BILANGAN 19
19
Sapi pilas nanahotuk
1 Manetualain paleta Musa no Harun 2fo ala fe nakanenetek ia-la, leo leoina Israel-la neu nae: meni sapi ina pilas esa, ta lu'u ei-la'di limak, ma beita paken fo fua bua-lo'as fa. 3Fe sapi ndia leo Imam Eleazar-ra neu. Muse neni bana ndia leo mamana oofuk-ka deak neu, fo tatin nai imam-ma matan. 4Soona Imam Eleazar-ra, muse ho'in-na bana ndia daan faaanak, fo nasale leo Manetualain Lalaa Teman-na neu, fo ana pisin la'i hitu. 5Muse tunu la'iesak bana ndia paan-na, nai imam-ma matan, fo nde loun-na, isin-na, daan-na ma tei-aten. 6Basa soona, imam-ma muse ho'in-na ai aras bibiaanak esa, hanoe ndanak esa, ma tali pilas esa, fo ana tapan leo ha'i manahotu sapi pilas ndia, tala'da neu. 7Basa soona, imam-ma muse safe bua papaken-na, ma nadiu oe. Basa ndia soona, ana masok leo lalaa oofuk dale neu, tehu bei nanggenggeo losa le'do tenak. 8Hataholi manahotu sapi ndia boeo, muse safe bua papaken-na, ma nadiu oe; hataholi ndia boeo, bei nanggenggeo losa le'do tenak. 9#Ibr. 9:13 Boema hataholi esa, ta nanggenggeo fa, muse ana hulu nakabubua sapi ndia afun-na, fo pe'dan neu mamana balisi esa, nai lalaa temak-ka deak. Afu ndia nanape'dak neme ndia, fo ela hataholi Israel-la, bole paken, fo ala tao oe feta tao nalalao-nalalafu aoinak-ka, fo sala-singok nanalose henik. 10Hataholi manahulun-nakabubua sapi ndia afun-na, muse safe bua papaken-na, tehu bei nanggenggeo losa le'do tenak. Nakanenetek ndia, nanapakek losa dodoon-na, nau soaneu hataholi Israel-la, do hataholi nusa dea, fo ana leo nahele nai sila nusan dale boe.
Koila'e mamates
11Hataholi fo, aon-na la'e mamates-sa, nanggenggeo faik hitu dalen-na. 12Neu faik-ka telun-na ma faik-ka hitun-na soona, ana muse tao nalalao-nalalafu aoina nenik oe feta; soona besak-ka balisi. Tehu metema, neu faik-ka telun-na, ma faik-ka hitun-na, ana ta tao balisi aoinan-na fa soona, nanggenggeo nahele. 13Hataholi fo, aon-na la'e mamates-sa, tehu ana ta tao nalalao-nalalafu aoinan-na, nde been-na manggenggeok, nanahu beita nanapisik nenik oe feta fa. De ana tao nanggenggeo Manetualain Lalaa Teman-na, hu ndia de, ta nanalekek da'di Manetualain anan-nala so'on.
14Metema mate hataholi esa nai lalaa temak dale soona, su'di see fo nai lalaa temak ndia dalek, do neu leo lalaa temak ndia dalek neu, soona nanggenggeo faik hitu dalen-na 15Basa kete ma ulek fo tatanan ta boeo, langgenggeo. 16Ba'eneu hataholi fo, aon-na la'e mamate nisalalak, do hataholi fo ana mate aon nai tina soona, nanggenggeo fai hitu dalen-na. Leondiak boe, ba'eneu hataholi fo, ana koila'e lates do hataholi manamatek duin-na.
17Soaneu tao nalalao-nalalafu hataholi manggenggeok ndia, muse ho'in-na sapi ina pilas, fo nanahotuk basak soaneu sala-singok nanalose henik ndia, afun faaanak. Muse tao afu ndia, leo ulek esa dalek neu, soona ho'i oe neme oe manafaak-ka mai, fo di'an leo ulek ndia dalek neu. 18Nai dede'a makasososak-ka dalek, fo nde metema mate hataholi esa nai lalaa temak dale soona, hataholi balisi-a, muse ho'in-na hanoe ndanak esa, fo ana dopen leo oe ndia dalek neu, fo basa soona, ana pisin neu lalaa temak ndia, ma neu basa hata lala'en fo manai dalek-kala, ma hataholi manai sila-la boe. Nai dede'a ka dua dalek, fo nde metema hataholi esa, aon-na la'e mamates, lates do hataholi manamatek duin-na soona, hataholi balisi-a, muse pisi hataholi manggenggeok ndia, sama leo hataholi makasososak-ka boe. 19Ana muse pisin nai faik-ka telun-na, ma faik-ka hitun-na. Neu faik-ka hitun-na soona, basa feta tao nalalao-nalalafu hataholi manggenggeok ndia. Hataholi ndia, muse safe bua papaken-na, ma nadiu oe. Lelek le'do mulai tenak soona, ana da'di balisi.
20Hataholi fo nanggenggeo, tehu ana ta tao feta tao nalalao-nalalafu aoinak-ka fa soona, manggenggeok nahele, nanahu beita nanapisik nenik oe feta fa. Ana tao nanggenggeo Manetualain Lalaa Teman-na, de ta nanalekek da'di Manetualain anan-nala so'on. 21Nakanenetek ndia, nanapakek losa dodoon-na. Hataholi manapisi oe feta ndia boeo, muse safe bua papaken-na, fo oe ndia la'e hataholi-a, nanggenggeo losa le'do tenak. 22Hataholi manggenggeok ndia, ana koila'e buas bee soona, buas ndia nanggenggeo, ma hataholi fe'ek koila'e hataholi ndia boeo, nanggenggeo losa le'do tenak.
Actualmente seleccionado:
BILANGAN 19: twu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
