यूहन्‍ना 2

पानी अङ्‌गूरिक मद बन्‍लक

1तीसर दिनिक बात हो। गालील क्षेत्रक काना सहरम एकठो घरम भ्‍वाज रह। येशूक डाई फे उ भ्‍वाजम गैरलही। 2येशू ओ उहाँक चेलावँ फे उ भ्‍वाजम निउँता पारख्‍लह। 3भ्‍वाजम देना अङ्‌गूरिक मद ओरागैलिन। उहओर्से येशूक डाई उहाँह कली, “अङ्‌गूरिक मद त ओरागैलिन!”

4येशू हुँकहीन कल, “डाई, यी हमार समस्‍या नैहो। म्‍वार काम कर्ना समय आम्‍ही नैअइलहो।”

5तबदोस्र उहाँक डाई नोकरचाकरहुँकन कली, “येशूक कहल अनुसार टुह्र करो।”

6ओठे पत्‍थ्रा कुन्‍क बनाइल छठो भँक्री रह। उहिँम लगभग एक-एक सय लिटर पानी अटाए। यहूदीहुँक्र असिन भँक्रीक पानी शुद्ध हुइना कामम प्रयोग करँट्‍।

7येशू नोकरचाकरहुँकन कल, “यी सब भँक्रीम पानी भरो।” हुँक्र सब भँक्रीम टनाटन पानी भरदेल।

8तबदोस्र उहाँ हुँकन कल, “आब डान्‍चे पानी पयर्क भ्‍वाजक मुख्‍य मनैयह चिखक लाग देओ।” हुँक्र उहाँक कहल अनुसार कर्ल। 9उ मुख्‍य मनैया पानी चिख्‍ल त, उ अङ्‌गूरिक मद होरलहा। तर उ मद कहाँसे आइल हो कना बात हुँकहीन थाहाँ नैरलहन। उ त पानी पयर्क अन्‍ना नोकरहुँकन केल थाहाँ रलहन। भ्‍वाजक मुख्‍य मनैया दुल्‍हह बलाक कल, 10“सबजन त पैल्‍ह असल मद पियक लाग देठ, पौन्‍हाओँ धेर मद पिक सेक्‍लसे पाछ केल कमसल मद देठ, तर अप्‍न त आम्‍हीसम फे असल मद बचैलरलही।”

11उहाँक करल अचम्‍मक चिन्‍हमध्‍ये यी पैल्‍ह चिन्‍ह येशू गालील क्षेत्रक काना सहरम कर्ल। असिक उहाँ आपन महिमा प्रकट कर्ल, ओ उहाँक चेलावँ उहाँकम विश्‍वास कर्ल।

येशू मन्‍दिर शुद्ध पर्लक

मत्ती २१:१२-१३; मर्कूस ११:१५-१७; लूका १९:४५-४६

12तबदोस्र उहाँ आपन डाई, भैयन ओ चेलन्‍हकसँग कफर्नहुम सहरम गैल, ओ कुछ दिनसम उहँ रल।#मत्ती ४:१३

13मुक्ति-दिवस कना यहूदीन्‍हक टिहार लग्‍घ आरलहा। उ ब्‍याला येशू यरूशलेमम गैल।#प्रस १२:१-२७ 14उहाँ मन्‍दिरम व्‍यापारिन बलि चह्रैना गोरु, भेँरी ओ पर्‍यावाँ ब्‍याँचट्‍ देख्‍ल, ओ सटही काउन्‍टरम पैँसा सटुइयन फे बैठल देख्‍ल। 15यी देख्‍क येशू डौँरीक एकठो कोर्रा बनाक मन्‍दिरमसे सबजहन भेँरी ओ गोरु सहित खेद्‍देल। उहाँ पैँसा सटुइयन्‍हक पैँसा छिट्‌कादेल ओ हुँकन्‍हक टेबल फे बिल्‍टादेल। 16उहाँ पर्‍यावाँ बेँचुइयन कल, “यहाँसे यी सब चिज लैजाओ! म्‍वार बाबक घरह व्‍यापार कर्ना घर जिन बनाओ।”

17तब उहाँक चेलावँ धर्मशास्‍त्रम लिखल यी बात सम्‍झल, “हे परमेश्‍वर! अप्‍नक घरप्रति रहल म्‍वार जोश म्‍वारभित्तर मनम आगीअस दम्‍कठा।”#भज ६९:९

18तर यहूदी अगुवाहुँक्र येशूह कल, “यदि यी काम कर्ना अप्‍नक अधिकार बा कलसे, का अचम्‍मक चिन्‍ह हमन देखाइटी?”

19येशू हुँकन जवाफ देल, “यी मन्‍दिरह भत्‍कादेओ, मै यहीह तीन दिनम फेदोस्र बनादेहम।”#मत्ती २६:६१; २७:४०; मर्क १४:५८; १५:२९

20तब यहूदीहुँक्र कल, “काहुँ? यी मन्‍दिरह बनैना छयालीस वर्ष लग्‍लहा, का अप्‍न तीनी दिनम यहीह बनाइ सेक्‍बी?” 21तर येशूक कहल मन्‍दिर त उहाँक आपनऽ शरीर रलहन। 22येशू मुवलमसे फेदोस्र जिल त, उहाँक चेलाहुँक्र येशूक कहल यी बात सम्‍झल। हुँक्र धर्मशास्‍त्र ओ येशूक कहल बातम विश्‍वास कर्ल।

23उहाँ मुक्ति-दिवसक समयम यरूशलेमम रहलब्‍याला कयौठो अचम्‍मक चिन्‍ह कर्ल। यी देख्‍क धेर मनै उहाँकम विश्‍वास कर्ल। 24तर येशू हुँकन्‍हकम भर नैपर्ल। मनै कसिन बाट कना उहाँह सब थाहाँ रलहन। 25मनैन्‍हक बारेम कुई फे उहाँह सिखैना आवश्‍यक नैरह, काकरकि उहाँ सब मनैन्‍हक मनक बात जानरख्‍लह।

Actualmente seleccionado:

यूहन्‍ना 2: thl

Destacar

Copiar

Comparar