Hosea 9
9
Ugonobouwama enebit pam welema wene
1His Israel a’ge yu logwe. Hwe danian a’ge en ogun ukpoluk, ap mu a’ge mugonoboluk lasu ano ’gela’ge, Henaik Allah ukpoluk, at iak opsogo wogwi erlak welat, gandum agap e’gen wogumu en hwe danian a’ge mesik en o’go wogogwiam hwerlasu ’gela’ge togwi a’ge ano henede en henagai hogumu re, his Israel a’ge yu honogola aganhan hogulat, di aphwami yu aphwami onogola enagai en si won ogwi ai ’gela’ge ogulat, togup no yo. 2Is gandum agap e’gen sagalogo e’gen ukpoluk his aphwami elit no’gulat, anggur e’gen ’berelogo a’bosu na’gogo elirat no’gulat, togup erlagat o. Ye, anggur a’bosu ’get a’ge ne’gak ai ogo re, erlagat agoma hagup ani o. 3Allah en his Efraim ’gwiang wokhentesimu ebano wolom erlakma en pobuk togolik o Mesir lagalat, ye, o Asyur eba en so’boru enemelmel en no mia a’ge no’gulat, togu lorogup ani o. 4His o eba welat Allah ebaget anggur a’bosu naʼgogo pagup erlak at ani o. Ye, at ebaget wusogo wogogwi a’ge ebano ogo re, agai en wouwa erlak nagat ani o. Ebaget wusogo wogorogup ai re, aphwami waragaiam o pongma welat seni sakho no’gwi ’gela’geatma re, no’gwi holuk wiagapsogoat pagup ani o. His at ebaget pou wagai ano at wouwa erlak his henematek henebageratma re, Allah owi werikmu po’gwi lagup no yo. 5Asogoatma re, o ai erlige seni soru o, oluk, wene werak oruak a’ge ano pamat sorogulat, ye, Allah erliktugulat, honogola henagai pam soru wene le’gelak oruak a’ge ano pam sorogulat, asogo togulat, no’gosogo togu lorogup o? 6His henebe erlagapsogo honobogumu en henagap delhorloluk ’bogologu legep a’geat de, is Mesir a’ge en henebe odoksogo honobogulat, ye, is o Memfis is a’ge en henebe wathonobogulat ’gwiang ’balogo sebel honobogulat, tuama re, hena’ge o’go lok perak a’ge pulogo-pogu legep a’ge ano pam e’gela sebelogo pasulat, honowi werikmu e’gela orlok a’ge ennak soborak pasulat, tua ani o.
7 #
Luk. 21:22
E’gin henebam po a’ge ologun arat horok lau wagalat, wiak togwi o’go hegit-hegit takhonobo a’ge o agauwa arat horok lau wagalat, tagoma re, his Israel henalugap henebegi o. His wiak modok logat til lagalat, at ebe henebirap modok takpogulat, tugumu re, at en mo’gulentasukhwe, mo’gulhentigisa ano re, eperlak enat oso, opogulat, ye, is ap enede oruak a’ge en mo’gulhentigisa ai enede ’belak enat ogwi ogulat, tugu legep o. 8His Efraim a’ge ’gwelakhentarok wolom a’ge Allah en edikpesi a’ge ano re, is ap at en mo’gulentasukhwe mo’gulhentigisa ano at a’geat de, is di ’gebela yu ’gebela lagai o’gwe ’berlegat hol ’gotnok uak oluk herle pil lagalat, is enaik Allah owi werikmu eba mo’gulhontogukhwe henebirap modok pogulat, togu legep o. 9#Hak. 19:1-30O Gibea a’ge wiak modok a’bigat tugu legesa ’gela’ge, his wiak modok til laga legepma re, his wiak til lagai a’ge ebano at Allah eberak welat, ye, honowiak o’go takhenebasulat, taga lema o.
Israel onowiak o’go tagenebesi wene
10 #
Bil. 25:1-5
’gain Onuk Logo a’ge Allah en disogo egei, “O leimu anggur e’gen egeik hwiaregisarik onogola enagai hogwi ’gela’ge Is Israel naduk il yerentesirik, nogola nagai a’bik hasulat, e, ara e’gen naduk egeik a’ge ano hegesarik onogola enagai hegesa ai ’gela’ge is Israel ene’balak yerentesirik nogola nagai hasulat, tegis a’geat de, Dom Peor pam wotluk tu puk a’ge asua Baal ebaget, enebe odoktak pogulat, motluk lagalat enemelmel tu puk a’ge enede hwedik tigisa a’ge ano enebe hegit-hegit enemelmel a’geat tak pagathorlogulat, tigisa. 11Is Efraim ’gain-’gain ebano re, tue darak o momu erlak lai lasu ’gela’ge erlak laumama re, a’bosu pasulat, emalik ogola agalat, emalik deriselat, taga lema erlagat ani o. 12Is enemalik dogo poluk, logap onobogwi a’geat de, ena’guluak erlagapsogo pasuam lo’gu marogu lemagoluk, tak paik o. An uknoboluk ’bogologwi holuk e, is enebe nede o.”
13O Sirus ’gela’ge, o Efraim ai e’gela yogo a’ge il ophweat de, yogodak nak e, enemalik at waronobuak oluk wogonoboluk libagai hegi o, oluk, egeimu re, mo’gulhentegis o, oluk, mo’gulentesi. 14Asogoatma re, Naik ’gain honuk logo a’ge o. Heiyagai tagonobo a’ge an no a’ge ’gonu mo’gulheik o. Is aphwami enemalik dagonobu erlakma en we mo ogu lemagoluk tagenebasulat, enagamu a’bosu erlak welemagoluk takpasulat, tip o, oluk, mo’gulhegis ai o.
Israel e’gin enebam pesi wene
15At ’gain Onuk Logo a’ge en disogo mo’gulentesi, is wiak togwi a’ge weiyal aga ano re, o ’Gil’gal en nagat weiyal agarikmu re, nebit modok ebil wagalom edip ano re, eba enat o. Is wiak nak togwi ai pam en an nowi werikmu en enebe hwigentailasulat, ye, onuelak ano en an en mo’gulonto a’ge enebit modok hogumu re, is an nede hwedik tagonobo, erlakma en ukpasulat, tigat o. 16Is Efraim a’ge ai, e eme’gen sarak a’ge ’gela’ge welagaimu re, eme’en ’buk agalat, e’gen egesu erlakma en welat, tago oruak o. Is enemalik dagonobua a’geat de, is pam en wigalak enemalik enede hwedik a’ge ano weragenebasulat, togolik o, oluk, egei.
17A’geat de, his ano re, Allah iak hwelak poluk opsogo togwi erlakma re, Naik Allah en his ukhenebasuam di aphwami yu aphwami ene’gerlakma da, ya, no’gu lorogup en e, yarluk takhenebaik o, oluk, mo’gulhentigis o, oluk, mo’gulentesi.
Actualmente seleccionado:
Hosea 9: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
