kebala Tuhan luk Melalud, “Lemulun ini pebala, ini baken kareb luk petulu mudut Ruma' Allah baruh.” 3Idi Tuhan luk Melalud nemaré bala ini dengan tang Hagai: 4“O pupuKu, ngudehké muyuh tudo bang ruma' luk do', iamo' Ruma'Ku sebuleng nusag? 5Siruh luk mangun kuan muyuh! 6Muyuh pangeh nenibu mula' padé, iamo' sesuut mo' luk piranih. Muyuh inan akan sen, iamo' na ieh miak kenen muyuh macing mebor. Muyuh inan abpa' anggur. Iamo' na muyuh miak mabuk ku ineh. Muyuh inan ayung, iamo' ineh na petap ku ayung muyuh. Idi tabpar lun luk ngakem na petap. 7Siruh luk mangun kuan muyuh! 8Do' muyuh amé' luun surud déi' idi ngalap kayuh. Mudut Ruma' Allah baruh, pad Ui mawang niat idi miak uen ngerayeh maya' dalan luk petulu.
9“Muyuh ngerawé muyuh miak ngalap mula' padé, iamo' sesuut mo' luk ilap muyuh. Idi kareb muyuh nenguit ineh muli', idi Ui nemalid neneh. Anun punneh Ui nenganau' ineh. Ngaceku Ruma'Ku nusag, idi anid-anid burur muyuh mekél ngakem kuan ruma' muyuh sebuleng. 10Ini punneh na mudan, idi na luk mulun. 11Ui pangeh nengacing iru' kuan tana', ieh ineh luun surud, lati', kabun anggur, kabun saitun, idi anid-anid tibu luk mulun, kuan lemulun idi pung, idi amung-amung luk tibuen pana'.”
Lun Mula' Maya' Bala Tuhan
12Idi Serubabel idi Yosua dengan amung lemulun luk nuli' ratnan bawang su luk inandeh tiban nemaya' luk bila Tuhan Allahdeh. Ideh matot, pad ideh nemaya' bala Nabi Hagai, lun duken Tuhan. 13Idi Hagai nemada' bala Tuhan nelun mula'. KebalaNeh, “Ui idi dengan muyuh –– ini jani'Ku.” 14Tuhan nengegio niat amung lemulun, pad ideh mudut Ruma' Allah: Serubabel luk lun rayeh Yahuda, Yosua luk Imam Rayeh, idi amung lemulun luk nuli' rat bawang su luk inandeh tiban. Ideh nengimun mudut Ruma' Allahdeh, Tuhan luk Melalud, 15dueh ngepulu' apat aco bulan anem bang lak luk kedueh kareb imet Raca' Darius.
Actualmente seleccionado:
HAGAI 1: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
