रोमि 16
16
पावल्ओ अ़सेवा
1किङ्क्रियादाओ साम्भुङ्दा काफा आन्निछामा फिबि आम्नुओ बुदा चोन्तुङ्योङ। 2अ़ङ्का खानानिन लोनाङ्नानिन, निनाम्हाङ्ओ अ़चुम़नाचि खान्तुचिवा मो निनाम्हाङ्दा लोआनुम खोन्कि खानानिन्एदाङ्का मो दि दोत, झारा फासानुम, देकिनालो मो ब़द्धेकापाङ्सोओ काफा लिसायुङ्सा खोन्कि अ़ङ्काछाङ अ़फासाङ्युङ्साङ।
3प्रिस्का खोन्कि अकिलास ख्रिस्त येसुदा अ़क्नि काचि कामु अ़ङ्यावाचि सेवानि लोत्निप़नि। 4मोचिआ अ़चुह़ङ्म़ङ अ़ङ्को निम्पाङ क़माकात्तुओदा अ़पाआचु। मोचि अ़ङ्का ओन्ङा आलाङ अ़प़न्ङ्च़ङ, मेन झारा निरावा साम्भुङ्चिआछाङ आलाङ म़प़चि। 5मोचिओ अ़चुखिम्दा म़कोप्नान्चिन्ओ साम्भुङ्चि सेवानि लोवानुम्च़म।
अ़ङ्का सोमातुक्तुङ्योङ्ओ इपेनितस सेवानि लोत्निप़नि। खो ख्रिस्तओ निम्पाङ एसियादाओ बुयाओ साकोङ्छ़ङ कामु ओ।
6आम्नुओ रादा चात्लो काचि कामुमा मरियम सेवानि लोत्निप़नि।
7एन्द्रोनिकस खोन्कि युनियस यहुदि अ़ङ्दाक्मित्चि ओ, मोचि अ़ङ्काएनान अ़क्नि छेक्खादा याआङाचि, मोचि सेवानि लोत्निप़नि। मोचि छाम्माय़ङ्चिओ अ़चुरादा अ़चुऩङ्ऱङाओचि ओ खोन्कि अ़ङ्कादाङ्का बुया मोचि ख्रिस्तदा साकोङ्छ़ङ मुवाचिओ।
8हाङ्पादा अ़ङ्का सोमातुक्तुङ्योङ्ओ एम्प्लिआतस सेवानि लोत्निप़नि।
9ख्रिस्तदा आन्यावा अ़क्नि काचि कामु अ़ङ्यावा उर्बनास खोन्कि अ़ङ्का सोमातुक्तुङ्योङ्ओ स्ताखुस सेवानि लोत्निप़नि।
10ख्रिस्तएदा सोम्कुवा मुमा खान्तुओ कान्माय़ङ अपेल्लेस सेवानि लोत्निप़नि। अरिस्तोबुलस्ओ अ़खिम्लुम्पादाओचि सेवानि लोत्निप़नि 11यहुदि अ़ङ्दाक्मित हेरोदियस सेवानि लोत्निप़नि। हाङ्पाएदा साकोङ्छ़ङ कामु नर्किसस्ओ अ़खिम्लुम्पादाओचि सेवानि लोत्निप़नि।
12हाङ्पादा अ़न्नुनु काचि कामुमाचि त्रुफेना खोन्कि त्रफोसा सेवानि लोत्निप़नि। हाङ्पादा अ़न्नुनु अ़चुकाचि कामुमा अ़ङ्का सोमातुक्तुङ्योङ्ओ परसिस सेवानि लोत्निप़नि।
13हाङ्पाआ अ़छेन्ताओ रुफस खोन्कि मोसोओ अ़मा, मो अ़ङ्कोछाङ अ़ङ्मा म़लिसाओ, मोचि सेवानि लोत्निप़नि।
14असिङ्क्रितस, फ्लेगन, हर्मेस, पत्रोबास, हर्मास खोन्कि खोएनान्ओ नि झारा साकोङ्छ़ङ कामुचिछाङ अ़ङ्सेवानि लोत्निप़नि।
15फिलोलोगस, युलिया, नेरियस खोन्कि खोसोओ अ़निछामा खोन्कि ओलिम्पास खोन्कि खोचिएनान म़युङ्याङ्ओ झारा ख्रिस्तदा साकोङ्छ़ङ कामुचि अ़ङ्सेवानि लोत्निप़नि।
