Hosea 2
2
1Ai en e, his en honue henari mo’gulontogulat e,
Allah eiyagai, ogulat, honorokhwi henielak mo’gulontogulat e,
“Nenaik ’gain Onuk Logo a’ge en edeap henebiso yo, oluk ogulat, mo’gulontogu lomup o,” oluk mo’gulnesi.
“Aphwami Israel a’ge enebabut e, hwami danian a’ge enebabut ’gela’ge o,” oluk ebam elitsogo mo’gulentesi wene
2Nenaik ’gain Onuk Logo a’ge en disogo egei,
“Neiyagai o. Henia ai, an nugwe puk. Erlak o. Ye, an at ogun puk, erlagat o. At ebabut danian nil noso a’ge ai ukpoluk, ebabut heberlemak oluk e, his en esa’go werip o. 3Asogo mo’gulorogup a’geat de, at esa’go holu erlakma en, danianat nil nese lema holuk e, at ebe age’golom dagaga ai ’gela’ge, age’golomat welemagoluk osum no’gorlogo ukpaik ani o. An en at ebe ’gwiang ik a’bosu modok erlakma ’buk ’gela’ge takpoma, ebe ik nele en warema ani o. 4His malik yu, henebe henia en babi ’gwelogo dakhenebegeimu re, henebe nedeap henebik erlagat o. 5Henia e’gerli modok erlak danian modok neselat e, disogo oso,
An ap nemin no’gu lege a’ge en noso’boru emin, negeik emin, herle wam domba asu a’ge emin, sum kain op a’ge onuk linen emin, minyak e zaitun e’gen a’bosu a’ge emin, anggur e’gen a’bosu emin, woknogwi a’ge heraenebil ene’bek laik o, oluk oso ai o. Hwe danian a’ge orogole takpoluk, til lasu a’ge ano ukpasulat, lebikpasulat tik epasu a’ge ano yamugap pasulat.
6Asogo nil noso ai ’gela’ge, nil nese lema no oluk, an en e, orlok oruak a’ge pam e’gebela ’gwe ’balogo pasulat, ebela ’go’gwe oluk, lei woruagoluk leget wogo pasulat, tik ani o. 7E’gebela asogo ’balogo pasuam, ap at emin no’gwi a’ge ai heraenebil laigoluk tua a’geat de, emin sarlok tua modok erlagat o. At en mugonoboluk louwa a’geat de, is hwiagonobua modok erlagat o. Asogo erlak omma, at en eselat e,
An pageat, op ’gela’ge welegi a’geat de, yogodak modok wiak welegi o. Ai en e, an nogun naduk a’ge e’bek pobuk togolik laik o, oluk ua ani o.
8His henia ai re, an en gandum emin, anggur a’bosu emin, minyak e zaitun e’gen a’bosu a’ge emin, wogeselat, uang emas a’ge emin, perak a’ge emin, seik-’beiksogo wogeselat, tago a’geat de,
Allah en woknesi o, oluk emde pam en ’baksogo u erlakma en mo oluk e, uang ai asua oluk onuk Baal erliktagalat, wasu ai o. 9Asogo tago ai en, gandum e’gen emin, anggur e’gen emin, ’balogwi erlige agauwa ai pam an en wogosoam ’baliso a’ge ai, togolik hwerlasulat, ’gain wam domba asu a’ge emin, kain herle linen a’ge emin, age’golom en ’buktuagoluk wogese legi a’ge ai, togolik hwerlasulat, tik o. 10An en, at ebe ap enemin no’gwi a’ge ai enilem osum no’gorlogo age’golom paik ai o. At ebe an ne’gik pam welat, nanni pam asogo tagoam e, is ap ai logon en at ebe delua modok erlak o. 11At en, aphwami Yahudi a’ge en togwi a’ge hegitsogo tagalat, mo il mesigat wolotluk seni no’gulat, dugwi ’get a’ge polisoam seni no’gulat, agauwa sabit a’ge pam an nebaget weat welat, togwi a’ge ai, ’berlegat an en erlagap paik o. 12At ogola en e,
E ara edip emin, anggur edip emin, ap an nemin noso a’ge en o’go woknogwi a’ge, oluk epasu a’ge ai, an en modok erlagap paigat ani o. An en at iabuk anggur yabuk emin, e ara yabuk emin, ai muat e’gelema ’gela’ge takpoma, wam maro ebabut wiak a’ge en wiagap pasu lema ani o. 13At en an nebe memerak noboluk, nin hwedik nan hwedik e’ben op a’ge asua Baal ai paget nak narleselat, alli a’ge op a’ge wokho ap emin no’gwi a’ge ai heraenebil lasulat, tago ai en, an en wene e’gin at ebam paik o, oluk an ’Gain Nonuk Logo a’ge en arat egi ai o,” oluk egei.
