HABAKUK 3
3
Sembayang Habakuk
1Idi ini sembayang Nabi Habakuk.
2O Tuhan, ui pangeh neninger ratnan luk inau'Mu,
idi ui mepanu' ku tot.
Do' nganau' bang kareb ini
kekamen luk rayeh luk inau'Mu mon.
Do' Iko méi', sagan pana' Iko museh.
3Allah macing sekua' teh rat Edom,
Tuhan luk meligan macing rat luun surud Paran.
Langit mepanu' ku rayehNeh,
idi tana' ini mepanu' ku uburNeh.
4Ieh macing mepad kudeng rasat aco
idi ticu'Neh merasat teh,
idi laludNeh pungenNeh su ineh.
5Allah ngecuk ét nalan pa atunNeh;
idi até pana' duken maya' Neneh teh.
6Kareb Ieh ucu' tana' meruyuh
kareb Ieh nier, amung pupu megegker.
Pegkung luk meruked mekurar,
idi surud luk meruked pana' neturan,
ieh ineh surud su luk inanNeh nenalan bang kareb luk mon.
7Ui nekali' lun Kusan matot;
idi lun Midian megegker.
8O Tuhan, inanké amung abpa' luk nganau' Namu museh?
Inanké abpa' rayeh luk nenganau' Namu megateh niat?
Iko nenalan maya' laput;
laput luk mitem mangun ku kerétaMu
kareb Iko nenguit pupuMu pad ideh metueh.
9Iko netemina' makai binorMu
idi nenganau' ilebneh.
KilepMu nemila' tana'.
10Kareb amung pegkung nier Namu ideh meruyuh,
idi udan nebpeh rat déi' langit.
Abpa' luk pa liang tana' meberi,
idi paru'deh pelaba rayeh.
11Kareb ilebMu mesilo,
idi busuMu merasat,
aco idi bulan nungeng.
12Dengan usehMu, Iko nenalan maya' uned tana',
dengan gatehMu, Iko nengeradu' amung pupu.
13Iko nenalan pian ngulun pupuMu,
idi ngulun raca' luk pinili'Mu.
Iko nengelaya' lun rayeh lemulun luk dat,
idi nengusag rurum luk nemaya' neneh.
14IlebMu nenebpek lun rayeh baweh,
kareb baweh ineh iné' mepad kudeng barui,
sikal matad nekai
dengan medita' niat mepad kudeng lun luk ngedereh nelun luk masi' dengan lulem.
15Dengan kudaMu, Iko nengeradu' abpa' rayeh
pad ributneh melapa'.
16Ui ini Habakuk ninger amung ini idi megegker;
bibirku pana' megegker ku totku.
Bururku melaya',
idi kukudku metebaceng.
Ui miak nginulat karebneh macing,
kareb Allah miak ngukum lemulun luk munu' nekai.
17Sagan tu pana' gita' na kebua',
idi bua' anggur pana' nateh luk idi.
Idi teh saitun na kebua',
idi lati' pana' na inan uli';
Sagan pana' amung dumba maté,
idi laman sapi' na uang,
18idi Ui miak mawang niat,
ngaceku Tuhan Allah ineh Lun Nengulun negku.
19Tuhan maré tueh negku.
Ieh nganau' negku mawer mepad kudeng awer payo,
idi nima' negku nalan su luk medita' idi su luk do' pana'.
Actualmente seleccionado:
HABAKUK 3: BLD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
BALA LUK DO' Lun Bawang Bible © The Bible Society of Malaysia 1982, Second Edition 1998.