16अ़क्छाआ निएदा सेङ्याङ्ओ चुप्माआ सेवा मेत्मुवानिन। ख्रिस्तओ झारा अ़चुसाम्भुङ्चिआ खानानिन सेवा ऩछोक्तिन्युङ्सिन।
आदेङ्ओ यायोक्चि
17ब़ब़, नाना खोन्कि निछाचि ओ, अ़ङ्का खानानिन यायोक प़नाङ्नानिन, खानानिन चिन्माय़ङ साम्योक्मि लाम्ओ अ़देङ्सालाप्पादा काफेक्चि खोन्कि लाम्काछेक्चिदाङ्का चाप्चेत्तानिन्चिन, खोन्कि मोचिदाङ्का अ़थाया युङानिन! 18देकिनालो ओवाको म़नाचिआ आन्हाङ्पा ख्रिस्त ऩब़रुन, मेन खोचिओ अ़चुमित्मावा आप्पि म़ब़त्नान्चिन। मोचिओ चानुओ दोलेङ्वा य़ङ खोन्कि चानुओ य़ङ्चिआ सोत्सोत्वाओ म़नाचि म़धान्तुचि। 19झारा म़नाचिआ आम्नुओ लोमावा मुमाओ अ़तुक्वादा अ़एनायुङ्सा, खोन्ओसा अ़न्नुनु अ़ङ्ऩङानुयाङ। मेन दि अ़नुवाक मुयाङ, मोसोओ अ़तुक्वादा खारु कातोक खानानिन लिसानिन, खोन्कि दि अ़अ़त्पा मुयाङ, मोसोओ अ़तुक्वादा लाहि मात्द़ङ्ओ लिसानिन्नि अ़ङ्का मिन्ङा। 20सेवाङ्नि काप़ निनाम्हाङ्आ च़क्निङा सैताना आम्नुओ लाङ्थेम भेन्यु अ़नेप। आन्हाङ्पा येसु ख्रिस्तओ अ़चुसोमातुक्मा खानानिन्एदा याक्ने।
21तिमोथि अ़ङ्काएनान अ़क्नि काचि कामु खोन्कि यहुदि अ़ङ्दाक्मित्चि, लुकियस, यासोन खोन्कि सोसिपात्रोस्आ खानानिन सेवा ऩछोक्तिन्युङ्सिन।
22ओ छाप्लावा छाप्मा काफा, अ़ङ्का तर्तियस्आ हाङ्पाओ अ़चुऩङ्दा सेवानि लोनिङ्नि।
23अ़ङ्का गायस्ओ अ़खिम्दा युङ्ङाङा, खोन्कि खोसाआ सेवा ऩछोक्तिन्येन, खोन्कि झारा साम्भुङ्चि अ़खिम्दा म़कोप। सहरादाओ याङ कायुङ इरास्तस खोन्कि आन्निछा क्वार्तस्आ खानानिन सेवा ऩछोक्तिन्येन।
[24आन्हाङ्पा येसु ख्रिस्तओ अ़चुसोमातुक्मा झारा खानानिन्एदा युङ्ने। मोवात्निङा लिने।]
25हान आन्कान झारासा निनाम्हाङ्ओ अ़चुऩङ्लोङ्सुम्ने! अ़ङ्का येसु ख्रिस्तओ अ़चुतुक्वादा खालुसुङ्ओ नुय़ङ्खान्लाम्पा खोक्कोसाआ खानानिन आम्नुओ साकोङ्छ़ङ्दा सावापोरिओ मुमा ऩऱन। मो नुय़ङ्खान्ओ अ़कोङ्दुम्ओ तुप्माय़ङ, जुगा-जुगायुङ्का कुम्सायुङ्सा। 26मेन हान अ़धुन युङ्युङ्ओ निनाम्हाङ्ओ अ़चुलोमाय़ङ्वा निनाम्हाङ्य़ङ खाकालुचिओ अ़चुछाप्माचिलाम्पा खाङ्म़मेत्तुयुङ्सुचि खोन्कि झारा रावाचि सिन्म़मेत्तुयुङ्सुचि, खोन्ओसा मोचि साकोङ्छ़ङ म़मुने, खोन्कि लोमावा च़मा म़ऱने। 27अ़क्छा ओन्ङाओ निनाम्हाङ झारा खारुहाङ्पा, येसु ख्रिस्तलाम्पा अ़धुन-अ़धुन्तारि अ़चुऩङ्लोङ्युङ्ने! मोवात्निङा लिने।
Actualmente seleccionado:
रोमि 16: bap
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