Nenaik ’gain Onuk Logo a’ge en, “Neiyagai Israel a’ge nedeap enebaik o,” oluk egei wene
14Nenaik ’gain Onuk Logo a’ge en aphwami Israel a’ge enebaget asogo egeitik e, mesik disogo egei,
“Ai en e, an en at hwe ai o leimu eba woluk loluk, niak a’bosu pam ede waik o. 15#Yos. 7:24-26Asogo mo’gulotluk, at iabuk anggur yabuk ai togolik obapsogo wogeselat, o Akor do’goma di wiak yu wiak tegeimu eba pobuk obap pouwama eba takpasulat, tik o. O eba en at ebe salesik pam o Mesir en liplau wagalat, an nebe woknebegei ai ’gela’ge woknobua ani o. 16Asogo woknoguarik, at en an mo’gulneselat,
Baal, oluk mo’gulnese lema erlak o. We,
Nogun o, oluk mo’gulnese lema ani o. 17Aphwami logon en, dogwi asua Baal ai onuk u erlakma en welemagoluk at en ogo Baal ai onuk oso erlak a’geat welemagoluk mo’guleik ani o.
18Eria hegit e, di wam yu wam maro a’ge emin, tue dasogo noso a’ge emin, ’gosu ’gwiangma ’bollungtak noso a’ge emin, ’berlegat mo’gulentasulat e,
His en an neiyagai wiagap onobogu lorogupno yo, oluk enesa’go werik o. Asogo wene weragonoboluk, an neiyagai onowi pam eba enebe op lioktak welemagoluk, segen, wa’gun, ’garok, weim obogwi a’ge eba ’berlegat erlagap paik ani o.
19Pobuk his aphwami Israel a’ge henebe an nugwami edip hwe ’gela’ge wokhonoboluk wogo modok weleik o. Asogo wogo welat, henebe nedeaphonoboluk, nede hwedik modok weleik o. Asogo welat, an en hegitsogo nak tagalat, wene his henebaget hegitsogo hwalhentasulat, taga leik ani o.
20An en his henebe wokhonoboluk, henemin lo’boksogo oruakma, his en e,
Nenaik ’gain Onuk Logo a’ge, arat o, oluk heniak pam ’baksogo ogu lorogup ani o.
21-22Asogo ogup eria pam e, his neiyagai Israel a’ge en yo’go nobogukhwe, heniak nesa’go hwelise leik ani o. An en, moru ’bogorl pam en ’bu magoluk tagoam, ’gwiangma ’bu agoam e, di a’ge yu a’ge gandum emin, anggur emin, e zaitun emin, yogo a’ge eba e’gen e, obat ese lema ani o.
23 #
Rom. 9:25; 1Pet. 2:10 An en neiyagai henebe honowi pam eba op modok weleripok oluk takhenebaik ani o. His henebaget eselat e,
Nebit a’ge, oluk egi a’ge ai, pobuk an en his henebe nedeap henebasu leik ani o. Ye,
Henebe an neiyagai erlak, oluk egi a’ge ai, pobuk an en e,
His an neiyagaiat o, oluk eselat, ye, his en e,
Nis nenaik Allah harat o, oluk mo’gulnogulat, ogu lorogup ani o,” oluk egei.
Actualmente seleccionado:
Hosea 2: Wul
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
